AFP ផ្សាយថា ភ្នំភ្លើងហ៊្វូជី ជានិមិត្តរូបរបស់ប្រទេសជប៉ុនរំពឹងថា នឹងបានចុះបញ្ជីជាបេតិកភណ្ឌពិភពលោកជាផ្លូវការនាខែមិថុនា ក្នុងកិច្ចប្រជុំរបស់អង្គការយូណេស្កូ នៅប្រទេសកម្ពុជា ។លោក អីុកូម៉ូស មានតួនាទីក្នុងការផ្តល់កិច្ចពិភាក្សាដល់អង្គការផ្នែកវិទ្យាសាស្ត្រ និងវប្បធម៌នៃអង្គការសហប្រជាជាតិ(UNESCO) បានបញ្ជាក់ប្រាប់រដ្ឋាភិបាលជប៉ុនថា ភ្នំភ្លើងហ៊្វូជីមានលក្ខណសម្បត្តិអាចកា្លយជាបេតិកភណ្ឌពិភពលោក ។
ចំណែកមន្ត្រីក្រសួងការបរទេសជប៉ុនលើកឡើងថា គុណប្រយោជន៍របស់ភ្នំភ្លើងហ៊្វូជី ដែលមានកម្ពស់៣.៧៧៦ម៉ែត្រ និងជាភ្នំខ្ពស់បំផុតនៅប្រទេសជប៉ុន នឹងបានទទួលការចុះបញ្ជីជាបេតិកភណ្ឌនៅក្នុងកិច្ចប្រជុំគណៈកម្មការបេតិកភណ្ឌពិភពលោក នៅប្រទេសកម្ពុជា ក្នុងខែមិថុនា ។ចំណែកលោក ហ៊ីដេថាដា ស៊ូដូ ចៅហ្វាយក្រុងហ៊្វូជីណូមីយ៉ាបានសម្តែងក្តីរំភើប និងសង្ឃឹមថា ការចុះបញ្ជីជាបេតិកភណ្ឌពិភពលោក នឹងជួយទាក់ទាញភ្ញៀវទេសចរឱ្យធ្វើដំណើរទៅទស្សនាភ្នំភ្លើងហ៊្វូជីដ៏ប្រណីតកាន់តែច្រើនជាងមុន ។
លោកស៊ូដូបញ្ជាក់ថា «ខ្ញុំសង្ឃឹមថាភ្ញៀវទេសចរនឹងមកទស្សនានៅទីក្រុងនេះកើនឡើង និងជាជំហានដ៏សំខាន់ក្នុងការអភិវឌ្ឍទីក្រុងរបស់យើង» ។នៅក្នុងឯកសារណែនាំស្តីពីការចុះបញ្ជីបេតិកភណ្ឌពិភពលោករបស់លោកអីុកូម៉ូសបញ្ជាក់ថា ភ្នំភ្លើងហ៊្វូជី លាតសន្ធឹងលើផ្ទៃដី៧០.០០០ហិកតា ស្ថិតក្នុងបរិវេណខេត្ត២របស់ជប៉ុន គឺខេត្តយ៉ាម៉ាណាស៊ី និងសីុស៊ូអូកា ។ បរិវេណជុំវិញភ្នំព័ទ្ធដោយបឹងដ៏ធំចំនួន៥ និងទឹកជ្រោះ ។
លោក អីុកូម៉ូស បន្តថាប្រណីតភាពរបស់ហ៊្វូជី គឺជាប្រភពកំណើតផ្នែកសិល្បៈ និងវប្បធម៌ ជានិមិត្តរូបរបស់ជនជាតិជប៉ុន ។ ដូច្នេះហ៊្វូជី គឺជាភ្នំសក្តិសមនឹងទទួលការកោតសរសើរថា ជា«បេតិកភណ្ឌផ្នែកវប្បធម៌» ច្រើនជាង «បេតិកភណ្ឌផ្នែកធម្មជាតិ» ។
នៅលើភ្នំភ្លើងហ៊្វូជី ដែលគ្របដណ្តប់ដោយព្រិលពណ៌ស ស្ទើរតែពេញមួយឆ្នាំបានក្លាយជាចំណុចដែលភ្ញៀវទេសចរភាគច្រើននឹកឃើញនៅលំដាប់ដំបូង បើនិយាយពីប្រទេសជប៉ុន ។ភ្នំភ្លើងហ៊្វូជីកើតមានការផ្ទុះភ្នំភ្លើងជាលើកចុងក្រោយ ប្រហែល៣០០ឆ្នាំមុន និងកំពុងក្លាយជាចំណាប់អារម្មណ៍របស់ភ្ញៀវទេសចរលើពិភពលោក ៕
ចែករំលែកព័តមាននេះ