រាជធានីភ្នំពេញ ៖ ជនសង្ស័យម្នាក់ត្រូវប្រជាពលរដ្ឋចាប់បានស្វាគមន៍ម្នាក់មួយដៃមួយជើងបែកមុខបែកមាត់ ខណៈពេលឡើងទៅសម្ងំក្នុងផ្ទះគេប៉ងលួចទ្រព្យសម្បត្តិត្រូវម្ចាស់ផ្ទះឃើញ
រាជធានីភ្នំពេញ ៖ ជនសង្ស័យម្នាក់ត្រូវប្រជាពលរដ្ឋចាប់បានស្វាគមន៍ម្នាក់មួយដៃមួយជើងបែកមុខបែកមាត់ ខណៈពេលឡើងទៅសម្ងំក្នុងផ្ទះគេប៉ងលួចទ្រព្យសម្បត្តិត្រូវម្ចាស់ផ្ទះឃើញស្រែកថាចោរបង្កឱ្យមានការភ្ញាក់ផ្អើល កាលពីវេលាម៉ោង០១ និង១០នាទីយប់ឈានចូល ថ្ងៃទី០៤ កញ្ញា ២០១៥ ត្រង់ចំណុចផ្ទះលេខ១៤២E0 តាមបណ្ដោយផ្លូវលេខ១៩ សង្កាត់ជ័យជំនះ ខណ្ឌដូនពេញ ។
ជនសង្ស័យខាងលើឈ្មោះ ឡុង សុផាត អាយុ២៣ឆ្នាំ មុខរបរជាជាងសំណង់ មានលំនៅមិនច្បាស់លាស់ ។
យោងទៅសំដីបុរសដែលជាម្ចាស់ផ្ទះខាងលើបានឱ្យដឹងថា មុនពេលកើតហេតុគាត់ទើបតែចេញពីកន្លែងធ្វើការមកដល់ផ្ទះបម្រុងបើកទ្វារផ្ទះរបស់គាត់នៅជាន់ទី២ ស្រាប់តែឃើញជនសង្ស័យខាងលើកំពុងអង្គុយក្នុងផ្ទះរបស់គាត់ ហើយគាត់ក៏ស្រែកថាចោរ រួចជនសង្ស័យព្យាយាមរត់ចុះមកក្រោមវិញក៏ត្រូវប្រជាពលរដ្ឋដែលនៅម្ដុំនោះដេញចាប់បានស្វាគមន៍ម្នាក់មួយដៃមួយជើងបែកមុខបែកមាត់រងរបួសយ៉ាងដំណំរួចទើបទាក់ទងទៅសមត្ថកិច្ច។
ក្រោយមកសមត្ថកិច្ចបានចុះមកដល់កន្លែងកើតហេតុ ឃាត់ខ្លួនបុរសជនសង្ស័យខាងលើ ចំណែកជនរងគ្រោះដែលជាម្ចាស់ផ្ទះបានទៅដាក់ពាក្យបណ្ដឹងនៅប៉ុស្ពិ៍នគរបាលជ័យជំនះដើម្បីឱ្យសមត្ថកិច្ចចាត់ការទៅតាមផ្លូវច្បាប់ ៕
ចែករំលែកព័តមាននេះ