រាជធានីភ្នំពេញ ៖ បុរសជនជាតិរុស្ស៊ីម្នាក់បានត្រូវខ្មាន់កាំភ្លើងបាញ់មួយគ្រាប់ចំកំភួនដៃខាងឆ្វេងធ្លាយគ្រាប់ទៅភ្លៅខាងស្តាំ ខណៈពេលបើករថយន្តមកដល់មុខផ្ទះហើយចុះបើកទ្វាររថយន្តឱ្យអ្នករួមដំណើរជាជនជាតិរុស្ស៊ីដូចគ្នាចេញពីក្នុងរថយន្ត កាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី២៦ វិច្ឆិកា តាមផ្លូវលេខ៨៣០ មុខផ្ទះលេខ២ ក្នុងសង្កាត់ទន្លេបាសាក់ ខណ្ឌចំការមន ។
ជនរងគ្រោះជាជនជាតិរុស្ស៊ីនេះឈ្មោះ KOSTENKO KONSTANTIN អាយុ៤២ឆ្នាំ ស្នាក់នៅផ្ទះជួលកន្លែងកើតហេតុខាងលើ ចូលមកប្រទេសកម្ពុជាក្នុងឋានៈជាភ្ញៀវទេសចរ ។ មុនពេលកើតហេតុ បុរសជនជាតិរុស្ស៊ីរូបនេះបើករថយន្តម៉ាកហាយឡែនឌ័រ ពណ៌ស្ករ ពាក់ស្លាកលេខបណ្តោះអាសន្ន ដឹកស្រ្តីជនជាតិរុស្ស៊ី៣នាក់មិនដឹងជាមកពីទីណាទេ ដោយរថយន្តមានប្រឡាក់សុទ្ធតែដី ។ ខណៈមកដល់មុខផ្ទះក៏ចុះពីរថយន្ត ស្រាប់តែមានជន៦នាក់ ជិះម៉ូតូ២គ្រឿង មួយគ្រឿងម៉ាកហុងដាឌ្រីម ធុនសេ១២៥ និងមួយគ្រឿងទៀតមិនចាំម៉ាក បានដកកាំភ្លើងបាញ់ទៅលើបុរសជនជាតិរុស្ស៊ីនោះចំកំភួនដៃខាងឆ្វេងធ្លាយទៅភ្លៅខាងស្តាំ រួចហើយក្រុមខ្មាន់កាំភ្លើងទាំងនោះក៏នាំគ្នាជិះម៉ូតូគេចខ្លួនបាត់អស់ទៅ ។
ក្រោយពេលកើតហេតុ ស្រ្តីជនជាតិរុស្ស៊ីទាំង៣នាក់បានបញ្ជូនជនរងគ្រោះទៅព្យាបាលនៅ មន្ទីរពេទ្យមិត្តភាពខ្មែរ-សូវៀត ។ ទាក់ទិននឹងការបាញ់ប្រហារនេះ ខ្លះសង្ស័យថា ជាករណីបាញ់ប្លន់យករថយន្ត និងខ្លះទៀតសង្ស័យថាជារឿងគំនុំ តែមិនទាន់មានប្រភពណាមួយអះអាងពិតប្រាកដនៅឡើយទេ ។
រឿងរ៉ាវខ្មាន់កាំភ្លើងបាញ់ប្រហារទៅលើជនបរទេសបែបនេះ ជារឿងដ៏កម្រនឹងកើតមានណាស់ក្រៅពីអំពើប្លន់ដោយចេតនាណាមួយ តែករណីនេះ បន្ទាប់ពីបានបាញ់មួយគ្រាប់ដួលហើយនោះ ក្រុមខ្មាន់កាំភ្លើងក៏នាំគ្នាគេចខ្លួនដោយសន្មតថា អ្នកដែលខ្លួនបាញ់នោះស្លាប់ ។ ឆ្លងតាមសកម្មភាពនេះមានការសន្និដ្ឋានមិនផ្លូវការថា អាចជារឿងគំនុំ ព្រោះតែក្រុមខ្មាន់កាំភ្លើងបានព្យាយាមតាមបាញ់មកលើបុរសជនជាតិរុស្ស៊ីរូបនេះ ៕
ចែករំលែកព័តមាននេះ