អូស្ត្រាលីប្រកាសពីតំបន់អភិរក្សផ្នែកសមុទ្រដ៏ធំបំផុតនៅលើពិភពលោក
បញ្ចូលអត្ថបទ ៖ ស្រីណា កោះ
ថ្ងៃសុក្រ ទី១៥ ខែមិថុនា ឆ្នាំ២០១២ ម៉ោង ១៥:០៤
កោះសន្តិភាព
អូស្ត្រាលីប្រកាសពីតំបន់អភិរក្សផ្នែកសមុទ្រដ៏ធំបំផុតនៅលើពិភពលោក
អូស្ត្រាលីបានប្រកាសផែនការ បង្កើតតំបន់អភិរក្សក្នុសមុទ្រដ៏ធំបំផុតនៅលើពិភពលោក ដើម្បីគ្រប់គ្រងសត្វ ដោយការកំណត់កន្លែងនេសាទ និងស្រាវជ្រាវរកប្រេង និងឧស្ម័នធម្ម ជាតិនៅខាងក្រៅឆ្នេរសមុទ្រ ។តំបន់អភិរក្សថ្មីនេះ លាតសន្ធឹងលើក្រឡាផ្ទៃសរុប ៣.១០០.០០០គីឡូម៉ែត្រក្រឡា ឬប្រហែល១ភាគ៣នៃដែនទឹកប្រទេសអូស្ត្រាលី ។
ចំណែកលោក ថូនី ប៊ើក រដ្ឋមន្ត្រីក្រសួងបរិស្ថាន ដែលប្រកាសពីផែនការខាងលើនឹងចូលរួមប្រជុំកំពូលបរិស្ថានពិភពលោក ឬ«រីយ៉ូ+២០» នៅទីក្រុងរីយ៉ូ ដឺហ្សាណេរ៉ូ ប្រទេសប្រេស៊ីល ក្នុងរវាងពីថ្ងៃទី២០-២២ មិថុនាខាងមុខនេះ រួមជាមួយនាយករដ្ឋមន្ត្រីលោកស្រី ជូលីយ៉ា ហ្គីលឡាដ បានថ្លែងថា នេះជាអំឡុងពេលដែលនៅទូទាំងពិភពលោកងាកមកផ្តល់ចំណាប់អារម្មណ៍ដល់ការគ្រប់គ្រងដែនសមុទ្រ ដែលបច្ចុប្បន្នអូស្ត្រាលី ក៏បានឈានទៅមុខ ។
កាលពីឆ្នាំមុន អូស្ត្រាលីបានប្រកាសពីផែនការដើម្បីការពារជីវិតសត្វ ក្នុងសមុទ្រនៅបរិវេណសមុទ្រ ឃ័រ រ៉ូល នៅខាងក្រៅឆ្នេរក្នុងរដ្ឋគ្វីនលែន ដោយមានក្រឡាផ្ទៃប្រហែល១លានគីឡូម៉ែត្រក្រឡា ខណៈពេលក្រឡាផ្ទៃខាងលើមានសត្វមានជីវិតដ៏កម្រ រស់នៅយ៉ាងច្រើន រួមទាំងប្រជុំផ្កាថ្ម ល្អាងក្នុងសមុទ្រ និងថែមទាំងជាកន្លែងដែលនាវាចម្បាំងរបស់អាមេរិកចំនួន៣គ្រឿងលិច កាលពីឆ្នាំ១៩៤២ផងដែរ ។
គួរបញ្ជាក់ថា សាខាតំបន់អភិរក្សផ្នែកសមុទ្រគ្របដណ្តប់លើផ្កាថ្ម «ហ្គ្រេត ប៊ែររីអ័រ» ជាតំបន់បេតិកភណ្ឌពិភពលោកផ្នែកធម្មជាតិរបស់អង្គការ UNESCO ផងដែរ និងធ្វើឱ្យតំបន់អភិរក្ស ផ្នែកសមុទ្ររបស់អូស្ត្រាលីពេលបច្ចុប្បន្នកើនឡើងពី២៧កន្លែងទៅ៦០កន្លែង ។
តំបន់អភិរក្សផ្នែកសមុទ្រដ៏ធំបំផុតនៅលើពិភពលោកក្នុងពេលបច្ចុប្បន្នគឺតំបន់នៅជុំវិញប្រជុំកោះ«ឆាហ្គូស» កណ្តាលមហាសមុទ្រឥណ្ឌា ដែលស្ថិតក្រោមការគ្រប់គ្រងរបស់អង់គ្លេស ដោយមានក្រឡាផ្ទៃដល់ទៅ៥៤៥.០០០គីឡូម៉ែត្រក្រឡា ៕
