ខេត្តសៀមរាប ៖ ក្រុមប្រជាពលរដ្ឋប្រមាណជាង៥០នាក់មកពីភូមិពាក់ស្នែងថ្មី ឃុំពាក់ស្នែង ស្រុកអង្គរធំ កាលពីព្រឹកថ្ងៃទី៨ តុលា ២០១៥នេះ បានលើកគ្នាមកតវ៉ាទាមទារឲ្យលោកអភិបាលខេត្តជួយអន្តរាគមន៍ដោះលែងស្ត្រីម្នាក់ ដែលត្រូវបានឃាត់ខ្លួនពីករណីកាប់រានដីព្រៃរបស់រដ្ឋកាលពីថ្ងៃទី៦ តុលា ២០១៥ នៅចំណុចភូមិឆ្កែកូន ឃុំពាក់ស្នែង ស្រុកអង្គរធំ ។
ស្ត្រីដែលត្រូវបានសមត្ថកិច្ចឃាត់ខ្លួន ហើយត្រូវបានពលរដ្ឋលើកគ្នាតវ៉ាសុំឱ្យដោះលែងនោះមានឈ្មោះ កី ប៉ិប អាយុ៤៦ឆ្នាំ មានទីលំនៅភូមិសណ្តាន់ ឃុំពាក់ស្នែង ស្រុកអង្គរធំ ។
លោក គឹម ឆៃហៀង អភិបាលរងខេត្ត ដែលបានជួបក្រុមពលរដ្ឋផ្ទាល់ បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី៨ តុលា ២០១៥នេះថា ក្រុមពលរដ្ឋពិតជាបានស្នើសុំឲ្យមានការដោះលែងស្ត្រីអ្នកភូមិម្នាក់ និងសុំឲ្យផ្តល់កម្មសិទ្ធិដីធ្លីដែលពួកគាត់បានសង់ខ្ទមនៅពិតប្រាកដមែន ។ លោកបន្តទៀតថា ក្រុមប្រជាពលរដ្ឋបានវិលត្រឡប់ទៅផ្ទះរៀងៗខ្លួនវិញអស់ហើយបន្ទាប់ពីអាជ្ញាធរទទួលយកលិខិតស្នើសុះ និងយល់ព្រមចុះទៅពិនិត្យដល់ទីតាំង ។
គួរបញ្ជាក់ផងដែរថា នៅថ្ងៃទី៦ តុលា ២០១៥ នៅចំណុចភូមិឆ្កែកូន ឃុំពាក់ស្នែង ស្រុកអង្គរធំ កម្លាំងចម្រុះបានធ្វើការឃាត់ខ្លួនសកម្មជនដីធ្លីចំនួនពីរនាក់ ម្នាក់ឈ្មោះ កី ប៉ិប អាយុ៤៦ឆ្នាំ មានទីលំនៅភូមិសណ្តាន់ ឃុំពាក់ស្នែង ស្រុកអង្គរធំ និងម្នាក់ទៀតឈ្មោះ ពុត កុស៊ាប ភេទប្រុស អាយុ២៧ឆ្នាំ មានស្រុកកំណើតនៅភូមិសាលារៀន ឃុំបាសាក់ ស្រុកស្វាយជ្រុំ ខេត្តស្វាយរៀង បច្ចុប្បន្នរស់នៅភូមិ-ឃុំ រលួស ស្រុកប្រាសាទបាគង មានមុខរបរជាអ្នកកាសែតសេនាដៃ៨ តែការតវ៉ាព្រឹកនេះពលរដ្ឋមិនបានស្នើសុំដោះលែងអ្នកកាសែតរូបនេះទេ គឺស្នើឲ្យដោះលែងតែស្ត្រីម្នាក់ឈ្មោះ កី ប៉ិប ប៉ុណ្ណោះ ៕
ព័ត៌មានលម្អិតនឹងមានផ្សាយជូននៅលើកាសែតកោះសន្តិភាព
ចែករំលែកព័តមាននេះ