ខេត្តបាត់ដំបង ៖ អាជីវករលក់មាស និងដូរលុយនៅក្នុងផ្សារណាត់ម្នាក់ ត្រូវក្រុមចោរហារយប្រដាប់ដោយកាំភ្លើងខ្លីតាមស្ទាក់បា.ញ់ចំនួន៣គ្រាប់ប្លន់យកគ្រឿងអលង្ការចម្រុះអស់៤កេស…
ខេត្តបាត់ដំបង ៖ អាជីវករលក់មាស និងដូរលុយនៅក្នុងផ្សារណាត់ម្នាក់ ត្រូវក្រុមចោរហារយប្រដាប់ដោយកាំភ្លើងខ្លីតាមស្ទាក់បាញ់ចំនួន៣គ្រាប់ប្លន់យកគ្រឿងអលង្ការចម្រុះអស់៤កេស និងលុយ២កាបូប រូចនាំគ្នាជិះម៉ូតូគេចខ្លួនដោយសុវត្ថិភាព កាលពីវេលាម៉ោង៥ និង២០នាទីល្ងាច ថ្ងៃទី១២ ធ្នូ ២០១៥ ខណៈដែលជនរងគ្រោះបើករថយន្តដឹកមាសប្រាក់ទាំងនោះចេញពីផ្សារទៅដល់ខាងមុខផ្ទះ ស្ថិតក្នុងភូមិអូរតាគាំ២ សង្កាត់ទូលតាឯក ក្រុងបាត់ដំបង ។ ប៉ុន្តែក្រោយពីការតាមប្រមាញ់អស់ពេលជាច្រើនម៉ោង កម្លាំងសមត្ថកិច្ចឃាត់ខ្លួនជនសង្ស័យបាន២នាក់ដែលពាក់ព័ន្ធក្នុងអំពើប្លន់ដ៏ព្រហើននេះ ថែមទាំងរកឃើញវត្ថុតាងមួយចំនួនផង ។
លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត បានឲ្យដឹងថា ជនសង្ស័យម្នាក់ឈ្មោះ យ៉ាន់ ផា អាយុ៥៤ឆ្នាំនៅភូមិស្ដៅអែម ឃុំចំបក់ ស្រុកបាទី ខេត្តតាកែវ ត្រូវកម្លាំងកងរាជអាវុធហត្ថចាប់ខ្លួនបានកាលពីរំលងអធ្រាត្រឈានចូលថ្ងៃទី១៣ ធ្នូ នៅក្នុងឃុំកកោះ ស្រុកម៉ោងឫស្សី រីឯជនសង្ស័យម្នាក់ទៀតឈ្មោះ នៅ រស់ មានស្រុកកំណើតនៅខេត្តកោះកុង ត្រូវកម្លាំងនគរបាលចាប់ខ្លួនបានកាលពីវេលាម៉ោង១០ និង២០នាទីព្រឹកថ្ងៃដដែល ពេលពួកគេព្យាយាមរត់គេចខ្លួន ។
លោកបានបន្តថា ក្រុមចោរកាំភ្លើងខ្លីទាំងនេះមានបក្ខពួកចំនួន៥នាក់ ប្រើប្រាស់កាំភ្លើងខ្លី២ដើម ជិះម៉ូតូ៣គ្រឿង បានតាមស្ទាក់បាញ់ប្លន់អាជីវករលក់មាស និងដូរលុយនៅផ្សារណាត់ ពេលបើករថយន្តដឹកគ្រឿងអលង្ការទាំងនោះមកដល់ខាងមុខផ្ទះ រួចចុះពីរថយន្តបម្រុងទៅបើកទ្វារបង ។
