ខេត្តប៉ៃលិន ៖ បុរសម្នាក់រងរបួសបែកក្បាលផ្នែកខាងលើដេរអស់ជាច្រើនថ្នេរ និងហើមមុខ ហើមមាត់ សន្លប់បាត់ស្មារតីនៅនឹងកន្លែង ត្រូវបានអ្នកជិតខាង និងមេភូមិទូរស័ព្ទហៅរថយន្តសង្គ្រោះដឹកទៅព្យាបាលនៅមន្ទីរពេទ្យបង្អែកខេត្ត បន្ទាប់ពីផឹកស្រាស្រវឹងទៅរករឿងជេរប្រពន្ធកូន ហើយត្រូវប្អូនថ្លៃ៣នាក់ខឹងទ្រាំលែងបាន ក៏នាំគ្នាព្រួតវាយរងរបួសធ្ងន់តែម្តង ។
ហេតុការណ៍នេះកើតឡើងកាលពីវេលាម៉ោង០៨ និង១៥នាទីយប់ថ្ងៃទី១២ មេសា ២០១៥ ស្ថិតនៅក្នុងភូមិអន្លង់រក្សា ឃុំស្ទឹងត្រង់ស្រុកសាលាក្រៅ ។
ប្រភពបានឱ្យដឹងថា បុរសរងគ្រោះឈ្មោះខែម សុគា អាយុ២៥ឆ្នាំ ជាកសិករ មានប្រពន្ធឈ្មោះបិន ចាន់ថន អាយុ៤០ឆ្នាំ មានស្រុកកំណើតនៅភូមិផ្លូវទ្រាស ឃុំឈូកខ្សាច់ ស្រុកបារាយណ៍ ខេត្តកំពង់ធំ បច្ចុប្បន្នរស់នៅក្នុងភូមិកើតហេតុខាងលើ ។ ចំណែកជនដៃដល់ជាប្អូនថ្លៃ ១-ឈ្មោះយ៉េង សុភ័ក្ត្រ ភេទប្រុស អាយុ២៨ឆ្នាំ ២-ឈ្មោះស៊ិន វិបុល ភេទប្រុស អាយុ២០ឆ្នាំ ៣-ឈ្មោះសរ ស៊ីណាត ភេទប្រុស អាយុ២៦ឆ្នាំ ទាំង៣នាក់រស់នៅភូមិកើតហេតុខាងលើ បានយកដំបង និងពូថៅវាយទៅលើជនរងគ្រោះ រួចដាក់មេប្រូចបាត់អស់ ។
ប្រភពដដែលបន្តថា ជារៀងរាល់ថ្ងៃ ជនរងគ្រោះតែងតែផឹកស្រាស្រវឹងរករឿងវាយប្រពន្ធកូនមិនលស់ទាំងយប់ទាំងថ្ងៃ ស្ទើរដេកពួនមិនបាន ថែមទាំងមើលងាយដល់ម្តាយខាងប្រពន្ធ ។ មុនពេលកើតហេតុ បន្ទាប់ពីជនរងគ្រោះផឹកស្រាសស្រវឹង ក៏បើកគោយន្តកន្ត្រៃមកជេរប្រពន្ធពេញភូមិ លុះពេលឮដូច្នេះ ប្អូនថ្លៃទាំងបីនាក់ទ្រាំមិនបាន ក៏នាំគ្នាខ្លះយកដំបង ខ្លះយកពូថៅ ដេញវាយ និងកាប់ទៅលើជនរងគ្រោះជាបងថ្លៃតែម្តង ។
ប្រភពបន្តទៀតថា ខណៈនោះមានជនដៃដល់ម្នាក់បានយកខ្នងពូថៅវាយចំក្បាលជនរងគ្រោះ ពេលកំពុងតែពាក់មួកសុវត្ថិភាព បណ្តាលឱ្យបែកមុតរយះដល់ក្បាលផ្នែកខាងលើសន្លប់នៅនឹងកន្លែងតែម្តង ។ ក្រោយមកជនរងគ្រោះ ត្រូវបានមេភូមិនិងប្រជាពលរដ្ឋហៅរថយន្តសង្គ្រោះដឹកទៅព្យាបាលនៅមន្ទីរពេទ្យបង្អែកខេត្តរួចផុតជីវិត ៕
ចែករំលែកព័តមាននេះ