ខេត្តកំពង់ឆ្នាំង ៖ យុវជនម្នាក់រងរបួសធ្ងន់ ខណៈជិះម៉ូតូម្នាក់ឯងត្រឡប់មកផ្ទះវិញ ដោយសារត្រូវជនពុំស្គាល់មុខលបកា.ប់ប្រហារត្រូវចំកញ្ចឹងកមុតដល់ឆ្អឹងឈាមហូរស្រោចពេញខ្លួន
ខេត្តកំពង់ឆ្នាំង ៖ យុវជនម្នាក់រងរបួសធ្ងន់ ខណៈជិះម៉ូតូម្នាក់ឯងត្រឡប់មកផ្ទះវិញ ដោយសារត្រូវជនពុំស្គាល់មុខលបកាប់ប្រហារត្រូវចំកញ្ចឹងកមុតដល់ឆ្អឹងឈាមហូរស្រោចពេញខ្លួន ត្រូវបានមិត្តភក្តិដឹកទៅសង្គ្រោះនៅមន្ទីរពេទ្យបង្អែកខេត្តជាបន្ទាន់ កាលពីវេលាម៉ោងជិត២រំលងអធ្រាត្រឈានចូលថ្ងៃទី២៧ សីហា ២០១៥ នៅតាមផ្លូវជាតិលេខ៥ទល់មុខហាងលក់ម៉ូតូហុងដា ស្ថិតនៅសង្កាត់ខ្សាម ក្រុងកំពង់ឆ្នាំង ។
លោក ម៉ា យន់ នាយនគរបាលព្រហ្មទណ្ឌក្រុងកំពង់ឆ្នាំង បានឱ្យដឹងថា យុវជនរងគ្រោះឈ្មោះ លី មាន អាយុ២៣ឆ្នាំ រស់នៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង រងរបួសធ្ងន់ត្រង់កញ្ចឹងករយះដល់ឆ្អឹង ។ មុនពេលកើតហេតុ យុវជនរងគ្រោះមានគ្នា៤នាក់បានផឹកស៊ី នៅហាងក្រុងកំពង់ឆ្នាំងត្រជាក់ចិត្ត លុះម៉ោងជាង១០យប់បានត្រឡប់មកវិញ ប៉ុន្តែនៅម៉ោងជាង១រំលងអធ្រាត្រក៏ត្រឡប់ទៅហាងនោះម្តងទៀតជាមួយមិត្តភក្តិឈ្មោះ យ៉ា នៅភូមិប្អេរ ប៉ុន្តែពេលទៅដល់ម្ចាស់ហាងប្រាប់ថា ហាងបិទហើយ ក៏ត្រឡប់មកវិញ ដោយជូនឈ្មោះយ៉ាទៅដាក់នៅផ្ទះ រួចក៏ជិះម៉ូតូម្នាក់ឯងមកផ្ទះ លុះមកដល់កន្លែងកើតហេតុ ស្រាប់តែមានជនពុំស្គាល់មុខបានស្ទុះមកកាប់ពីក្រោយត្រូវចំកញ្ចឹងក បណ្តាលឱ្យរបរបួសធ្ងន់តែម្តង ពេលនោះយុវជនរងគ្រោះបានព្យាយាមទូរស័ព្ទហៅឈ្មោះយ៉ា ឱ្យត្រឡប់មកយកខ្លួនទៅមន្ទីរពេទ្យ ព្រោះត្រូវគេកាប់ហើយ ។ ពេលដល់មន្ទីរពេទ្យខេត្ត ដោយសារស្ថានភាពធ្ងន់ពេក យុវជនរងគ្រោះត្រូវគ្រូពេទ្យដឹកបន្តទៅសង្គ្រោះនៅមន្ទីរពេទ្យឯរាជធានីភ្នំពេញ ។
លោកនាយនគរបាល បានបន្តថា ពេលនេះនៅមិនទាន់ដឹងពីមូលហេតុពិតប្រាកដដែលអាចឱ្យកំណត់មុខសញ្ញានោះទេ សមត្ថកិច្ចបាននិងកំពុងធ្វើការស្រាវជ្រាវ ព្រោះណាមួយជនរងគ្រោះមិនទាន់អាចនិយាយអ្វីបានឡើយ ៕
ចែករំលែកព័តមាននេះ