យន្តហោះរបស់ក្រុមតារាចំរៀងកូរ៉េត្រូវរន្ទះបាញ់មិនផ្ទុះ
ដោយ ៖ សាម៉ន
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១០:១៨
គេហទំព័របរទេស
ក្រុមតារាចំរៀងកូរ៉េ Girls Generation ពេលទៅដល់ព្រលានយន្តហោះទីក្រុង Los Angeles
ក្នុងពេលធ្វើដំណើរទៅផ្សព្វផ្សាយអាល់ប៊ុមចំរៀងរបស់ខ្លួននៅប្រទេសជប៉ុន ក្រុមតារាចំរៀងកូរ៉េ SNSD បានជួបឧប្បត្តិហេតុរន្ទះបាញ់យន្តហោះពេលធ្វើដំណើរតាមផ្លូវ។ ក្នុងពេលសម្ភាសន៍ជាមួយពួកគេលើយន្តហោះក្នុងដំណើរមួយផ្សេងទៀតទៅកាន់សហរដ្ឋអាមេរិក ក្រុមនេះបាននិយាយថា យើងបានស្គាល់រសជាតិអ្វីដែលគួរឱ្យខ្លាច ហើយកាលពីខែមុនក្នុងពេលធ្វើដំណើរទៅប្រទេសជប៉ុនគឺយន្តហោះត្រូវរន្ទះបាញ់ចំពាក់កណ្តាលតួ។ វាពិតជាក់ស្តែងខ្លាំងណាស់ដោយយើងអាចមើលឃើញពីកន្លែងអង្គុយ តែជាភ័ព្វសំណាងដែលគ្មានគ្រោះថ្នាក់ដោយនាំគ្នាគិតថា វាជាប្រផ្នូលនៃជោគជ័យទៅវិញ។ បើទោះជាក្នុងដំណើរ៤ថ្ងៃដែលត្រូវថតវីដេអូតន្ត្រីក្នុងប្រទេសជប៉ុននេះ យន្តហោះត្រូវរន្ទះបាញ់តែវាជាប្រផ្នូលនៃការអបអរសាទរចំពោះការងារថតវីដេអូរបស់ពួកគេ។ ខ្ញុំគិតថាយើងកំពុងធ្វើរឿងអ្វីម៉្យាងសំខាន់។ ឧបសគ្គមួយដែលតែងតែជួបប្រទះក្នុងវិស័យឧស្សាហកម្មតន្ត្រីដូចជាការដាច់ភ្លើងក្នុងពេលកំពុងថតខ្សែវីដេអូ គឺមានន័យថា ជាសញ្ញានៃភាពជោគជ័យ។
សមាជិកក្រុមនាង Sooyoung បានសើចពេលនិយាយថា «ខ្ញុំដឹងថា យើងធ្វើយ៉ាងល្អពេលនៅប្រទេសជប៉ុនដោយសារមានរន្ទះបាញ់។ វាមិនមែនជាប្រផ្នូលទីមួយដែលយើងធ្លាប់ជួបនោះទេ។ ដូចជាកាលពីថ្ងៃទី២៥ សីហា ក៏មានរឿងហេតុមួយកើតឡើងដែរ គឺមានអគ្គីភ័យកើតឡើង បន្ទាប់ពីការរង់ចាំរបស់គេនៅលើឆាក។ នាង Yuri សមាជិកាក្រុមម្នាក់ទៀតបានញញឹមយ៉ាងស្រស់ ហើយនិយាយថា យើងគិតថារឿងទាំងនេះវាជាសញ្ញានៃភាពជោគជ័យនាពេលអនាគត។ ដូចជាពេលគេថតវីដេអូបទ Oh! ក៏មានភ្លើងឆេះនៅចំពាក់កណ្តាលនៃការថត ហើយក្រោយមកវាបានក្លាយជាបទដែលទទួលបានការគាំទ្រយ៉ាងខ្លាំង។ ពួកគេនឹងចេញលក់អាល់ប៊ុមជាភាសាជប៉ុនរបស់គេនៅថ្ងៃទី៨ កញ្ញា ។ ពេលនេះពួកគេបានទៅដល់ព្រលានយន្តហោះនៃទីក្រុង Los Angeles ហើយក្នុងដំណើរនេះពួកគេនឹងសំដែងរយៈពេល៤ថ្ងៃដែលរៀបចំដោយ SM World Tour នៅមជ្ឈមណ្ឌល Staple ដោយពួកគេនឹងសំដែងរួមគ្នាក្នុងឆាកតែមួយជាមួយនឹងសិល្បករកូរ៉េផ្សេងទៀតដូចជា Kang Ta, SHINee, F(x) និងតារាផ្សេងៗទៀត។
ជាមួយគ្នានេះ ក្រុមចំរៀងកូរ៉េ 4minute បានក្លាយជាអ្នកបង្ហាញម៉ូដឱ្យស្បែកជើង Shoes Marker ។ ការក្លាយជាតារាពាណិជ្ជកម្មរបស់ពួកគេក៏បានបញ្ចប់ការថតវីដេអូពាណិជ្ជកម្មផ្សាយរបស់ពួកគេផងដែរ។ វីដេអូផ្សាយពាណិជ្ជកម្មនេះនឹងចេញផ្សាយតាមកញ្ចក់ទូរទស្សន៍នៅពាក់កណ្តាលខែកញ្ញាជាមួយនឹងការដាក់លក់ស្បែកជើងជាមួយគ្នាផងនៅស្តង់របស់ក្រុមហ៊ុន។ ក្នុងវីដេអូនេះក្រុម 4minute តំរូវឱ្យមានការធ្វើដំណើរជាច្រើនកន្លែងក្នុងទីក្រុងសេអ៊ូលដល់ទីក្រុង MooAhn រហូតដល់ថ្ងៃលិច តែពួកគេគ្មានការត្អូញត្អែរទេ ថែមទាំងញញឹម និងរាំជាមួយបុគ្គលិកក្រុមហ៊ុនដែលនឿយហត់ក្នុងការងារបង្កើតឱ្យមានបរិយាកាសសប្បាយរីករាយ និងអបអរចំពោះការងារនេះផងដែរ។ អ្នកតំណាងក្រុមបាននិយាយថា ក្រុម 4minute ជាក្រុមដំបូងតាំងពីពួកគេល្បីក្នុងវិស័យសិល្បៈដែលក្រុមហ៊ុន Shoes Marker សហការបានល្អ និងបានពន្យារពេលនៃកិច្ចសន្យារបស់ពួកគេផងដែរ។ នេះជាឱកាសថ្មីមួយទៀតក្នុងការបង្ហាញផលិតផលថ្មីរបស់ក្រុមហ៊ុន ៕
