រាជធានីភ្នំពេញ ៖ ខណៈតារាស្រីជាច្រើនដួងបង្ហាញភាពឡូយឆាយ ដោយការប្រើរបស់ទំនើបៗ ពិសេសរថយន្តនោះ កញ្ញាព្រះកាយច័ន្ទ លេចធ្លោតែកេរ្តិ៍ឈ្មោះ តែជីវភាពនៅសាមញ្ញ ប្រើប្រាស់តែម៉ូតូជាមធ្យោបាយធ្វើដំណើរ ដោយឪពុកជាអ្នកឌុប ។ ជាជាងភាពមានបានដោយអំពើមិនសមរម្យនោះ ព្រះកាយច័ន្ទ មានមោទនភាពចំពោះទេពកោសល្យសិល្បៈ ដែលទ្រទ្រង់ជីវភាពរបស់ខ្លួន ហើយឪពុករបស់នាងក៏មានមោទនភាពបែបនេះដែរ ។
តារាសម្តែង និងពិធីការិនីទើបតែរះឡើងយា៉ងចិញ្ចាច នាងព្រះកាយច័ន្ទ បានបង្ហាញវត្តមាននៅក្នុងកម្មវិធីរបស់ស្ថានីយទូរទស្សន៍មួយ ហើយបង្ហាញពីជីវិតសិល្បៈតាំងពីដំបូងរហូតមកទល់សព្វថ្ងៃ ។ ព្រះកាយច័ន្ទ មានកេរ្តិ៍ឈ្មោះត្រដែតឡើងនៅក្នុងពិភពសិល្បៈ តែនាងនៅមិនទាន់មានរបស់របរប្រើប្រាស់ផ្ទាល់ខ្លួនទំនើបដូចគេឡើយ ។ ដូច្នេះហើយពេលព្រះកាយច័ន្ទ និងឪពុករៀបរាប់ពីជីវិតសិល្បៈរុងរឿង តែនៅមិនទាន់ជួយឱ្យខ្លួនមានភាពហឺុហា មានរថយន្តជិះនោះ ទាំងនាង និងលោកឪពុកអួលដើមក ។
នៅក្នុងពិភពសិល្បៈនាពេលបច្ចុប្បន្ន អ្នកណាក៏ទទួលស្គាល់ថានាងព្រះកាយច័ន្ទ ដែលមានឈ្មោះដើម រា៉ សូនីតា ជាតារាកំពុងចែងចាំងជាមួយស្នាដៃសម្តែងជាច្រើន ។ នាងក្តោបក្តាប់បានការងារសិល្បៈជាច្រើនដូចតារាល្បីឈ្មោះខ្លះទៀតដែរ ។ ព្រះកាយច័ន្ទ ដែលត្រូវគេចាត់ចូលក្នុងបញ្ជីតារាស្រីល្បីឈ្មោះនេះ លេចធ្លោជាមួយអាជីពពិធីការិនី បង្ហាញម៉ូដ និងចុងក្រោយនេះ នាងទទួលបានការចាប់អារម្មណ៍ច្រើនតាមរយៈការបង្ហាញស្នាដៃក្នុងខ្សែភាពយន្តថ្មីបញ្ចាំង ព្រមៗគ្នា ។
ខណៈសិល្បៈរីកដុះដាលពីមួយខែទៅមួយខែ គេជឿថាព្រះកាយច័ន្ទ រួចផុតពីភាពខ្វះខាតក្នុងជីវភាព ពិសេសលែងទៅណាមកណាជាមួយម៉ូតូដែលឪពុកឌុបមានទាំងផ្ទុកសម្ភារតុបតែងកាយរបស់នាង ។ ផ្ទុយទៅវិញព្រះកាយច័ន្ទ នៅតែជិះម៉ូតូចាស់ជាមួយឪពុកដដែល មើលទៅហាក់គ្មានប្រែប្រួលឡូយឆាយអីដូចតារាស្រីផ្សេងសោះ សូម្បីតែអ្នកសារព័ត៌មានដែលស្គាល់នាងខ្លះ ក៏លាន់មាត់និយាយថា តារាស្រីម្នាក់នេះមានចិត្តតស៊ូបំផុត មិនភ្លើតភ្លើន ហឺុហាដោយសម្ភារដូចគេទេ ។ នាងសុខចិត្តធ្វើការតាមកម្លាំងកាយចិត្ត មិនត្រូវការរបស់ទ្រព្យលោតផ្លោះដូចគេឡើយ ។
