រាជធានីភ្នំពេញ ៖ ចោរប្លន់ប្រដាប់អាវុធបាញ់មួយគ្រាប់គំរាម និងវាយជនរងគ្រោះបែកក្បាល់ប្លន់យកម៉ូតូស្តូពីមួយគ្រឿងបានសម្រេច ហើយគេចខ្លួនដោយសុវត្ថិភាព កាលពីវេលាម៉ោង១២ និង១០នាទីយប់ឈានចូលថ្ងៃទី៣០ វិច្ឆិកា ២០១៥ នៅចំណុចផ្លូវបេតុងក្រោយធនាគារអេស៊ីលីដា ស្ថិតក្នុងភូមិត្នោតជ្រុំទី២ សង្កាត់បឹងទំពុន ខណ្ឌមានជ័យ ។
យុវជនរងគ្រោះ៣នាក់ ប្រុសពីរនាក់ ស្រីម្នាក់ ដែលជួបហេតុការណ៍អំពើប្លន់ខាងលើនេះសុំមិនបញ្ចេញឈ្មោះបាននិយាយថា មុនពេលកើតហេតុ ពួកគេបានជិះម៉ូតូមួយគ្រឿងម៉ាក ស្តូពី ពណ៌ស ពាកស្លាកលេខ ភ្នំពេញ 1CL- 6062 ដោយជិះឌុបគ្នាចេញពីលំនៅឋានរបស់គេឆ្ពោះទៅម្តុំពេទ្យលោកសង្ឍ ដើម្បីទៅរកទិញថ្នាំព្យាបាល ព្រោះគេមិនស្រួលខ្លួន លុះពេលពួកគេជិះត្រលប់មកផ្ទះវិញដល់ចំណុចកើតហេតុខាងលើ ស្រាប់តែមានក្រុមចោរប្លន់ប្រដាប់អាវុធ២នាក់ស្លៀកពាក់ស៊ីវិល ជិះម៉ូតូម៉ាកស្តូពី ពណ៌ស មិនចាំស្លាកលេខបានតាមកៀរឱ្យឈប់ ហើយសំឡុតប្លន់យកម៉ូតូ។
ប៉ុន្តែពេលនោះមិនបានឱ្យម៉ូតូទៅក្រុមចោរតាមសម្រួលទេ ទើបកើតមានការប្រទូស្តរាយគ្នាឡើង ជាហេតុធ្វើឱ្យក្រុមចោរប្លន់ដែលមានអាវុធជាប់ដៃនោះស្ទុះទៅវាយក្បាលយុវជនម្នាក់បណ្តាលឱ្យបែកក្បាលហូរឈាម ។
មិនត្រឹមតែប៉ុណ្ណោះក្រុមចោរក៏បានដកកាំភ្លើងបាញ់គំរាមចំនួន១គ្រាប់ឡើងលើ ធ្វើឱ្យពួកគេ(ជនរងគ្រោះ) ភ័យពេកក៏ព្រមប្រគល់ម៉ូតូឱ្យទៅក្រុមចោរនោះជិះចេញទៅបាត់ស្រមោលតែម្តង ។ បន្ទាប់ពីកើតហេតុជនរងគ្រោះបានខលទៅវិទ្យុ ABC ដើម្បីសុំឱ្យសមត្ថកិច្ចចុះមកអន្តរាគមន៍នៅកន្លែងកើតហេតុ ។
ភ្លាមៗនោះសមត្ថកិច្ចបានដឹកជនរងគ្រោះទៅប៉ុស្លិ៍នគរបាលបឹងទំពុន ដើម្បីដាក់ពាក្យបណ្តឹងងាយស្រួលសមត្ថកិច្ចកំណត់មុខសញ្ញាជនសង្ស័យ៕
ចែករំលែកព័តមាននេះ