ជនរងគ្រោះដោយអំពើប្លន់នេះឈ្មោះ ហេង ជីឃាង ភេទប្រុស អាយុ៣៥ឆ្នាំ ជាអាជីវករលក់មាស និងដូរលុយនៅផ្សារណាត់ ក្រុងបាត់ដំបង និងរស់នៅក្នុងភូមិខាងលើ បាននិយាយប្រាប់បន្ទាប់ពីកើតហេតុថា គាត់មិនបានដឹងថា មានមនុស្សជិះម៉ូតូតាមពីក្រោយរថយន្តលោកទេ លុះមកដល់មុខផ្ទះពេលលោកចុះពីរថយន្តបម្រុងទៅបើកទ្វារបង ក៏ត្រូវក្រុមចោរស្ទុះមកភ្ជង់តែម្ដង ។ គាត់និយាយទៀតថា ក្រុមចោរមានគ្នាប្រហែល៦នាក់ជិះម៉ូតូ៣គ្រឿង ។ ពួកវាមួយចំនួនចុះធ្វើសកម្មភាពប្លន់ តែមួយចំនួនអង្គុយលើម៉ូតូចាំការពារគ្នាវា ។
លោក ហេង ជីឃាង បានប្រាប់ថា ក្រុមចោរទាំងនោះសុទ្ធតែបិតម៉ាស់មុខ បានដកកាំភ្លើងខ្លីបាញ់ដីគំរាមចំនួន៣គ្រាប់ និងវាយប្រពន្ធគាត់ដណ្ដើមយកកាបូប និងខ្លះដណ្ដើមយកកេសដាក់គ្រឿងអលង្ការ តែមិនបណ្ដាលឲ្យរងរបួសទេ ។ លោក ជីឃាង បានបញ្ជាក់ប្រាប់ដំបូងថា ក្រុមចោរបានប្លន់យកគ្រឿងអលង្ការចម្រុះអស់៤កេសដែក កាបូបស្ពាយដាក់លុយចំនួន២ និងនាឡិការខ្សែប្លាទិន១គ្រឿង ។ ប៉ុន្តែនៅព្រឹកថ្ងៃទី១៣ ធ្នូ ក្រោយពីសមត្ថកិច្ចសួរបញ្ជាក់អំពីការបាត់បង់ទ្រព្យពិតប្រាកដ ជនរងគ្រោះរូបនេះបានឲ្យដឹងថា ទ្រព្យសម្បត្តិដែលបាត់បង់រួមមាន ប្រាក់ខ្មែរ៨លានរៀល ប្រាក់ដុល្លារ៩០០ដុល្លារ ប្រាក់ថៃ៤០០០បាត រីឯគ្រឿងអលង្ការទាំង៤កេសនោះគិតជាទឹកប្រាក់ប្រហែលជាង១០ម៉ឺនដុល្លារ ។
ជុំវិញករណីក្រុមចោរហារយប្រដាប់ដោយកាំភ្លើងខ្លីជាច្រើនដើមថ្លើមធំហ៊ានតាមស្ទាក់បាញ់ប្លន់អាជីវករលក់មាសដល់ផ្ទះនៅកណ្ដាលក្រុងបាត់ដំបងនេះ ត្រូវគេមើលឃើញថា ក្រុមចោរហាក់បង្ហាញពីសកម្មភាពដ៏ព្រហើនថែមទាំងផ្គើននឹងកម្លាំងសមត្ថកិច្ចបំផុត ព្រោះទីតាំងដែលប្លន់ស្ថិតនៅខាងត្បូងអធិការដ្ឋាននគរបាលក្រុងបាត់ដំបងប្រហែលជាង២០០ម៉ែត្រប៉ុណ្ណោះ ។
កម្លាំងសមត្ថកិច្ចក្រុង និងខេត្តបានចុះទៅដល់កន្លែងកើតហេតុភ្លាមៗដែរ ខណៈប្រជាពលរដ្ឋកំពុងផ្អើលឆោឡោ ។ នៅក្នុងស្ថានភាពកំពុងជ្រូលច្របល់ គេឃើញកម្លាំងសមត្ថកិច្ចបានឈានដល់ការឡោមព័ទ្ធទីតាំងជាច្រើនកន្លែងដែលគេសង្ស័យថាក្រុមជនសង្ស័យកំពុងសម្ងំលាក់ខ្លួននៅទីនោះ ដូចជាសណ្ឋាគារ «ឡេងសេងណា» នៅក្បែរផ្សារលើ, នៅផ្ទះសំណាក់«៩៩៩» និងផ្ទះល្វែងមួយកន្លែងទៀតនៅក្បែរផ្សារណាត់ ។
