ក្រុងប៉ោយប៉ែត ៖ បុណ្យចូលឆ្នាំថ្មីប្រពៃណីជាតិទាំងខ្មែរ ទាំងសៀមគឺមហាសង្ក្រាន្តចូលមកដល់ស្របពេលដំណាលគ្នា។ នៅក្រុងប៉ោយប៉ែតគេសង្កេតឃើញអ្នកស្រុកខ្លះមិនថា ចាស់ ឬក្មេងនោះទេ ពួកគេបាននាំគ្នាសំរុកទៅលេងនៅលើទឹកដីសៀម គឺវត្តគោកស្បែងដែលមានទីតាំងជាប់នឹងអូរព្រំដែនក្នុងភូមិគោកស្បែង ស្រុកអារញ្ញ ខេត្តស្រះកែវនៅទល់មុខនឹងភូមិខ្មែរ គឺភូមិគីឡូម៉ែត្រលេខ៤ សង្កាត់ប៉ោយប៉ែត ដោយឆ្លងកាត់តាមច្រករបៀងដែលគេធ្វើស្ពានឈើឱ្យឆ្លងយកលុយ។
វត្តសៀមដែលស្ថិតក្បែរមាត់អូរព្រំដែននោះមុនការឆ្លងទៅដល់ត្រូវភាគីខាងខ្មែរយកលុយថ្លៃឆ្លងចំនួន១.៥០០រៀល ។ ឯជនជាតិសៀមតម្រូវយក២០បាត។ វត្តសៀមនោះមើលទៅគ្មានអ្វីគួរឱ្យអស្ចារ្យនោះទេ ប៉ុន្តែបែរជាប្រជាជនខ្មែរខ្លះសំរុកឆ្លងទៅហូរហែ ព្រោះតែចង់នាំគ្នាទៅមើលស្រីសៀមសិចស៊ីរាំគ្រវីចង្កេះបង្អួតសាច់សខ្ចីខុសវិន័យក្នុងទីអារាមដែលជាកន្លែងសក្ការបូជា។ ចំណែកឯវត្តខ្មែរមានតែវត្តជិនវ័ន្តសីមារាមហៅវត្តម៉ុងចិនស្ថិតក្នុងភូមិគីឡូម៉ែត្រលេខ៤មួយប៉ុណ្ណោះដែលមានមនុស្សច្រើនកុះករ មិនថាយប់ ឬថ្ងៃ ក្រៅពីនោះស្ទើរតែគ្រប់វត្តគ្មានកម្លោះក្រមុំ ឬមនុស្សចាស់ៗនៅទេ បែរជានាំគ្នាទៅលេងវត្តគោកស្បែងសៀមអស់ទៅវិញ។ វត្តអណ្តូងថ្មមាសស្ថិតក្នុងភូមិអណ្តូងថ្មមាស និងវត្តសិរីមង្គលសទ្ធារាមហៅវត្តស្ទឹងបត់ គេឃើញមានក្មេងៗនៅរាំលេងធុងបាស់ក្នុងវត្តនីមួយៗត្រឹមតែ៥ទៅ៦នាក់ក្រោមការណែនាំពីសំណាក់តាអាចារ្យ និងព្រះសង្ឃ។
តាអាចារ្យនៅវត្តស្ទឹងបត់បានប្រាប់ថា ភាពស្ងាត់ជ្រងំក្នុងវត្តនាពេលថ្ងៃនោះ ព្រោះតែប្រជាជននាំគ្នាឆ្លងទៅលេងវត្តគោកស្បែងក្នុងទឹកដីសៀម។ បើពេលយប់ គឺមានមនុស្សចេញចូលលេងធម្មតា និងម៉ោងយកចង្ហាន់មកប្រគេនព្រះសង្ឃ។ ចំណែកឯវត្តផ្សេងៗក៏ដូចគ្នាដែរ គឺមនុស្សម្នាតាមភូមិនាំគ្នីគ្នាជិះម៉ូតូកង់បី ឬម៉ូតូឌុប ព្រមទាំងរថយន្តសំរុកទៅច្រករបៀងខាងលើឆ្លងទៅទឹកដីសៀមយ៉ាងពពាក់ពពូន ព្រោះតែចង់ទៅមើលស្រីសៀមរាំសិចស៊ីប៉ុណ្ណោះ។
អ្នកស្រុកនិយាយថា ការឆ្លងទៅលេងវត្តគោកស្បែងលើទឹកដីសៀមវាជាទម្លាប់រៀងរាល់ឆ្នាំពុំដែលខានទេ ។ ប៉ុន្តែឆ្នាំមុនៗមិនដូចឆ្នាំនេះទេ ហើយតាមវត្តក៏មិនស្ងាត់ជ្រងំដូចឆ្នាំនេះដែរ ។ ឆ្នាំមុនៗតាមវត្តមានមនុស្សម្នាជាច្រើននាំគ្នាលេងតាមវត្ត ហើយការឆ្លងទៅលេងនៅទឹកដីសៀមក៏មានមិនច្រើនដូចឆ្នាំនេះដែរ ព្រោះខ្មែរខ្លះនោះចង់ឃើញស្រីសៀមរាំរមួលចង្កេះដែលមើលទៅគួរឱ្យព្រឺខ្លួន និងមានសាច់ដុំភ្នែក។
ក្នុងវត្តគោកស្បែងសៀមនោះ គឺគ្មានអ្វីអស្ចារ្យនោះទេ គឺមានតែទៅមើលការរាំសិចស៊ី និងការរាំធុងបាស់ដូចវត្តខ្មែរដែរ។ ខណៈវត្តខ្មែរមួយចំនួនបែរជាស្ងាត់ជ្រងំនោះក៏មានសំណួរថា តើមានអ្វីអស្ចារ្យទៅវត្តគោកស្បែងទឹកដីសៀមនោះ? ខ្មែរគួរតែនៅលេងវត្តខ្មែរខ្លួនឯង មិនគួរទៅលេងវត្តសៀមទុកឱ្យវត្តខ្មែរស្ងាត់ជ្រងំបែបនេះទេ ៕
ចែករំលែកព័តមាននេះ