អភិបាលខេត្តស្ទឹងត្រែងជំរុញការអភិវឌ្ឍន៍រមណីយដ្ឋាន«ផ្សោតត្បូងខ្លា»ដើម្បីទាក់ទាញទេសចរណ៍និងបង្កើតការងារ
- ស្ទឹងត្រែង
ខេត្តស្ទឹងត្រែង ៖ ក្នុងឱកាសចុះសិក្សាគម្រោងអភិវឌ្ឍន៍ នៅថ្ងៃទី០៤ មិថុនា ២០២៦ លោក សរ សុពុត្រា អភិ
បាលខេត្តស្ទឹងត្រែង បានណែនាំឲ្យមន្ទីរ-អង្គភាពពាក់ព័ន្ធសហការគ្នា រៀបចំយន្តការអភិវឌ្ឍន៍ «រមណីយ
ដ្ឋានទេសចរណ៍សត្វផ្សោតត្បូងខ្លា» ស្ថិតក្នុងឃុំអូរម្រះ ស្រុកសៀមបូក ដើម្បីទាក់ទាញភ្ញៀវទេសចរ និង
បង្កើតមុខរបរជូនប្រជាពលរដ្ឋក្នុងមូលដ្ឋាន ។
លោក អ៊ន ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបានមានប្រសាសន៍ កាលពីព្រឹកថ្ងៃទី៦ មិថុនា ២០២៦ ថា ពាក់ព័ន្ធទៅនឹងតំបន់អន្លង់ផ្សោតត្បូងខ្លា កាលពីថ្ងៃទ០៤ ខែមិថុនា អភិបាលខេត្ត បានដឹកនាំក្រុមការងារចុះសិក្សា និងរៀបចំប្លង់គោល ដើម្បីអភិវឌ្ឍតំបន់មួយកន្លែង ឱ្យក្លាយជារមណីយដ្ឋានទេសចរណ៍ដ៏ទាក់ទាញនាពេលខាងមុខ ។ ក្នុងតំបន់នោះ យើងមានរៀបចំជាសហគមន៍ឡើង ដើម្បីបម្រើផ្ដល់សេវាផ្ទះស្នាក់, សេវាការដឹកជញ្ជូន, សេវាម្ហូបអាហារ, សេវាដំណើរទស្សនាសត្វផ្សោត និងការកែច្នៃវត្ថុអនុស្សាវរិយ៍ជាដើម។
លោកថា ដើម្បីឱ្យគម្រោងនេះ លេចចេញជារូបរាង ឯកឧត្តមបានជំរុញឱ្យមន្ទីរជំនាញរៀបចំប្លង់គោល ដើម្បីស្នើសុំថវិកាគាំទ្រពីរាជរដ្ឋាភិបាល តាមរយៈក្រសួងអភិវឌ្ឍន៍ជនបទ និងស្វែងរកដៃគូអភិវឌ្ឍន៍ ។ គម្រោងនេះ រំពឹងថា នឹងជួយទាក់ទាញភ្ញៀវទេសចរ ព្រមទាំងបង្កើតឱកាសការងារ និងចំណូលជូនសហគមន៍មូលដ្ឋានយ៉ាង
ច្រើន ។
លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានឱ្យដឹងថា បច្ចុប្បន្ន មានសត្វផ្សោតប្រមាណ៣០ក្បាល កំពុងរស់នៅក្នុងអន្លង់សំខាន់ៗចំនួន៣ ក្នុងស្រុកសៀមបូក គឺ៖ អន្លង់ត្បូងខ្លា, កោះសន្ទក់, និងកោះកូនសត្វ ។
បច្ចុប្បន្នយើងមានមន្ត្រីជលផល និងឆ្មាំទន្លេចំនួន២៦នាក់ កំពុងយាមល្បាតយ៉ាងសកម្ម ដើម្បីការពារសត្វផ្សោតពីហានិភ័យបាត់បង់ជីវិត ។ ជាមួយគ្នា យើងក៏បានហាមប្រាមដាច់ខាតការដាក់មង និងសន្ទូច រនោង នៅតំបន់ផ្សោតរស់នៅ និងផ្លូវឆ្លងកាត់ ដោយមានការផ្សព្វផ្សាយអប់រំដល់ប្រជានេសាទផ្ទាល់ ។
សូមបញ្ជាក់ថា សត្វផ្សោតនៅខេត្តស្ទឹងត្រែងនេះ ប្រសិនបើគ្មានការចូលរួមអភិរក្សយ៉ាងស្រស្រាក់ស្រស្រាំពីឆ្មាំទន្លេ សហគមន៍នេសាទ មន្ត្រីជលផល និងអាជ្ញាធរពាក់ព័ន្ធ ជាង២ទស្សវត្តរ៍មកនេះទេ ម្ល៉េះសត្វផ្សោតទាំងនេះអាចនឹងមិនមាននិរន្តរភាពរហូតមកទល់សព្វថ្ងៃនេះដែរ ។
បច្ចុប្បន្ន ដែនជម្រកសត្វផ្សោតនៅអន្លង់ត្បូងខ្លា ចាប់ពីព្រំប្រទល់ខេត្តក្រចេះ ដល់តំបន់រ៉ាមសារ ត្រូវបានរាជរដ្ឋាភិបាលចុះបញ្ជីប្លង់រឹងការពារជាផ្លូវការហើយ ៕
ចែករំលែកព័តមាននេះ