សារព័ត៌មានបរទេស កាលពីថ្ងៃទី៩ ឧសភា ផ្សាយឱ្យដឹងថា លោកកាឡូស ស្លុីម មហាសេដ្ឋីលំដាប់ទី១នៅលើពិភពលោក ជនជាតិម៉ិចស៊ិក អាយុ៧២ឆ្នាំ មានគម្រោងទិញភាគហ៊ុនជិត១ភាគ៣ របស់ក្រុមហ៊ុន«រ៉ូយ៉ាល់ ខេភីអិន» (Royal KPN) ជាក្រុមហ៊ុនទូរស័ព្ទដ៏ធំបំផុតក្នុងប្រទេសហូរឡង់ ដោយចាត់ទុកថាជាការបង្ហាញគោលជំហដ៏ច្បាស់លាស់របស់មហាសេដ្ឋីរូបនេះដែលមានតម្រូវការពង្រីកមុខជំនួញរបស់ខ្លួនក្នុងដែនដីដ៏ធំនៅតំបន់អឺរ៉ុប ។
របាយការណ៍បញ្ជាក់ឱ្យដឹងថា ក្រុមហ៊ុន «អាមេរិកម៉ូប៊ីល »ដ៏ធំផ្នែកទូរគមនាគមន៍របស់មិុចស៊ិក ដែលស្ថិតក្រោមការគ្រប់គ្រងរបស់លោកស្ល៊ីម បានដាក់សំណើសុំទិញភាគហ៊ុនជិត១ភាគ៣ ឬប្រហែល២៨% របស់ក្រុមហ៊ុន «រ៉ូយ៉ាល់ខេភីអីន » ជាទឹកប្រាក់ជាង២.៦០០លានអឺរ៉ូ ខណៈពេលមុននេះ លោកស្លុីមមានភាគហ៊ុនក្នុងក្រុមហ៊ុនរ៉ូយ៉ាល់ ខេភីអិន ត្រឹមតែ៥% ប៉ុណ្ណោះ ។
លោកកាឡូសកាស៊ីយ៉ា ម៉ូរ៉េណូ នាយកផ្នែកហិរញ្ញវត្ថុរបស់ក្រុមហ៊ុន«អាមេរិកម៉ូប៊ីល» ឱ្យដឹងថា សំណើទិញភាគហ៊ុនក្រុមហ៊ុន «រ៉ូយ៉ាល់ ខេភីអិន»លើកនេះគឺជាការបង្ហាញគោលជំហរដ៏ច្បាស់លាស់របស់ក្រុមហ៊ុនអាមេរិក ម៉ូប៊ីលដែលត្រូវការលុកលុយក្នុងទីផ្សារទូរគមនាគមន៍នៅអឺរ៉ុបក្រោមការវាយតម្លៃរបស់បណ្តាអ្នកវិភាគដែលសំឡឹងឃើញថាស្ថានភាពបំណុល និងកង្វះសមតុល្យផ្នែកថវិកាដ៏អាក្រក់របស់ក្រុមប្រទេសនៅអឺរ៉ុប ធ្វើឱ្យតម្លៃភាគហ៊ុនរបស់ក្រុមហ៊ុនអឺរ៉ុបធ្លាក់ចុះជាប្រវត្តិសាស្ត្រ និងចាត់ទុកថាជាការផ្តល់ឱកាសដល់បណ្តាអ្នកវិនិយោកពីទ្វីបផ្សេង ចូលទិញភាគហ៊ុនផ្សេងៗ របស់អឺរ៉ុបបានក្នុងតម្លៃទាបធៀបនឹងអំឡុងពេលមុនកើតវិបត្តិបំណុល ៕
ចែករំលែកព័តមាននេះ