រាជធានីភ្នំពេញ ៖ នគរបាលបានឃាត់ខ្លួនជនសង្ស័យចំនួន៥នាក់ ក្នុងនោះ២នាក់ត្រូវបានឃាត់ខ្លួនជាមួយនឹងអាវុធខ្លីមួយដើម និងដកហូតសម្ភារមួយចំនួនដូចជា ដែកអក្សរតេសម្រាប់កាច់សោ.កម៉ូតូ និងម៉ូតូ១គ្រឿង រីឯជនសង្ស័យ៣នាក់ទៀតក្នុងនោះមានស្ត្រីម្នាក់ផងដែរ ត្រូវបានឃាត់ខ្លួននៅកន្លែងផ្សេងគ្នា ប៉ុន្តែក្នុងភូមិតែមួយជាមួយនឹងថ្នាំញៀនម៉ាទឹកកកជាច្រើនកញ្ចប់ កាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃទី៤ មករា ឆ្នាំ ២០១៣ នៅក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
លោកម៉ក់ ហុង អធិការប៉ូលិសខណ្ឌសែនសុខ និងលោកម៉ូវ ម៉ានិត អភិបាលរងខណ្ឌសែនសុខ ដែលដឹកនាំប្រតិបត្តិនេះ ឱ្យដឹងថា ក្រោយពីមានករណីជនប្រដាប់អាវុធចំនួន២នាក់ ធ្វើសកម្មភាពភ្ជង់ប្លន់ដល់ក្នុងផ្ទះមួយនៅតាមបណ្តោយមហាវិថីម៉ៅសេទុង ក្នុងសង្កាត់បឹងត្របែក ខណ្ឌចំការមន នៅវេលាម៉ោង៧និង៣០នាទី និងមានករណីសន្តិសុខរបស់ក្រុមហ៊ុន MPS ប្រើកាំបិតចាក់ និងវាយប្លន់ប្តីប្រពន្ធអ្នកគ្រប់គ្រងក្រុមហ៊ុនយកទ្រព្យសម្បត្តិ និងលុយកាក់ ខណៈសន្តិសុខឯកជនរូបនោះជាអ្នកយាមនៅមុខក្រុមហ៊ុនអារ៉ាហ្គនវើលដ៍៥៤ខូអិលធីឌី តាមបណ្តោយផ្លូវលេខ២៧១ ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ លោកជួន សុវណ្ណ អគ្គស្នងការរង និងជាស្នងការប៉ូលិសរាជធានីភ្នំពេញ បានបញ្ជាឱ្យប៉ូលិសទាំង៩ខណ្ឌក្នុងរាជធានី ចេញល្បាតនិងតាមប្រមាញ់រកជនសង្ស័យភ្លាមៗ ។ ខណៈនោះ ប៉ូលិសកងអន្តរាគមន៍ខណ្ឌសែនសុខ ចំនួន៦នាក់បានចុះល្បាតក្នុងភូមិសាស្ត្រភូមិត្រពាំងឈូក ក្នុងសង្កាត់ទឹកថ្លា ប្រទះជនសង្ស័យ២នាក់កំពុងជិះម៉ូតូម៉ាកគ្រីស ពណ៌ក្រហម តាមបណ្តោយផ្លូវលំ ក៏ឃាត់ឱ្យឈប់ដើម្បីសួរនាំ ស្រាប់តែជនសង្ស័យម្នាក់ដែលជិះពីក្រោយបានលោតចុះពីលើម៉ូតូ រួចយកស្បោងមួយទៅដាក់នៅក្បែរជញ្ជាំងផ្ទះប្រជាពលរដ្ឋ ។
ប្រភពព័ត៌មានដដែលបន្តថា ពេលនោះប៉ូលិសអន្តរាគមន៍ចំនួន៣នាក់បានធ្វើការឆែកឆេរ ស្រាប់តែឃើញគ្រាប់កាំភ្លើងចំនួន១គ្រាប់នៅក្នុងហោប៉ៅជននេះ ហើយជននេះបានប្រាប់ប៉ូលិសថា គ្រាប់កាំភ្លើងនេះគេរើសបានតាមផ្លូវទេ ។ ដោយមានការសង្ស័យ ប៉ូលិសក៏ចាប់កៀកនិងឱ្យជនទាំង២នាក់ក្រាបទៅនឹងដី និងបានដាក់ខ្នោះដៃ ។ ចំណែកឯមន្ត្រីប៉ូលិសម្នាក់ទៀតបានទៅមើលស្បោងដែលជននេះយកទៅទុកនៅក្បែជញ្ជាំងផ្ទះអ្នកភូមិ ក៏ឃើញកាំភ្លើងខ្លីម៉ាកកា៥៤ ក្រូមេយ៉ាងសស្ងាច និងបញ្ចូលគ្រាប់រួចជាស្រេចថែមទៀត ។ ធាតុពិតជនសង្ស័យបានយកក្រដាសកាសែតរុំកាំភ្លើងឱ្យជិត ហើយដាក់នៅក្នុងស្បោងសបន្លំភ្នែកសមត្ថកិច្ច ខណៈពេលពួកគេធ្វើដំណើរជួបក្រុមប៉ូលិសឆែកឆេរអាវុធនេះ ។ ចំណែកឯជន៣នាក់ទៀត ត្រូវប៉ូលិសអន្តរាគមន៍មួយក្រុមផ្សេងឃាត់ខ្លួនជាមួយនឹងថ្នាំញៀនជាច្រើនកញ្ចប់នៅក្នុងផ្ទះឈើមួយគ្មានលេខ ក្នុងភូមិខាងលើនេះដែរ ។
ជនសង្ស័យទាំង៥នាក់ខាងលើនេះមាន
១-ឈ្មោះពៅ សំណាង ភេទប្រុស អាយុ៣៤ឆ្នាំ ស្នាក់នៅក្នុងសង្កាត់អូប្ញស្សីទី២ ខណ្ឌ៧មករា
២-ឈ្មោះកែវ បញ្ញារិទ្ធ ភេទប្រុស អាយុ២៦ឆ្នាំ ជាកម្មកររោងចក្រ ស្នាក់នៅក្នុងសង្កាត់បឹងត្របែក ខណ្ឌចំការមន ទាំងពីរនាក់នេះប៉ូលិសសង្ស័យជាក្រុមចោរប្លន់ ។ ចំណែកជនសង្ស័យ៣នាក់ទៀតដែលជាប់ពាក់ព័ន្ធនឹងករណីចែកចាយគ្រឿងញៀនមាន ១-ឈ្មោះសោម អូន ភេទប្រុស អាយុ២៧ឆ្នាំ ២-ឈ្មោះគៀន ម៉ារី ភេទស្រី អាយុ២០ឆ្នាំ និង៣-ឈ្មោះយឹម វណ្ណារ៉ា ភេទប្រុស អាយុ២៥ឆ្នាំ ៕
ចែករំលែកព័តមាននេះ