ខេត្តព្រៃវែង ៖ ក្មេងទំនើង១ក្រុមដែលមានគ្នាចំនួន៨នាក់ត្រូវបានសមត្ថកិច្ចចាប់ឃាត់ខ្លួនបន្ទាប់ពីពួកគេធ្វើសកម្មភាពគប់ដុំថ្មទៅលើរថយន្តអ្នកដំណើរនៅតាមបណ្តោយផ្លូវជាតិលេខ១បណ្តាលអោយបែកកញ្ចក់រថយន្តរបស់អ្នកដំណើរជាញឹកញាប់ ។
ខេត្តព្រៃវែង ៖ ក្មេងទំនើង១ក្រុមដែលមានគ្នាចំនួន៨នាក់ត្រូវបានសមត្ថកិច្ចចាប់ឃាត់ខ្លួនបន្ទាប់ពីពួកគេធ្វើសកម្មភាពគប់ដុំថ្មទៅលើរថយន្តអ្នកដំណើរនៅតាមបណ្តោយផ្លូវជាតិលេខ១បណ្តាលអោយបែកកញ្ចក់រថយន្តរបស់អ្នកដំណើរជាញឹកញាប់ ។
សមត្ថកិច្ចបានឱ្យដឹងថា ក្មេងទំនើងទាំង៨នាក់នេះមាន ១-ឈ្មោះកុល គឿន អាយុ១៧ឆ្នាំ ២-ឈ្មោះសុខ សំអឿន អាយុ១៦ឆ្នាំ ៣-ឈ្មោះសុង សាមឌី អាយុ២០ឆ្នាំ ៤-ឈ្មោះអ៊ុច វណ្ណដា អាយុ១៦ឆ្នាំ អ្នកទាំង៤នាក់នេះត្រូវបានឃាត់ខ្លួនកាលពីវេលាម៉ោង៩ និង៥០នាទីយប់ ថ្ងៃទី១៨ ខែមេសា ឆ្នាំ២០១៥ នៅតាមបណ្តោយផ្លូវជាតិលេខ១ ត្រង់ចំណុចភូមិជ្រលង ឃុំប្រាសាទ ស្រុកកំពង់ត្របែក ។ ៥-ឈ្មោះផេង វិជ្ជរ៉ា អាយុ២០ឆ្នាំ ៦-ឈ្មោះអ៊ិន សាវី អាយុ១៨ឆ្នាំ ៧-ឈ្មោះវ៉ាន់ ថុនា អាយុ២០ឆ្នាំ និង៨-ឈ្មោះញ៉ិល ស្នា អាយុ២០ឆ្នាំ អ្នកទាំង៤នាក់នេះត្រូវបានឃាត់ខ្លួនកាលពីវេលាម៉ោង៤ទៀបភ្លឺ ថ្ងៃទី១៩ ខែមេសា ឆ្នាំ២០១៥ នៅតាមបណ្តោយផ្លូវជាតិលេខ១ ត្រង់ចំណុចភូមិ-ឃុំ-ស្រុកកំពង់ត្របែក ។
លោកវរសេនីយទោអ៊ុំ ចំរើន អធិការនគរបាលស្រុកកំពង់ត្របែកបានឱ្យដឹងថា ក្រុមក្មេងទំនើងទាំង៨នាក់នេះត្រូវបានឃាត់ខ្លួនជាមួយវត្ថុតាងជាក់ស្តែងរួមមាន ដុំថ្ម កាំបិត និងព្រនង់ ខណៈពេលដែលពួកគេកំពុងពួនសំងំនៅក្នុងគុម្ពោធព្រៃជាប់ចិញ្ចើមផ្លូវជាតិលេខ១ប៉ុនប៉ងធ្វើសកម្មភាពឆ្មក់គប់ដុំថ្មទៅលើរថយន្តអ្នកដំណើរដែលឆ្លងកាត់ ។
លោកអធិការបានបញ្ជាក់ថា នាពេលកន្លងមកក្រុមក្មេងទំនើងទាំងនេះធ្លាប់ធ្វើសកម្មភាពពួនគប់ដុំថ្មទៅលើរថយន្តអ្នកដំណើរដែលឆ្លងកាត់ច្រើនដងមកហើយ ហើយកម្លាំងរបស់លោកក៏ធ្លាប់តាមចាប់ជាច្រើនដងមកហើយដែរ ប៉ុន្តែចាប់មិនដែលបានគឺរហូតមកដល់យប់ថ្ងៃកើតហេតុនេះ ពួកគេបានធ្វើសកម្មភាពប្រើកាំបិតតាំងតោគប់ចំក្បាលនារីរងគ្រោះម្នាក់ឈ្មោះស្រីមុំ អាយុ៤២ឆ្នាំ ដែលកំពុងជិះម៉ូតូជាមួយប្តី និងកូនៗនៅលើកំណាត់ផ្លូវជាតិលេខ១ត្រង់ចំណុចភូមិជ្រលង ឃុំប្រាសាទ បណ្តាលឱ្យនារីរងគ្រោះបែកក្បាលហូរឈាមជោគខ្លួន ហើយត្រូវបានប្តីដឹកទៅព្យាបាលនៅមន្ទីរពេទ្យ និងប្តឹងសមត្ថកិច្ចឱ្យជួយអន្តរាគមន៍ ទើបសមត្ថកិច្ចចេញតាមស្វែងរក រហូតរកឃើញក្មេងទំនើងទាំងនេះ ហើយក៏ធ្វើការឃាត់ខ្លួនតែម្តង ។
បច្ចុប្បន្ន នារីរងគ្រោះឈ្មោះ ស្រីមុំ កំពុងសំរាកព្យាបាលនៅក្នុងមន្ទីរពេទ្យបង្អែកស្រុកកំពង់ត្របែក ចំណែកក្រុមក្មេងទំនើងទាំង៨នាក់រួមជាមួយវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅកាន់ស្នងការនគរបាលខេត្តចាត់ការបន្តទៅតាមនិតិវិធី ៕
ចែករំលែកព័តមាននេះ