ជាមួយនឹងការឡោមព័ទ្ធនេះ សមត្ថកិច្ចបានឃាត់ខ្លួនមនុស្ស៤នាក់ជាបន្តបន្ទាប់ ក្នុងនោះកម្លាំងនគរបាលក្រុងបាត់ដំបង ឃាត់ខ្លួនចំនួន៣នាក់មានស្ត្រីម្នាក់ផងនៅក្នុងសណ្ធាគារ«ឡេងសេងណា» រីឯបុរសម្នាក់ទៀតត្រូវកម្លាំងស្នងការខេត្តឃាត់បាននៅតាមផ្លូវ ។ ប៉ុន្តែនៅព្រឹកថ្ងៃទី១៣ធ្នូ សមត្ថកិច្ចបានអះអាងថា ជនសង្ស័យទាំងនោះទំនងមិនជាប់ពាក់ព័ទ្ធក្នុងអំពើប្លន់អាជីវករលក់មាសទេ ប៉ុន្តែអាចជាប់ពាក់ព័ន្ធក្នុងករណីចែកចាយគ្រឿងញៀន ជាពិសេសជនសង្ស័យ៣នាក់ដែលឃាត់ខ្លួននៅក្នុងសណ្ធាគារ«ឡេងសេងណា» ថែមទាំងរកឃើញថ្នាំញៀនមួយចំនួនផងជាវត្ថុតាង ។
លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត បានមានប្រសាសន៍អំពីករណីប្លន់នេះថា គិតត្រឹមម៉ោង១២ថ្ងៃត្រង់ថ្ងៃទី១៣ធ្នូនេះ ទាំងកម្លាំងនគរបាល ទាំងកម្លាំងកងរាជអាវុធហត្ថ ឃាត់ខ្លួនជនសង្ស័យបានចំនួន២នាក់ហើយ ដែលជនសង្ស័យអះអាងថា ក្រុមពួកគេមានចំនួន៥នាក់ ជិះម៉ូតូ៣គ្រឿង និងមានកាំភ្លើងខ្លីចំនួន២ដើម ពេលធ្វើសកម្មភាព ។ លោកស្នងការរងបានថ្លែងថា ជនសង្ស័យបានសារភាពថាពិតជាបានធ្វើសកម្មភាពប្លន់អាជីវករលក់មាសខាងលើនេះមែន ថែមទាំងរកឃើញវត្ថុតាងមួយចំនួនដែលពាក់ព័ន្ធទៀតផង ។ លោកបញ្ជាក់ថា ពេលនេះក្រុមចោរ៣នាក់ទៀតកំពុងគេចខ្លួន តែកម្លាំងសមត្ថកិច្ចគ្រប់ស្ថាប័នទាំងនៅក្នុងក្រុង និងនៅតាមបណ្ដាស្រុកនានាផងកំពុងប្រឹងប្រែងសហការប្រទាក់ក្រឡាគ្នា ដាក់ពង្រាយនៅតាមគោលដៅនានា ដើម្បីតាមប្រមាញ់ក្រុមជនសង្ស័យ ។
សូមបញ្ជាក់ថា ក្រុមចោរប្លន់ប្រដាប់អាវុធហាក់កំពុងបង្កើនសកម្មភាពយ៉ាងគគ្លើនបំផុតនៅក្នុងខេត្តបាត់ដំបងក្នុងរយៈពេលចុងក្រោយនេះ ដែលធ្វើឲ្យប្រជាពលរដ្ធមានការព្រួយបារម្ភយ៉ាងខ្លាំងអំពីសុវត្ថិភាព ។ ជាពិសេសក្នុងករណីប្លន់អាជីវករចំកណ្ដាលក្រុងបាត់ដំបងទាំងថ្ងៃខាងលើនេះតែម្ដង ។ បើតាមរបាយការណ៍គិតចាប់ពីថ្ងៃទី០៥ដល់ថ្ងៃទី១២ធ្នូ២០១៥នេះ ករណីប្លន់ប្រដាប់អាវុធបានកើតឡើងចំនួន៣លើកផ្ទូនៗ ដែលជាបន្ទុកដ៏ធ្ងន់ធ្ងររបស់សមត្ថកិច្ចត្រូវធ្វើការដោះស្រាយ នេះមិនទាន់គិតដល់អំពើប្លន់ដែលបានកើតឡើងចាប់តាំងពីខែមករាដើមឆ្នាំ២០១៥កន្លងមកផង ៕
ចែករំលែកព័តមាននេះ