រាជធានីភ្នំពេញ ៖ ខណៈពេលនេះសមត្ថកិច្ចកំពុងឡោមព័ទ្ធការដ្ឋានសំណង់មួយកន្លែងនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ និងកំពុងសុំការអនុញ្ញាតិពីស្ថាប័នតុលាការដើម្បីចូលចាប់ខ្លួនជនបង្ក
រាជធានីភ្នំពេញ ៖ ខណៈពេលនេះសមត្ថកិច្ចកំពុងឡោមព័ទ្ធការដ្ឋានសំណង់មួយកន្លែងនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ និងកំពុងសុំការអនុញ្ញាតិពីស្ថាប័នតុលាការដើម្បីចូលចាប់ខ្លួនជនបង្ក ដោយសារតែកម្មករសំណង់ការដ្ឋាននេះប្រមាណជាង២០នាក់បានវាយអ្នករត់ម៉ូតូឌុបម្នាក់ និងវាយកម្ទេចម៉ូតូរបស់ជនរងគ្រោះដោយមិនដឹងមូលហេតុកាលពីវេលាម៉ោងប្រមាណជា៩យប់ ថ្ងៃទី៧ តុលា ២០១៥ ។
ជនរងគ្រោះជាអ្នករត់ម៉ូតូឌុបដែលត្រូវកម្មករសំណង់ជាច្រើននាក់វាយនោះមានឈ្មោះ ផាត បញ្ញា អាយុ២៦ឆ្នាំ ស្នាក់នៅម្តុំរោងចក្រ QMI ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅភូមិអន្សម ឃុំអន្សោង ស្រុកកំពង់ត្របែក ខេត្តព្រៃវែង ចំណែកម៉ូតូដែលត្រូវកម្មករសំណង់វាយឡើងខ្ទេចដែរនោះម៉ាកហុងដា គប់ជ្រុង សេ៩០ ពណ៌ទឹកប៊ិច ពាក់ស្លាកលេខ ភ្នំពេញ 1W-0571 ។
ប្រភពពីជនរងគ្រោះបានឱ្យដឹងថា មុនពេលកើតហេតុ ស្ត្រីម្នាក់បានហៅខ្លួនឱ្យឌុបទៅមន្ទីរពេទ្យកាល់ម៉ែតក្នុងតម្លៃ២ម៉ឺនរៀល តែថាឱ្យចាំមួយភ្លែត ខណៈពេលកំពុងតែចាំម៉ូយស្រាប់តែពេលនោះមិនដឹងជាក្រុមកម្មករសំណង់មកពីណាខ្លះកាន់ដំបង ខ្លះកាន់ពូថៅ ខ្លះកាន់កាំបិទ មកវ៉ៃគាត់ត្រូវ២ដំបង និងវាយកម្ទេចម៉ូតូរបស់គាត់ដោយចោទថាគាត់ជាស្ទាវមកពីណាបានជាមកឈប់មុខការដ្ឋានសំណង់បែបនេះ ហើយអូសម៉ូតូរបស់គាត់ចូលទៅក្នុងការដ្ឋានសំណង់ទៀត ដោយមានការភ័យខ្លាចជនរងគ្រោះក៏បានរត់ទៅកាន់ប៉ុស្តិ៍នគរបាលរដ្ឋបាលចោមចៅ ដើម្បីឱ្យសមត្ថកិច្ចជួយអន្តរាគមន៍ ។
ប្រភពពីសមត្ថកិច្ចបានឱ្យដឹងថា ខណៈពេលសមត្ថកិច្ច៤នាក់បានទៅជួយអន្តរាគមន៍ដល់កន្លែងកើតហេតុ បម្រុងសួរនាំថាហេតុអ្វីបានជាវាយគេ និងវាយកម្ទេចម៉ូតូគេ ស្រាប់តែក្រុមកម្មករសំណង់ប្រមាណជា២០ប្រដាប់ដោយដំបង កាំបិត ពូថៅស្ទើរគ្រប់ដៃ ចេញមក សមត្ថកិច្ចក៏ដកថយបន្តិច ប៉ុន្តែក្រុមកម្មករសំណង់ទាំងនោះនៅតែចូលមកទៀត ដោយខ្លាចមានគ្រោះថ្នាក់ដោយប្រការណាមួយ សមត្ថកិច្ចក៏បានដកកាំភ្លើងបាញ់ឡើងលើ១គ្រាប់ដើម្បីគំរាមជនទាំងនោះកុំឱ្យចូលមកទៀត ពេលនេះក្រុមកម្មទាំងនោះក៏បាននាំគ្នារត់ចូលក្នុងការដ្ឋានវិញអស់ ហើយបិទទ្វារចាក់សោរការដ្ឋានសំណង់តែម្តង ។
ខណៈពេលនេះសមត្ថកិច្ចកំពុងធ្វើការឡោមព័ទ្ធការដ្ឋានសំណង់នោះ និងកំពុងសុំការអនុញ្ញាតិពីស្ថាប័នតុលាការចូលទៅក្នុងការដ្ឋានសំណង់ ដើម្បីចាប់ជនបង្កទាំងនោះយកមកសាកសួរ និងធ្វើការកាត់ទោសតាមច្បាប់ ។
ប្រភពពីកន្លែងកើតហេតុបានឱ្យដឹងថា ខណៈពេលសមត្ថកិច្ចកំពុងឡោមព័ទ្ធនោះ ទំនងជាក្រុមកម្មករទាំងនោះមានការភ័យខ្លាចហើយមើលទៅបានជាអូសម៉ូតូជនរងគ្រោះដែលបានវាយកម្ទេចនោះចេញមកក្រៅវិញ ហើយនាំគ្នាចូលទៅក្នុងការដ្ឋានវិញព្រមទាំងចាក់សោរទ្វារការដ្ឋានសំណង់ថែមទៀតផង ៕
ចែករំលែកព័តមាននេះ