ខេត្តរតនគិរី៖ កម្លាំងរដ្ឋបាលព្រៃឈើផ្នែកវ៉ឺនសៃកាលពីល្ងាចថ្ងៃទី៣១ ខែមីនា ឆ្នាំ២០១៥ នេះបានចុះទៅរឹបអូសឈើប្រណិតប្រភេទធ្នង់ដែលក្រុមឈ្មួញទិញយកមកគរទុកនៅមាត់ទន្លេសេសាន ស្ថិតក្នុងភូមិទៀមក្រោម ឃុំភ្នំកុក ស្រុកវ៉ឺនសៃ ខេត្តរតនគិរី បម្រុងដឹកចេញទៅលក់នៅប្រទេសវៀតណាម
ខេត្តរតនគិរី៖ កម្លាំងរដ្ឋបាលព្រៃឈើផ្នែកវ៉ឺនសៃកាលពីល្ងាចថ្ងៃទី៣១ ខែមីនា ឆ្នាំ២០១៥ នេះបានចុះទៅរឹបអូសឈើប្រណិតប្រភេទធ្នង់ដែលក្រុមឈ្មួញទិញយកមកគរទុកនៅមាត់ទន្លេសេសាន ស្ថិតក្នុងភូមិទៀមក្រោម ឃុំភ្នំកុក ស្រុកវ៉ឺនសៃ ខេត្តរតនគិរី បម្រុងដឹកចេញទៅលក់នៅប្រទេសវៀតណាម ។
លោកមូល សាវ៉ាំង នាយផ្នែករដ្ឋបាលព្រៃឈើវ៉ឺនសៃ ប្រាប់ឲ្យដឹងថាក្រោយពីទទួលនូវសេចក្តីរាយការណ៍ពីប្រជាពលរដ្ឋអំពីការដឹកជញ្ជូនឈើប្រណិតខាងលើលោកក៏សុំយោបល់ថ្នាក់លើរួចបញ្ជារកម្លាំងចុះពិនិត្យទីតាំងខាងលើ ក៏ប្រទះឃើញគំនរឈើដែលក្រុមឈ្មួញដឹកមកគរទុក ប៉ុន្តែម្ចាស់ឈើដឹងខ្លួនទាន់ក៏ជិះកាណូតរត់គេចខ្លួនបាត់ ។ លោកបន្តថាឈើប្រណិតប្រភេទធ្នង់ជាច្រើនដុំត្រូវបានមន្ត្រីរបស់លោកជួលរថយន្តប្រជាពលរដ្ឋចំនួន២គ្រឿងដឹកយកមករក្សាទុកនៅស្នាក់ការដ្ឋបាលព្រៃឈើអូរជុំ ដើម្បីស្វែងរកម្ចាស់ឈើចូលខ្លួនមកដោះស្រាយតាមច្បាប់ស្តីពីព្រៃឈើ ។
ដោយឡែកប្រជាពលរដ្ឋបាននិយាយតៗគ្នាថានាពេលថ្មីៗនេះគេសង្កេតឃើញក្រុមឈ្មួញវៀតណាមជាច្រើនក្រុមស្ពាយលុយដុល្លាទៅទិញឈើតាមផ្ទះបងប្អូនជនជាតិតែម្តង ។ ជាមួយគ្នានេះដែរប្រជាពលរដ្ឋដែលធ្លាប់រកទទួលទានដឹកឈើតាមម៉ូតូគ្រាន់តែចិញ្ចឹមឆ្នាំងនោះ លែងរកស៊ីកើតទៀតហើយ ប្រសិនបើសមត្ថកិច្ចជំនាញនិងស្ថាប័នពាក់ព័ន្ធបណ្តែតបណ្តោយឲ្យក្រុមឈ្មួញវៀតណាមចូលទន្ទ្រានឈើប្រណិតនៅក្នុងប្រទេសកម្ពុជាបន្តទៀត ។
សូមបញ្ជាក់ផងដែរថាឈើប្រណិតប្រភេទធ្នង់ដែលកម្លាំងរដ្ឋបាលព្រៃឈើផ្នែកវ៉ឺនសៃរឹបអូសបាននេះមានចំនួន២២ដុំស្មើនឹង០,៥៥៧ម៉ែត្រគីប ៕
ចែករំលែកព័តមាននេះ