ខេត្តកំពង់ស្ពឺ ៖ បុរសម្នាក់ខណៈដេញវាយកណ្តុរនៅក្នុងផ្ទះ ហើយឡើងតាមកណ្តុររហូតដល់លើពិតាន ក៏ប៉ះនឹងតំណខ្សែភ្លើងដែលរបកច្រើនអន្លើបណ្តាលឱ្យឆក់ស្លាប់រួញខ្លួននៅលើពិតានផ្ទះក្នុងចម្ការរបស់ខ្លួន ។ ហេតុការណ៍នេះបានកើតឡើងកាលពីវេលាម៉ោង៨យប់ថ្ងៃទី២៣ មេសា នៅចំណុចដីអំបិល ក្នុងភូមិទី១ ឃុំត្រែងត្រយឹង ស្រុកភ្នំស្រួច ។
មន្ត្រីប៉ូលិសមូលដ្ឋានបានរៀបរាប់ថា បុរសដែលស្លាប់ដោយសារចរន្តអគ្គិសនីឆក់នៅក្នុងផ្ទះរបស់ខ្លួននេះឈ្មោះ ជី ម៉ុងដែន អាយុ៤៨ឆ្នាំ មានលំនៅផ្ទះលេខ៦៣ ផ្លូវលេខ២០០៤ ភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។ ជនរងគ្រោះជាមន្ត្រីប៉ូលិសក្រសួងមហាផ្ទៃ បម្រើការនៅនាយកដ្ឋានអន្តរាគមន៍ មានប្រពន្ធនៅឯប្រទេសអូស្ត្រាលី ។ តាមសាក្សីឱ្យដឹងដែរថា នៅយប់ថ្ងៃទី២៣ មេសា ប្រពន្ធនៅឯប្រទេសអូស្ត្រាលីបានទូរស័ព្ទមកសាកសួរប្តីជាធម្មតា តែពុំឮទូរស័ព្ទឆ្លើយសោះ ក៏សង្ស័យទើបសួរកម្មករដែលបម្រើការងារជាមួយប្តីនៅទីនោះ ទើបដឹងថាប្តីរបស់ខ្លួនស្លាប់ដោយសារចរន្តអគ្គិសនីឆក់នៅលើពិតានផ្ទះ ។
នៅវេលាម៉ោង៨ព្រឹក ថ្ងៃទី២៣ មេសា ប៉ូលិសព្រហ្មទណ្ឌបានចុះធ្វើការត្រួតពិនិត្យទើបដឹងថាត្រូវចរន្តអគ្គិសនីឆក់ ព្រោះនៅទីនោះគេសង្កេតឃើញខ្សែភ្លើងមានតំណច្រើន និងមានរបកស្រោមផង ស្របនឹងជនរងគ្រោះចូលទៅដេញវាយកណ្តុរក៏ឆក់តែម្តង ។ សពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅផ្ទះឯរាជធានីភ្នំពេញ ក្រោយពីសមត្ថកិច្ចត្រួតពិនិត្យរួចរាល់ ៕
ចែករំលែកព័តមាននេះ