ស្ថាប័នស្រាវជ្រាវសន្តិភាពអន្តរជាតិប្រចាំទីក្រុងស្តុកខូល ប្រទេសស៊ុយអែត (SIPRI) បានបង្ហាញលទ្ធផលអង្កេតលើទីផ្សារជួញដូរអាវុធនៅទូទាំងពិភពលោក កាលពីថ្ងៃទី១៨ មីនា បញ្ជាក់ថា សិង្ហបុរីជាប្រទេសមួយក្នុងភូមិភាគអាស៊ីអាគ្នេយ៍ ដែលមានអត្រាជំនួញអាវុធដ៏ខ្ពស់នៅលើពិភពលោក ដោយមានចំណូលរហូតដល់ជាង ៥.៩៩០ លានដុល្លារ កាលពីឆ្នាំ២០១១ ។ អាវុធទាំងអស់ផលិតដោយក្រុមជំនួញ ក្នុងសាខា «អេស ធី អ៊ីនជីនៀរីង អ៊ីនដាស្រ្ទីល» ដែលមានក្រុមហ៊ុន «ថេម៉ាសេត ហូលឌីង» របស់រដ្ឋាភិបាលសិង្ហបុរី ជាអ្នកកាន់ភាគហ៊ុនធំ ។
តាមរបាយការណ៍របស់ SIPRI ឱ្យដឹងថា ក្នុងឆ្នាំ២០១១កន្លងមក សិង្ហបុរីបានលក់រថពាសដែកដល់កងទ័ពអង់គ្លេស ប្រចាំការនៅអាហ្វហ្គានីស្ថាន ព្រមទាំងលក់គ្រឿងសព្វាវុធនានា ដល់ប្រទេសឥណ្ឌូណេស៊ី ហ្វ៊ីលីពីន អេមីរ៉ាតអារ៉ាប់ រួម ប្រេស៊ីល នីហ្សេរីយ៉ា និងសាធារណរដ្ឋឆាដ និងកំពុងធ្វើការពិចារណាលើកិច្ចសន្យាលក់អាវុធឱ្យរដ្ឋាភិបាលអុីស្រាអែល និងម៉ាឡេស៊ីថែមទៀត ។
ទោះជាយ៉ាងណាក៏ដោយ ក្រសួងមហាផ្ទៃរបស់ឥណ្ឌា ទើបធ្វើការចោទប្រកាន់អ្នកគ្រប់គ្រងក្រុមហ៊ុន «អេសធី ឃីណាទិក» ជាសាខារបស់ក្រុមហ៊ុន «អេស ធី អុីនជីនៀរីង អ៊ីនដាស្រ្ទីល» កាលពីខែកុម្ភៈ កន្លងមក ក្រោយពីពិនិត្យឃើញថា មានពាក់ព័ន្ធនឹងសំណូកជាមួយមន្ត្រីរដ្ឋាភិបាលឥណ្ឌា ស្តីពីការធ្វើកិច្ចសន្យាពាណិជ្ជកម្ម ក្នុងឆ្នាំ២០០៩ ប៉ុន្តែក្រុមហ៊ុន អេស ធី អ៊ីនជីនៀរីង អ៊ីនដាស្រ្ទីល បដិសេធ ៕
ចែករំលែកព័តមាននេះ