រាជធានីភ្នំពេញ ៖ កំលាំងសមត្ថកិច្ចការិយាល័យប្រឆាំងបទល្មើសព្រហ្មទណ្ឌនៃទីបញ្ជាការកងរាជអាវុធហត្ថរាជធានីភ្នំពេញ កាលពីព្រឹកថ្ងៃទី៥ កក្កដា បានបញ្ជួនមន្ត្រីប៉េអឹមលើផ្ទៃប្រទេសម្នាក់ទៅកាន់សាលាដំបូងរាជធានីភ្នំពេញ ដែលជាប់ពាក់ព័ន្ធថាបានផ្ទុះអាវុធ១គ្រាប់នៅហាងផឹកស៊ីបណ្តាលឱ្យអ្នកដទៃម្នាក់រងរបួស ។
មន្ត្រីប៉េអ៉ឹមរូបនោះឈ្មោះហោ ចាន់ធូ ភេទប្រុស អាយុ៣៤ឆ្នាំ មានឋានន្តរស័ក្តិជាអនុសេនីយ៍ឯកបម្រើការងារនៅការិយាល័យព័ត៌មាន សន្តិសុខ កងរាជអាវុធហត្ថលើផ្ទៃប្រទេស ។ ទាក់ទិននឹងការបញ្ជួនមន្ត្រីប៉េអឹមលើផ្ទៃប្រទេសទៅកាន់សាលាដំបូងរាជធានីភ្នំពេញ ដំណើរឿងកាលពីវេលាម៉ោង៩យប់ ថ្ងៃទី២ កក្កដា ២០១៥ លោកហោ ចាន់ធូ និងមិត្តភក្តិបានទៅផឹកស៊ីនៅហាងមួយយីហោស្រីណា ដែលស្ថិតនៅបណ្តោយផ្លូវ៥៩២ កែងផ្លូវ ៣៣៥ សង្កាត់បឹងកក់២ ខណ្ឌទួលគោក ។
ខណៈពេលកំពុងផឹកស៊ីលោកអនុសេនីយ៍ឯកហោ ចាន់ធូ បានផ្ទុះអាវុធ១គ្រាប់ភ្ញុចដី បណ្តាលឲ្យខ្ទាតអំបែងត្រូវបុរសម្នាក់ឈ្មោះយស់ សារុំ អាយុ៣៨ឆ្នាំ មុខរបរជាកម្មករសំណង់ ស្នាក់នៅភូមិស្លែងរលើង សង្កាត់ទឹកថ្លា ខណ្ឌសែនសុខ រងរបួសស្រាល ។
ក្រោយពីមានករណីផ្ទុះអាវុធបណ្តាលរងរបួសអ្នកដ៏ទៃនោះ លោកហោ ចាន់ធូ ត្រូវបានកំលាំងសមត្ថកិច្ចកងរាជអាវុធហត្ថរាជធានីភ្នំពេញឃាត់ខ្លួនសាកសួរ ។ នៅអាវុធហត្ថ លោកហោ ចាន់ធូ បានសារភាពថា ជាកំហុសអចេតនាទេ បានជាលោកនិយាយយ៉ាងដូច្នោះ ព្រោះពេលកំពុងផឹកស៊ីអាវុធរបស់លោកបាននិងបម្រុងជ្រុះពីចង្កេះ ពេលនោះលោកបានយកដៃទៅកាន់វាក៏រាលកៃផ្ទុះតែម្តង។
មន្ត្រីកងរាជអាវុធហត្ថរាជធានីភ្នំពេញក៏បានបង្ហើបដូចគ្នាដែរថា នេះជាករណីផ្ទុះអាវុធ(រាលកៃ)ដោយអចេតនាទេ ហើយបណ្តាលឲ្យរងរបួសអ្នកដទៃនោះមិនមែនជាអំបែកគ្រាប់ឡើយ គឺកម្ទេចថ្មខ្ទាតត្រូវជើងជនរង គ្រោះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