តាមការស្រាវជ្រាវថ្មីចុងក្រោយមួយលើកឡើងថា ទទួលទានសាច់ត្រីក៏ដូចជាអាហារផ្សេងទៀតដែលមានផ្ទុកសារធាតុអាស៊ីដខ្លាញ់អូមេហ្គា៣អាចជួយកាត់បន្ថយការប្រឈមនឹងការកើតជំងឺភ្លេចភ្លាំងបាន ។
អ្នកវិទ្យាសាស្ត្របានពិសោធន៍ឃើញថា សារធាតុខ្លាញ់នោះដែលប្រឆាំងនឹងការរលាកមានសមត្ថភាពកាត់បន្ថយកម្រិតប្រូតេអុីនក្នុងឈាមមួយប្រភេទដែលបង្កទៅជាជំងឺភ្លេចភ្លាំង។
ក្នុងការស្រាវជ្រាវលើកនេះ អ្នកវិទ្យាសាស្ត្រអាមេរិកបានពិសោធន៍លើមនុស្សវ័យ៦៥ឆ្នាំចំនួន១២១៩នាក់។ ជាលទ្ធផលបានបង្ហាញថា កម្រិតប្រូតេអុីនធ្វើឱ្យមនុស្សភ្លេចភ្លាំងឈ្មោះ beta-amyloidនៅក្នុងខួរក្បាលរបស់ពួកគេបានថយចុះគួរឱ្យកត់សម្គាល់នៅពេលមានការប្រើប្រាស់អាហារដែលមានផ្ទុកអាស៊ីដខ្លាញ់អូមេហ្គា៣ច្រើន ។
តាមការពិសោធ បើប្រើប្រាស់អាស៊ីដខ្លាញ់អូមេហ្គា៣ប្រចាំថ្ងៃចំនួន១ក្រាមអាចកាត់បន្ថយ ប្រូតេអុីន beta-amyloidបានពី២០ទៅ៣០ភាគរយ។
អ្នកដឹកនាំការស្រាវជ្រាវវេជ្ជបណ្ឌិត Nikolaos Scarmeasមកពីសាកលវិទ្យាល័យColumbia University Medical Centreនៅទីក្រុងញូវយ៉កសហរដ្ឋអាមេរិកបាននិយាយថា៖«ខណៈវាមិនងាយស្រួលក្នុងការវាស់កម្រិតប្រូតេអុីន beta-amyloidក្នុងខួរក្បាល តែវាងាយស្រួលក្នុងការវាស់កម្រិតរបស់វានៅក្នុងឈាម។ លទ្ធផលនៃការរកឃើញលើកនេះអាចពង្រឹងជាកម្លាំងដល់ជំនឿចិត្តរបស់យើងលើប្រសិទ្ធភាពអាហារប្រចាំថ្ងៃដែលអាចទប់ស្កាត់ជំងឺភ្លេចភ្លាំង»។
ក្នុងការពិសោធ សារធាតុុចិញ្ចឹមផ្សេងទៀតក្រៅពីអាស៊ីដអូមេហ្គា៣មិនជាប់ទាក់ទងគ្នាជាមួយនឹងកម្រិតខុសៗគ្នានៃប្រូតេអ៊ីនbeta-amyloidក្នុងឈាមទេ។ សារធាតុអាស៊ីដខ្លាញ់អូមេហ្គា៣មានច្រើន បំផុតនៅក្នុងត្រីដែលសំបូរខ្លាញ់តួយ៉ាងដូចជា ត្រីសូម៉ុង ត្រីសាឌីនធំ និងត្រីស្បៃកាជាដើម ។ ចំណែកនៅក្នុងពពួកសណ្តែក និងបន្លែមួយចំនួនដូចជា ស្ពៃក្តោបតូច ស្ពៃក្តោបម្យ៉ាង(Kale)ក៏មានដែរ តែក្នុងបរិមានតិចតួច ៕
ចែករំលែកព័តមាននេះ