រាជធានីភ្នំពេញ ៖ បុរសម្នាក់បានមកដាក់ពាក្យបណ្តឹងនៅប៉ុស្តិ៍ប៉ូលិសទឹកថ្លានៅរសៀលថ្ងៃទី២ កក្កដា នេះ បន្ទាប់ពីកូនស្រីរបស់គាត់ត្រូវជនមិនស្គាល់អត្តសញ្ញាណឆបោកម៉ូតូម៉ាកឌ្រីម ពណ៌ខ្មៅ ស៊េរី២០១១ យកទៅបាត់កាលពីវេលាម៉ោង៧ព្រឹកថ្ងៃដដែល នៅម្តុំផ្សារដីហុយតាមបណ្តោយផ្លូវ១៩១៩ ស្ថិតក្នុងសង្កាត់ទឹកថ្លា ខណ្ឌសែនសុខ។
បុរសដែលមកដាក់ពាក្យបណ្តឹងឈ្មោះឡាង សាង អាយុ៤៨ឆ្នាំ ជាឪពុកក្មេងស្រីដែលត្រូវគេឆបោកម៉ូតូឈ្មោះសាង ដាណេ អាយុ១១ឆ្នាំ ស្នាក់នៅផ្ទះលេខ៩ ផ្លូវលេខ៣០ ភូមិសែនសុខទី៧ សង្កាត់ឃ្មួញ ខណ្ឌសែនសុខ។
តាមបុរសជាឪពុកក្មេងស្រីរងគ្រោះបានឱ្យដឹងថា មុនពេលកើតហេតុ នៅវេលាម៉ោង៧ព្រឹក គាត់បានឱ្យកូនស្រីជិះម៉ូតូចេញពីភូមិមកម្តុំផ្សារដីហុយតាមបណ្តោយផ្លូវ១៩១៩ ។ ពេលទៅដល់ម្តុំផ្សារដីហុយ ស្រាប់តែមានបុរសម្នាក់ហៅកូនស្រីរបស់គាត់ឱ្យឈប់ម៉ូតូ ហើយសុំឱ្យជូនគេទៅផ្ទះ ពេលនោះកូនស្រីរបស់គាត់យល់ព្រម ។
បុរសជាឪពុកបន្តថា ខណៈកូនស្រីរបស់គាត់ឌុបមកដល់ម្តុំប៉ុស្តិ៍ប៉ូលិស ជនសង្ស័យបានប្រាប់កូនស្រីរបស់គាត់ឱ្យឈប់ម៉ូតូ ទុកឱ្យគេជាអ្នកឌុបវិញ ហើយក៏ឡើងជិះម៉ូតូយកទៅបាត់តែម្តង៕
ចែករំលែកព័តមាននេះ