រាជធានីភ្នំពេញ ៖ នៅប៉ុន្មាននាទីមុននេះ គណៈបញ្ជាការឯកភាពខណ្ឌជ្រោយចង្វារបានបើកកិច្ចប្រជុំមន្ត្រីរាជការ កងកម្លាំងប្រដាប់អាវុធក្នុងមូលដ្ឋានដើម្បីឱ្យអាជ្ញាធរ និងសមត្ថកិច្ចលើកពីបញ្ហានានាក្នុងមូលដ្ឋានដែលកំពុងប្រឈមមុខ។
កិច្ចប្រជុំនេះប្រព្រឹត្តទៅក្រោមអធិបតីភាពលោកស្រី កែវ ច័ន្ទស៊ុនណារី អភីបាលរងខណ្ឌ និងជាតំណាងលោកឃ្លាំង ហួត អភិបាលខណ្ឌជ្រោយចង្វារ។
ក្នុងកិច្ចប្រជុំនេះ អាជ្ញាធរសង្កាត់នីមួយៗបានលើកពីបញ្ហាប្រឈមជាច្រើន ដូចជាគ្រឿងញៀន ល្បែងស៊ីសង ទឹក ភ្លើង និងសំរាមនៅតែជាកង្វល់របស់ប្រជាពលរដ្ឋក្នុងមូលដ្ឋាន ដោយពួកគាត់ទទូចទាមទារឱ្យអាជ្ញាធរយកចិត្តទុកដាក់ដោះស្រាយជាបន្ទាន់។
ទាក់ទិនការលើកឡើងខាងលើ លោកស្រី កែវ ច័ន្ទស៊ុនណារី បានមានប្រសាសន៍ថា កន្លងមកគណៈបញ្ជាការឯកភាពខណ្ឌជ្រោយចង្វារដែលដឹកនាំដោយលោកឃ្លាំង ហួត បានជម្រុញដោះស្រាយបញ្ហាកង្វល់ជាច្រើនជូនប្រជាពលរដ្ឋក្នុងមូលដ្ឋាន។
លោកស្រីមានប្រសាសន៍បន្តថា ទោះបីជាយ៉ាងណាបញ្ហាមួយចំនួននៅមិនទាន់បានដោះស្រាយនៅឡើយ ដូចជាគ្រឿងញៀន និងល្បែងស៊ីសងដូចដែលអាជ្ញាធរបានលើកក្នុងអង្គប្រជុំ ក៏ដូចជាវេទិកាសាធារណៈនានា។
លោកស្រីក៏បានណែនាំដល់អាជ្ញាធរសង្កាត់ និងសមត្ថកិច្ចមូលដ្ឋានយកចិត្តទុកដាក់ចំពោះបញ្ហាទាំងនេះ ព្រោះជាក្តីកង្វល់ និងគ្រោះថ្នាក់សម្រាប់សង្គមជាតិ៕
ចែករំលែកព័តមាននេះ