ខេត្តកោះកុង ៖ មេការ និងសន្តិសុខសណ្ឋាគារអេប៉ិចកោះកុង ចំនួន៣នាក់ ត្រូវបានសមត្ថកិច្ចនគរបាលព្រហ្មទណ្ឌខេត្ត ឃាត់ខ្លួនកាលពីវេលាម៉ោង៥និង៥០នាទីល្ងាចថ្ងៃទី៥ ឧសភា ២០១៣ តាមបញ្ជាលោកព្រះរាជអាជ្ញាអមសាលាដំបូងខេត្ត ដោយយោងតាមពាក្យបណ្តឹងជនជាតិអង់គ្លេសម្នាក់ឈ្មោះស៊ីមុន ចែម ប៉ាស្ទ្រិច ភេទប្រុស អាយុ៥៥ឆ្នាំ កាន់ប៉ាស្ព័រលេខ៥០៣១៧៨៣០៣ ជាភ្ញៀវទេសចរដែលបានប្តឹងជនសង្ស័យទាំង៤នាក់ខាងលើថា បានធ្វើទារុណកម្មចាប់ចងដៃទៅក្រោយ ដោយប្រើខ្សែភ្លើងប្រវែង១៥,៥០ម៉ែត្រ និងបង្ខាំងទុកជាច្រើនម៉ោងនៅក្នុងសណ្ឋាគាររបស់ខ្លួន។
លោកវរសេនីយ៍ទោ ឃឹម សាណេ ស្នងការរងទទួលផែនកណ្តាលនគរបាលយុត្តិធម៌បានបញ្ជាក់ថា នៅវេលាម៉ោង៥និង៣០នាទីទៀបភ្លឺថ្ងៃទី៥ ឧសភា ២០១៣ ជនជាតិអង់គ្លេសខាងលើ ដែលសម្រាកនៅក្នុងផ្ទះសំណាក់ម៉ូតូប៉ា បានដើរចូលទៅក្នុងសណ្ឋាគារអេប៉ិចកោះកុង ដែលមានទីតាំងក្បែរគ្នា ស្ថិតនៅក្នុងភូមិ២ សង្កាត់ស្មាច់មានជ័យ ក្រុងខេមរភូមិន្ទ បំណងទៅរកទិញស្រាផឹក ប៉ុន្តែសន្តិសុខសណ្ឋាគារមិនព្រមលក់ឱ្យ ។ ខណៈនោះជនជាតិអង់គ្លេសរូបនោះក៏ទាញដបស្រាដែលដាក់តាំងក្នុងទូកញ្ចក់យកមកបោកបំបែកទូកញ្ចក់ និងបោកកែវបែករប៉ាត់រប៉ាយពាសពេញបន្ទប់តាំងស្រា ជាហេតុធ្វើឱ្យភ្ញៀវស្នាក់នៅក្នុងសណ្ឋាគារភ្ញាក់ផ្អើល ។ ដោយឃើញដូច្នេះសន្តិសុខសណ្ឋាគារចំនួន៣នាក់ និងមេការម្នាក់ក៏បានសម្រេចចិត្តចាប់ចងជនជាតិអង់គ្លេសរូបនេះទុកក្នុងសណ្ឋាគារតែម្តង ៕
ចែករំលែកព័តមាននេះ