ខេត្តព្រៃវែង ៖ នាយកដ្ឋានជលផល ដែលដឹកនាំដោយលោក យុទ្ធ ភូថង រដ្ឋលេខាធិការក្រសួងកសិកម្ម រុក្ខា ប្រមាញ់ និងនេសាទ កាលពីព្រឹកថ្ងៃទី១ កញ្ញា ២០១៥ បានសហការជាមួយមន្ត្រីជលផលខេត្តព្រៃវែង បើកយុទ្ធនាការចុះបង្ក្រាបបទល្មើសនេសាទនៅតាមដងទន្លេ និងក្នុងដែនអតីតឡូត៍នេសាទមួយចំនួនក្នុងខេត្តព្រៃវែង ក្នុងគោលបំណងដើម្បីទប់ស្កាត់បទល្មើសនេសាទ និងការពារប្រភពធនធានមច្ចជាតិឱ្យនៅគង់វង្ស ។
លោក យុទ្ធ ភូថង បានឱ្យដឹងថា នាយកដ្ឋានជលផលបានបែងចែកមុខព្រួញសំខាន់ៗចំនួន៣ក្នុងការចុះបង្ក្រាបបទល្មើសនេសាទព្រមៗគ្នាក្នុងថ្ងៃតែមួយ គឺនៅថ្ងៃទី១ កញ្ញានេះ ដោយសកម្មភាពចុះបង្ក្រាបនៅខេត្តកំពង់ឆ្នាំង ដឹកនាំដោយលោក ណៅ ធួក, នៅខេត្តកំពង់ចាម ដឹកនាំដោយលោកអធិការទន្លេមេគង្គ និងនៅខេត្តកណ្តាល-ព្រៃវែង ដឹកនាំដោយរូបលោកផ្ទាល់ ។
លោករដ្ឋលេខាធិការបានបញ្ជាក់ថា នាពេលកន្លងមក មន្ត្រីជំនាញជលផលគ្រប់ជាន់ថ្នាក់បានធ្វើសកម្មភាពចុះបង្ក្រាបបទល្មើសនេសាទជាបន្តបន្ទាប់តាមគ្រប់រូបភាព និងគ្រប់ទីកន្លែង ប៉ុន្តែមកដល់ពេលនេះសកម្មភាពនៃបទល្មើសទាំងនោះហាក់មិនមានការថយចុះសោះ ដូច្នេះហើយទើបក្រសួងកសិកម្ម រុក្ខា ប្រមាញ់ និងនេសាទ ពិសេសនាយកដ្ឋានជលផល បានសម្រេចដាក់ចេញនូវផែនការចុះបង្ក្រាប និងតាមដានជាប្រចាំនៅតាមតំបន់សំខាន់ៗដែលកើតមានបទល្មើសក្នុងខេត្តទាំង៤ខាងលើ ។ ជាក់ស្តែងនៅថ្ងៃទី១ កញ្ញានេះ សម្រាប់ខេត្តព្រៃវែង មន្ត្រីជំនាញជល ផលបានធ្វើការបង្ក្រាប និងដកហូតបានមាត់លូស្បៃមុងចំនួនជាង១០០មាត់លូ និងកាត់បំផ្លាញរបាំងស្បៃមុងបានចំនួនជិត៣ពាន់ម៉ែត្រ ព្រមទាំងព្រលែងកូនត្រីដែលជាប់នៅក្នុងលូស្បៃមុងចូលទៅក្នុងទន្លេវិញបានចំនួនជិត១ពាន់គីឡូក្រាម ។
លោក យុទ្ធ ភូថង បានបញ្ជាក់ឱ្យដឹងទៀតថា តាមរយៈការពិនិត្យជាក់ស្តែងនៅតាមតំបន់នេសាទក្នុងខេត្តទាំង៤ខាងលើ មន្ត្រីជំនាញជលផលអាចធ្វើការសន្និដ្ឋានបានថា បទល្មើសនេសាទដែលប្រើប្រាស់របាំងស្បៃមុង ដើម្បីចាប់យកកូនត្រី គឺមានមិនទាបជាង១ម៉ឺនមាត់លូស្បៃមុងនោះទេ ហើយ១មាត់លូក្នុង១ថ្ងៃបំផ្លាញអស់ប្រមាណជា១០គីឡូក្រាមត្រីយ៉ាងតិច ដូច្នេះបានន័យថា លូស្បៃមុង១ម៉ឺនមាត់លូនោះក្នុង១ថ្ងៃបានបំផ្លាញកូនត្រីអស់១០០តោន ត្រីទាំងនេះបើទុករយៈពេល៣ខែទៀត វានឹងធំកើនបរិមាណពី៥០ទៅ១០០ដង ដូច្នេះបើទូទាត់ទៅគឺស្មើនឹងយើងត្រូវបាត់បង់ត្រីប្រមាណជា៥ពាន់តោនក្នុង១ថ្ងៃ ដែលនេះជាការបាត់បង់ដ៏ធំធេងបំផុត ។
ដើម្បីការពារធនធានមច្ឆជាតិកុំឱ្យមានការវិនាសបាត់បង់តទៅទៀត រាជរដ្ឋាភិបាល ក៏ដូចជាមន្ត្រីជំនាញជលផល សូមអំពាវនាវដល់ប្រជានេសាទទាំងអស់ សូមមេត្តាបញ្ឈប់រាល់សកម្មភាពនេសាទខុសច្បាប់គ្រប់រូបភាពទាំងអស់ ព្រោះធនធានមច្ឆជាតិទាំងអស់នេះគឺជាភោគផលរបស់ប្រជាពលរដ្ឋយើង សហគមន៍យើង ប្រទេសជាតិយើង ហើយបើយើងនាំគ្នាបំផ្លាញរបៀបនេះ វាក៏ដូចជាបំផ្លាញជាតិយើង បំផ្លាញឆ្នាំងបាយយើង និងធ្វើឱ្យយើងកាន់តែក្រីក្រថែមទៀតផង ។
ជាមួយនឹងការសំណូមពរ លោកក៏បានបញ្ជាក់ផងដែរចំពោះក្រុមអ្នកដែលនៅតែបន្តប្រព្រឹត្តបទល្មើស និងអ្នកចរាចរ ទាំងអ្នកលក់ និងអ្នកទិញ បើសិនជាមានមន្ត្រីជលផលបានចុះទៅឃើញនោះ មន្ត្រីជំនាញជលផល និងសហការជាមួយសមត្ថកិច្ចធ្វើការឃាត់ខ្លួនកសាងសំណុំរឿងបញ្ជូនទៅតុលាការ ដើម្បីចាត់ការទៅតាមនិតិវិធី ហើយនេះគឺជាការជូនដំណឹងទុកជាមុន ដូច្នេះសូមបងប្អូនប្រជានេសាទទាំងអស់មេត្តាយោគយល់ និងចូលរួមសហការទាំងអស់គ្នា ក្នុងន័យដើម្បីការពារធនធានមច្ឆជាតិរបស់យើងឱ្យបានគង់វង្ស និងកាន់តែសំបូរហូរហៀរថែមទៀត ៕
ចែករំលែកព័តមាននេះ