ផា យ៉ាដា កុលាបដងស្ទឹងសង្កែបញ្ចេញស្រទាប់ក្នុងអាជីពសិល្បៈ
ដោយ ៖ សាម៉ន
ថ្ងៃសុក្រ ទី២ ខែកក្កដា ឆ្នាំ២០១០ ម៉ោង ០៩:២៣
កោះសន្តិភាព
កញ្ញាផា យ៉ាដា ជាអ្នកសំដែងកាយវិការខារ៉ាអូខេ និងភាពយន្ដថ្មីទើបតែរះ
រាជធានីភ្នំពេញ ៖ ក្នុងវ័យ១៧ឆ្នាំ ប្រកបដោយរូបសម្ពស្សស្រស់ផូរផង់ កញ្ញាផា យ៉ាដា ជាអ្នកសំដែងកាយវិការខារ៉ាអូខេ និងភាពយន្ដថ្មីទើបតែរះឡើងចាប់ពីដើមឆ្នាំ២០០៩មក។ នាងមានទេពកោសល្យសំដែងខ្ពស់គួរជាទីពេញចិត្ដអ្នកដឹកនាំរឿងនិងអ្នកទស្សនា ។ រយៈពេលជាង១ឆ្នាំនេះយ៉ាដាធ្លាប់ចូល រួមសម្ដែងកាយវិការខារ៉ាអូខេឱ្យផលិតកម្ម ក្រៅប្រទេសជាច្រើន និងថតស្ប៉តឱ្យហាងសំអាងការមួយចំនួន ។ ជាពិសេសនោះនាងធ្លាប់ចូលរួមសម្ដែងរឿងភាគឱ្យស្ថានីយទូរទស្សន៍CTN ក្នុងរឿង “ល្បិចស្រី” ធ្វើជាតួអង្គមិត្ដភក្ដិតួឯកស្រី និងរឿង“រលកសម្លេង ”ព្រមទាំងសម្ដែងក្នុងរឿង“ល្មម ហើយណាប្ដី” ដែលចាក់ផ្សាយតាមកញ្ចក់ទូរទស្សន៍ប៉ុស្ដិ៍លេខ៥ ជាតួអង្គស្រីស្នេហ៍ លោកហេង ដារី។ ក្រៅពីសម្ដែងក្នុងខ្សែវីដេអូភាគនាងក៏ធ្លាប់ចូលរួមសម្ដែងក្នុង រឿង “វិទ្យាល័យខ្មោច” ជាខ្សែភាពយន្ដខ្នាតធំសំរាប់ដាក់បញ្ចាំងនៅតាមរោងផងដែរ ។
កញ្ញាផា យ៉ាដា ឱ្យដឹងថា នាងបោះជំហានចូលប្រឡូកក្នុងវិស័យសិល្បៈសម្ដែងនេះ គឺដោយសារតែកាលពីនាងនៅវ័យកុមារពេលទស្សនាទូរទស្សន៍ និងភាពយន្ដ នាងឃើញគេសម្ដែងហាក់មាននិស្ស័យចង់សម្ដែងដែរ ហើយប្រាថ្នាថាចង់ក្លាយជាអ្នកសិល្បៈសម្ដែងនេះតាំងពីពេលនោះមក ។ ហេតុនេះហើយនៅចុងឆ្នាំ២០០៨នាងបានសំរេចចិត្ដឈប់សិក្សាត្រឹមថ្នាក់ទី១១មករស់នៅរាជធានីភ្នំពេញ ហើយចូលហាត់រៀនសម្ដែងនៅក្នុងក្លឹបសិល្បៈមួយអស់ពេល ៣ខែ។ នៅដើមឆ្នាំ២០០៩ នាងមានឱកាសបានចូលរួមសម្ដែងកាយវិការខារ៉ាអូខេ និងភាពយន្ដ ហើយបន្ដរហូតមកដល់សព្វថ្ងៃ។
កញ្ញាយ៉ាដា មិនស្កប់ចិត្ដត្រឹមតែអាជីពជាអ្នកសំដែងនេះទេ គឺនាងមានមហិច្ឆតាចង់កសាងខ្លួនឱ្យក្លាយទៅជាតារាចំរៀងកិត្ដិយសទៀតផង ដូច្នេះហើយសព្វថ្ងៃនេះនាង ខិតខំហាត់រៀនច្រៀងទៀត ។
ការដាក់ចិត្ដដាក់កាយបំរើវិស័យសិល្បៈនេះព្រោះនាងមិនសម្លឹងឃើញមានអាជីពអ្វីផ្សេងពីនេះដែលធ្វើឱ្យជីវិតនាងប្រសើរឡើយ។ ម្យ៉ាងទៀតការចូលប្រឡូកក្នុងវិស័យសិល្បៈសម្ដែងនេះព្រោះតែនាងចង់មានកេរ្ដិ៍ឈ្មោះល្បី ចង់ទៅណាមកណាមានគេស្គាល់ច្រើន និងមានទស្សនិកជនតាមមើល និងកោតសរសើរ។ កញ្ញា ផា យ៉ាដា ឱ្យដឹងថា នាងមិនមានជាប់ពាក់ព័ន្ធស្នេហាជាមួយបុរសណាទេ ព្រោះពេលមានអ្នកតាមសុំស្នេហានាងបានឆ្លើយប្រាប់គេថា នាងនៅក្មេងនៅចង់សប្បាយ និងម្យ៉ាងទៀតបើមានសង្សារនាងខ្លាចបាត់ប្រជាប្រិយភាព ។
កញ្ញាផា យ៉ាដា អាយុ១៧ឆ្នាំ មានស្រុកកំណើតនៅខេត្ដបាត់ដំបង ឪពុកឈ្មោះទុយ វុត្ថា ជាអាជីវករ និងម្ដាយឈ្មោះគីម ចាន់បុប្ពា ជាមេផ្ទះ ។ នាងជាកូនច្បងក្នុងចំណោមបងប្អូន២នាក់ គឺរូបនាងនិងប្អូនប្រុសម្នាក់ទៀត។ ទៅថ្ងៃអនាគតក្រៅពីអាជីពសិល្បៈ បើមានភាពលទ្ធភាពនាងចង់ក្លាយជាម្ចាស់ សណ្ឋាគារ ដូច្នេះហើយទើបនាងបង្កើនចំណេះដឹងបន្ថែម ដោយពេលទំនេរពីការសម្ដែងនាងខិតខំប្រឹងប្រែងសិក្សាភាសាអង់គ្លេស ៕