ក្នុងពេលព្រះកាយច័ន្ទ និងឪពុកត្រូវគេអញ្ជើញឱ្យចូលរួមសម្ភាសន៍នៅក្នុងកម្មវិធីទូរទស្សន៍នោះ ព្រះកាយច័ន្ទ បានសម្តែងទឹកចិត្តរំភើបដែលកិច្ចការសិល្បៈរបស់នាងរីកចម្រើនទៅមុខជាបន្តបន្ទាប់ ដោយសារតែការខិតខំប្រឹងប្រែង ទោះជាពេលនេះជីវភាពនៅខ្វះខាតក៏ដោយ ។ ទោះជាយា៉ងណាក្តី នាងអះអាងថាបានស្រាលខ្លួនខ្លះ មិនសូវដូចមុនជាតារាថ្មីគេពុំសូវស្គាល់ ហើយពេលសម្តែង ម្តងៗទទួលបានប្រាក់កម្រៃទាបណាស់ បើប្រៀបធៀបតារាល្បីឈ្មោះ ។
តារាវ័យក្មេង ព្រះកាយច័ន្ទ និយាយថា «រាល់កិច្ចការសិល្បៈដែលនាងខ្ញុំបានបំពេញគ្រប់ទិសទីទាំងទៅសម្តែង និងធ្វើពិធីការិនីគ្មានអ្នកណាក្រៅពីលោកឪពុកទេជាអ្នកមើលថែទាំ ។ ដូចដឹងហើយខ្ញុំ និងបា៉របស់ខ្ញុំគ្មានអីប្រើ ដូចជាគ្មានឡានថ្មី គ្មានរបស់ ទំនើបៗប្រើ ជិះតែម៉ូតូទេតែសប្បាយចិត្តផងតូចចិត្តផង ដែលពេលខ្លះឃើញគេល្អជាងយើង ។ តារាមួយចំនួនគេឡូយមានឡានជិះទៅសម្តែង បែរជាងាកមកមើលខ្លួនយើងជិះតែម៉ូតូ តែពេលខ្លះទៀតគិតថាជីវិតគ្មានអ្នកណាមានបានទាំងអស់គ្នាទេ ។ សម្រាប់នាងខ្ញុំសំខាន់គឺការតស៊ូ ព្យាយាម ហើយរាល់ការសម្តែងបើសិនជាបា៉របស់ខ្ញុំមិននៅជិត នៅក្បែរជាកម្លាំងចិត្តទេ គឺនាងខ្ញុំច្បាស់ជាធ្វើអ្វីមិនចេញទេ» ។
ចំណែកឪពុកព្រះកាយច័ន្ទ បានបញ្ជាក់នៅចំពោះមុខមហាជនតាមរយៈកញ្ចក់ទូរទស្សន៍ទាំងអារម្មណ៍ក្តុកក្តួលថា «ខ្ញុំសូមបញ្ជាក់ជូនបងប្អូនទាំងអស់ថា ព្រះកាយច័ន្ទកូនស្រីរបស់ខ្ញុំរាល់ថ្ងៃនេះ ប្រឹងប្រែងធ្វើការជាមួយតែអាជីពសិល្បៈ សុទ្ធសាធ១០០% ព្រោះមិនចង់ដើរផ្លូវលោតផ្លោះ ។
ទោះជាពេលនេះកូនស្រីខ្ញុំនាងមានការទទួលស្គាល់ពីមហាជនមែន តែនាងនៅតែទៅណាមកណាជាមួយម៉ូតូរបស់ខ្ញុំ ។ ទៅថ្ងៃមុខគ្មានប្រាក់ទិញឡានជិះក៏សុខចិត្តប្រើរបស់ដដែលមិនប្តូរដែរ សំខាន់ អ្វីៗក្នុងផ្លូវត្រូវ បើទោះជាពេលខ្លះ ខ្ញុំមានអារម្មណ៍អាណិតកូន ក៏ខ្ញុំមិនអាចឱ្យកូនទៅហក់លោតលើសពីសមត្ថភាពដែរ ។ ធ្វើម៉េចគ្នាកូនអ្នកក្រមានតែតស៊ូទេ ជាផ្លូវជួយឱ្យយើងមានជីវិតរស់តទៅទៀតបាន» ៕
ចែករំលែកព័តមាននេះ