រាជធានីភ្នំពេញ ៖ អ្នករកស៊ីនាំស្រីពេលយប់ (ហៅថាតៃប៉ាន់) នៅម្តុំរង្វង់មូលអាងទឹកពហុកីឡដ្ឋានជាតិ អូឡាំពិក កាលពីវេលម៉ោង៣ និង៤០នាទីទៀបភ្លឺ ថ្ងៃទី១៩ មេសា ២០១៥ ត្រូវខ្មាន់កាំភ្លើងបាញ់១គ្រាប់បណ្តាលឲ្យរងរបួស ព្រោះខឹងមិនរកស្រីឲ្យគេ ។
តៃប៉ាន់ដែលរងរបួសដោយគ្រាប់កាំងភ្លើងពីសំណាក់ក្រុមអ្នករកស្រីទៅបំពេញតណ្ហានោះឈ្មោះសុខ សាម៉ុន ភេទប្រុស អាយុ៣៣ឆ្នាំ មុខរបរឈរជើងទាក់ម៉ូយបុរសដាក់នារីឲ្យយកទៅរួមភេទ(ដោះកូយ) ស្នាក់នៅផ្ទះជួល ម្តុំផ្សារដើមគរសង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
ទាក់ទិនករណីខាងលើនេះត្រូវបានសមត្ថកិច្ចនគរបាលខណ្ឌ៧មករាឲ្យដឹងថា នៅវេលាទៀបភ្លឺឈានចូលថ្ងៃទី១៩ មេសា មានបុរស២នាក់ និងនារីម្នាក់ជិះម៉ូតូ២គ្រឿង មិនដឹងចេញពីណាមកទេក្នុងស្ថានភាពស្រវឹង ដោយបុរសម្នាក់ជិះម៉ូតូម៉ាកដុកមានឌុបស្រីម្នាក់ផង ចំណែកបុរសម្នាក់ទៀតជិះម៉ូតូម៉ាកវីវ៉ាម្នាក់ឯង ពេលទៅដល់រង្វង់មូលអាងទឹកស្តាតអូឡាំពិក ម៉ូតូ២គ្រឿងនោះបានឈប់ និងបានជួបជនរងគ្រោះដែលពួកគេទំនងជាស្គាល់គ្នា ឬក៏ធ្លាប់ទំនាក់ទំនងរកស្រីឲ្យគ្នាទៅវិញទៅមក និងបានតម្រូវឲ្យ(តៃប៉ាន់)ជនរងគ្រោះរកស្រីឲ្យគេម្នាក់ដើម្បីយកទៅដេកនៅផ្ទះសំណាក់ ។
ពេលនោះ ជនរងគ្រោះជាតៃប៉ាន់ មិនបានរកស្រីឲ្យបុរស២នាក់នោះទេ បានធ្វើឲ្យបុរស២នាក់នោះខឹង ហើយក៏មានការឈ្លោះប្រកែកគ្នាបន្តិចបន្ទួច ស្រាប់តែបុរសជិះម៉ូតូដុកមិនដឹងជាសមាសភាព ខាងណាដកកាំភ្លើងខ្លីម៉ាកកា៥៩ប្រើគ្រាប់ច្នៃបាញ់ភ្ញុចដី១គ្រាប់គំរាមតៃប៉ាន់ធ្វើឱ្យគ្រាប់កាំភ្លើងផ្លាតត្រូវជើងឈ្មោះសុខ សាម៉ុន បណ្តាលឲ្យរងរបួស និងដេកដួលនៅកន្លែងកើតហេតុ ហើយខ្មាន់កាំភ្លើងបាននាំគ្នាចេចខ្លួនបាត់ទៅ ។
បន្ទាប់ពីមានសំឡេងស្នូរផ្ទុះអាវុធកំលាំងល្បាតពេលយប់ ដែលដឹកនាំដោយលោកអនុសេនីយ៍ទោ រស់ ស៊ីណា ប្រធានផ្នែកនគបាលព្រហ្មទណ្ឌខណ្ឌ៧មករា បានទៅដល់ភ្លាមដែរ ក៏បានដេញតាមខ្មាន់កាំភ្លើងពីក្រោយរហូតទៅដល់ភូមិព្រៃទា សង្កាត់ចោមចៅ ខណ្ឌពោធិសែនជ័យទើបបាត់ដាន និងអាចចាត់ទុកថាក្រុមនោះបានចូលផ្ទះសំងំដេកបាត់ទៅហើយ ។
ចំណែកជនរងគ្រោះត្រូវបានលោកវរសេនីយ៍ទោនេត ស៊ី ថុន អធិការនគរបាលខណ្ឌ៧មករា ខ្នះខ្នែងឲ្យមន្ត្រីក្រោមឧិវាទរកម៉ូតូរ៉ឺកម៉កដឹកទៅសង្គ្រោះនៅក្លីនិកឯកជន ខណៈរថយន្តសាមុយមិនទាន់ទៅដល់ ។ នៅពេលទៅដល់គ្លីនិកឯកជនជនរងគ្រោះត្រូវបានគ្រូពេទ្យព្យាបាលរុំរបួសហើយ ក្រុមគ្រួសារនាំទៅសំរាកនៅគេហដ្ឋានរបស់គេតែម្តងទៅ ។ សមត្តកិច្ចបានបន្តថា មកដល់ពេលនេះជនរងគ្រោះមិនទាន់បានដាក់ពាក្យបណ្តឹងដល់សមត្តកិច្ច ដើម្បីសំរាប់ដាក់បន្ទុកលើខ្មាន់កាំភ្លើងនោះនៅឡើយទេ តែទោះជាយ៉ាងណាសមត្ថកិច្ចនៅតែបន្តនិតិវិធីលើករណីនេះ៕
ចែករំលែកព័តមាននេះ