រាជធានីភ្នំពេញ ៖ យោងតាមសេចក្តីជូនព័ត៌មានរបស់ក្រសួងការបរទេសកាលពីថ្ងៃទី២៦ មីនា ឱ្យដឹងថា ក្នុងនាមជាប្រធានអាស៊ាននៅឆ្នាំ២០១២ ព្រះរាជាណាចក្រកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី២០ និងកិច្ចប្រជុំថ្នាក់រដ្ឋមន្ត្រីពាក់ព័ន្ធផ្សេងទៀត ដែលប្រព្រឹត្តទៅចាប់ពីថ្ងៃទី៣០ មីនា ដល់ថ្ងៃទី៤ មេសា ឆ្នាំ២០១២ នៅរាជធានីភ្នំពេញ ។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងធ្វើជាប្រធាននៃកិច្ចប្រជុំកំពូលអាស៊ានលើកទី២០នេះ ។
សេចក្តីប្រកាសបានបន្តថា ក្នុងអំឡុងពេលកិច្ចប្រជុំកំពូលអាស៊ានលើកទី២០នេះ ប្រមុខដឹកនាំអាស៊ានទាំងអស់រំពឹងថានឹងត្រូវអនុម័តលើឯកសារ៣គឺ ៖
១-សេចក្តីថ្លែងការណ៍នៅភ្នំពេញ ស្តីពីអាស៊ាន សហគមន៍តែមួយ-វាសនាតែមួយ ។
២-សេចក្តីថ្លែងការណ៍របស់ប្រមុខដឹកនាំប្រទេសអាស៊ាន ស្តីពីតំបន់អាស៊ានគ្មានគ្រឿងញៀនឆ្នាំ២០១៥ ។
៣-ឯកសារទស្សនាទាន ស្តីពីចលនាសកលនិយមកណ្តាល ។
ជាមួយគ្នានេះដើម្បីអបអរសាទរខួបលើកទី៤៥របស់អាស៊ាន ប្រមុខដឹកនាំប្រទេសអាស៊ានទាំងអស់ នឹងចេញនូវ«សេចក្តីថ្លែងការណ៍របស់ប្រធានស្តីពីខួបលើកទី៤៥របស់អាស៊ាន ដំណើរឆ្ពោះទៅមុខ» ។
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងធ្វើជាប្រធានអាស៊ានក្នុងកិច្ចប្រជុំថ្នាក់រដ្ឋមន្ត្រីពាក់ព័ន្ធផ្សេងទៀត រួមមាន ៖
១-កិច្ចប្រជុំរដ្ឋមន្ត្រីការបរទេសអាស៊ាន ។
២-កិច្ចប្រជុំរដ្ឋមន្ត្រីការបរទេសអាស៊ាន ជាមួយនឹងគណៈកម្មការអន្តររដ្ឋាភិបាលអាស៊ាន ស្តីពីសិទ្ធិមនុស្ស ។
៣-កិច្ចប្រជុំគណៈកម្មការតំបន់អាសីុអាគ្នេយ៍គ្មានអាវុធនុយក្លែអ៊ែរ ។
៤-កិច្ចប្រជុំលើកទី៧ក្រុមប្រឹក្សានយោបាយ-សន្តិសុខអាស៊ាន ។
៥-កិច្ចប្រជុំលើកទី១០ ក្រុមប្រឹក្សាសម្របសម្រួលអាស៊ាន ។
ស្របពេលជាមួយគ្នានេះ រដ្ឋមន្ត្រីការបរទេសអាស៊ាន នឹងចុះហត្ថលេខាលើឯកសារមួយចំនួនដូចខាងក្រោម ៖
-សេចក្តីប្រកាសអាស៊ានលើពិធីសារ ស្តីពីសន្ធិសញ្ញាតំបន់អាស៊ីអាគ្នេយ៍គ្មានអាវុធនុយក្លេអ៊ែរ ។
-លិខិតូបករណ៍នៃការដាក់បញ្ចូលនូវវិធានមួយចំនួនផ្អែកលើការមិនអនុវត្តតាមទៅនឹងកិច្ចប្រជុំកំពូលអាស៊ាន ចំពោះពិធីសារធម្មនុញ្ញអាស៊ានស្តីពីយន្តការដំណោះស្រាយជម្លោះ ។
លោកទេសរដ្ឋមន្ត្រី ចម ប្រសិទ្ធ នឹងធ្វើជាប្រធានកិច្ចប្រជុំលើកទី៧ ក្រុមប្រឹក្សាសហគមន៍សេដ្ឋកិច្ចអាស៊ាន និងលោកទេសរដ្ឋមន្ត្រី ស៊ុន ចាន់ថុល អនុប្រធានអចិន្ត្រៃយ៍ ក្រុមប្រឹក្សាអភិវឌ្ឍន៍កម្ពុជា នឹងធ្វើជាប្រធានក្នុងកិច្ចប្រជុំលើកទី៧ ក្រុមប្រឹក្សាសហគមន៍សង្គម-វប្បធម៌អាស៊ាន ៕
ចែករំលែកព័តមាននេះ