រាជធានីភ្នំពេញ ៖ ក្រុមអ្នករត់ម៉ូតូឌុប-រ៉ឺម៉កកង់៣ជាច្រើននាក់ ហៅថា សមាគមរួមគ្នាដើម្បីអភិវឌ្ឍន៍ នាវេលាម៉ោងប្រហែល៩ព្រឹកថ្ងៃទី១៨ មីនា ២០១៣ បានទៅប្រមូលផ្តុំគ្នានៅមុខសាលាឧទ្ធរណ៍ ដើម្បីរង់ចាំស្តាប់ចំណាត់ការផ្សេងៗពាក់ព័ន្ធនឹងស្ត្រីឈ្មោះយ៉ោម បុប្ផា និងសុំបកស្រាយអំពីសកមក្មភាពមិនប្រក្រតីរបស់យ៉ោម បុប្ផា ព្រោះឮថា មានអង្គការសមាគមសង្គមស៊ីវិលមួយចំនួនទៅសាលាឧទ្ធរណ៍ធ្វើអន្តរាគមន៍រឿងនេះ ហើយពួកគេ (ក្រុមអ្នករត់ម៉ូតូឌុប-រ៉ឺម៉កកង់៣) កើតទុក្ខមិនសុខចិត្ត និងទាមទារសូមឱ្យផ្លូវច្បាប់ដាក់ទោសស្ត្រីឈ្មោះយ៉ោម បុប្ផា ឱ្យខាងតែបានគ្មានការយោគយល់។
ក្រុមអ្នកតវ៉ា និងសុំបកស្រាយសង្កត់ទោសស្ត្រីឈ្មោះយ៉ោម បុប្ផា បានឱ្យដឹងថា ស្ត្រីឈ្មោះយ៉ោម បុប្ផា និងក្រុមមួយក្តាប់តូចនៅប្លុកបឹងកក់ តែងតែធ្វើព្យុះភ្លៀងញុះញង់ឱ្យប្រជាពលរដ្ឋយល់ច្រឡំសភាពការណ៍ពិត បំពុលបរិយាកាស បង្កចលាចល ធ្វើឱ្យខូចសណ្តាប់ធ្នាប់សង្គមប្រឆាំងនឹងអាជ្ញាធរទទឹងទទែង ។ បន្ទាប់ពីចេញពីសាលាឧទ្ធរណ៍នេះទៅ ពួកគេនឹងយកញត្តិមួយច្បាប់ទៅដាក់នៅខុទ្ទកាល័យសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងទៅដាក់នៅខុទ្ធកាល័យក្រសួងមហាផ្ទៃ សូមឱ្យជួយចាត់ការរឿងស្ត្រីយ៉ោម បុប្ផា ឱ្យបានតឹងរ៉ឹងតាមផ្លូវច្បាប់ ៕
ចែករំលែកព័តមាននេះ