ខេត្តព្រៃវែង ៖ សិស្សមួយក្រុមមានគ្នា៥ទៅ៦នាក់ដែលគេចពីសាលារៀនហើយនាំគ្នាមកជិះស្គីលេង កាលពីថ្ងៃទី១២ វិច្ឆិកា តាំងពីម៉ោង៧និង៣០នាទី រហូតដល់ម៉ោង៩និង៣០នាទីព្រឹក បានត្រូវចោរលួចកាច់សោ.កយកម៉ូតូបាត់អស់មួយគ្រឿង ។ ហេតុការណ៍នេះបានកើតឡើងនៅមុខកន្លែងលេងស្គីអុីប៊ែរ ស្ថិតក្នុងភូមិ២ ឃុំព្រែកខ្សាយ «ខ» ស្រុកពាមរក៍ ។
ប្រភពព័ត៌មានឱ្យដឹងថា សិស្សដែលបាត់ម៉ូតូនេះឈ្មោះ ឈុន ឧត្តម ជាសិស្សវិទ្យាល័យតាគោក ថ្នាក់ទី១០ ស្ថិតក្នុងឃុំល្វា ស្រុកព្រះស្តេច ។ មិត្តភក្តិដែលសុំមិនបញ្ចេញឈ្មោះនិយាយថា ជារឿយៗពួកគេមានគ្នា៥ទៅ៦នាក់ តែងនាំគ្នាមកជិះស្គីលេងនៅទីនេះ ដោយទុកម៉ូតូនៅមុខផ្ទះស្គី ហើយក៏ចូលទៅជិះស្គីលេង១ម៉ោងថ្លៃពី៤ទៅ៥ពាន់រៀល ។ ចំណែកលើកនេះ ចូលលេងអស់រយៈពេលប្រហែល២ម៉ោង លុះចេញមកវិញស្រាប់តែបាត់ម៉ូតូ១គ្រឿងម៉ាក សេ១២៥ ពណ៌ខ្មៅ ស៊េរី២០១១ គ្មានស្លាក លេខ ។ ក្រោយពីដឹងថាបាត់ ម្ចាស់ម៉ូតូបានស្រែកឆោឡោឡើងឱ្យម្ចាស់ផ្ទះជួយរកតែរកមិនឃើញ ក៏រត់ទៅប្តឹងសមត្ថកិច្ចឱ្យជួយតាមរក ក៏នៅតែមិនឃើញទៀត ។
គួរកត់សម្គាល់ថា នៅក្នុងតំបន់អ្នកលឿង បើតាមប្រជាពលរដ្ឋនិយាយថា មិនថានៅមុខផ្សារ-មុខផ្ទះ ឬមន្ទីរពេទ្យទេ ឱ្យតែប្រហែស គឺបាត់ស្រមោលហើយ ព្រោះចោរធ្លាប់កាច់សោ.កម៉ូតូយកទៅផុយៗអស់ជិត១០គ្រឿងមកហើយ ដូច្នេះសូមប្រុងប្រយ័ត្ន ៕
ចែករំលែកព័តមាននេះ