ស្ថានីយទូរស្សន៍កូរ៉េខាងត្បូងបានបង្ហាញរូបភាពខ្សែវីដេអូ ដែលថតបានដោយកាម៉េរាការពារសុវត្ថិភាព ឃើញភិក្ខុ៦រូបកំពុងជួបគ្នានៅឯសណ្ឋាគារមួយនាមាត់សមុទ្រឆាន់ស្រា និងបារី ព្រមទាំងលេងបៀ ដោយមានប្រាក់ភ្នាល់ដល់ទៅ១លានវ៉ុន ។ ព្រះភិក្ខុទាំងនេះស្ថិតនៅក្នុងនិកាយ«ហ្ស័រហ្គ» ដោយមានសាសនិកជនដល់ទៅ១០លាននាក់ ស្ថិតនៅលំដាប់ទី៥ ក្នុងប្រទេស ។ សម្តេចសង្ឃបានមានសង្ឃដីកាសុំទោសកាលពីថ្ងៃទី១១ ឧសភា និងធានាថានឹងឱ្យអ្នកបង្កហេតុទទួលទោសកំហុសដោយខ្លួនឯង។
ស្ថានីយទូរទស្សន៍កូរ៉េខាងត្បូងជាច្រើនប៉ុស្តិ៍បានផ្សព្វផ្សាយរូបភាពភិក្ខុមួយក្រុមកំពុងលេងបៀ ខ្លះឆាន់បារី ខ្លះឆាន់ស្រា ក្រោយពីប្រមូលផ្តុំគ្នានៅឯសណ្ឋាគារមួយកន្លែងកាលពីចុងខែមេសា កន្លងមក ដើម្បីចូលរួមក្នុងពិធីកាន់ទុក្ខព្រះសង្ឃមួយអង្គ ។ សម្តេចសង្ឃព្រះនាមសឹងហូ មានសង្ឃដីកាថា ប្រាក់ភ្នាល់របស់ពួកគេ មានច្រើនជាង១លានវ៉ុន ហើយព្រះអង្គបានរាយការណ៍ពីហេតុការណ៍ដែលកើតឡើងទៅតុលាការរួចរាល់ហើយ ។
ការភ្នាល់នៅខាងក្រៅកាស៊ីណូ និងទីលានប្រណាំងសេះ ដែលបានទទួលការអនុញ្ញាត គឺជារឿងខុសច្បាប់នៅកូរ៉េខាងត្បូង និងជារឿងមួយដែលអ្នកដឹកនាំផ្នែកសាសនាទាំងឡាយមិនទទួលស្គាល់ ។ សម្តេចសង្ឃសឹងហូ មានសង្ឃដីកាថា «តាមពុទ្ធឱវាទបញ្ជាក់ថា ហាមលួច ប៉ុន្តែតាមរយៈដែលពួកគេប្រព្រឹត្តហាក់ដូចជាពួកគេកំពុងកឹបកេងប្រាក់ពីពុទ្ធសាសនិកជនទៅលេងល្បែង » ។
គួរបញ្ជាក់ថា ភិក្ខុដែលប្រព្រឹត្តខុសនឹងវិន័យរបស់ខ្លួនដែលជាអ្នកបួស បានទទួលការមិនពេញចិត្តពីសំណាក់ជនជាតិកូរ៉េយ៉ាងច្រើន និងកើតមានការខឹងសម្បាតាមរយៈប្រព័ន្ធអ៊ីនធើរណេត ដោយអ្នកមិនពេញចិត្តមួយចំនួនបានធ្វើការអំពាវនាវឱ្យមានការកែទម្រង់បន្ទាន់មួយចំពោះអ្នកកាន់ពុទ្ធសាសនា ៕
ចែករំលែកព័តមាននេះ