រាជធានីភ្នំពេញ ៖ លោកឆឹម សក្កដា មួយរយៈចុងក្រោយនេះឆក់ឱកាសបានធ្វើជាតួឯកឱ្យផលិតកម្មមួយចំនួន ព្រោះតែមានរាងខ្ពស់សង្ហា និងទេពកោសល្យសម្តែងល្អ ។ លើសពីនេះតារាថ្មីរូបនេះ
រាជធានីភ្នំពេញ ៖ លោកឆឹម សក្កដា មួយរយៈចុងក្រោយនេះឆក់ឱកាសបានធ្វើជាតួឯកឱ្យផលិតកម្មមួយចំនួន ព្រោះតែមានរាងខ្ពស់សង្ហា និងទេពកោសល្យសម្តែងល្អ ។ លើសពីនេះតារាថ្មីរូបនេះត្រូវក្រុមហ៊ុន ធំៗមួយចំនួន ទាក់ទងឱ្យថតស្ប៉តពាណិជ្ជកម្មជាបន្តបន្ទាប់ ។
ក្នុងជំនួបជាមួយអ្នកយកព័ត៌មានកោះសន្តិភាពកាលពីពេល ថ្មីៗនេះ លោកឆឹម សក្កដា ឱ្យដឹងថា ឥឡូវនេះរូបលោកមមាញឹកណាស់ ដោយមានកម្មវិធីចេញទៅថតភាពយន្តរហូតទាំងនៅជិតទាំងនៅឆ្ងាយ ។ មមាញឹកនឹងអាជីពបែបនេះ ធ្វើឱ្យលោកសក្កដា បាក់កម្លាំងនិងចុះស្គម ។ ទោះជាយ៉ាងណាក៏ដោយ លោកសក្កដាចាត់ទុកថានេះជាឱកាសដែលត្រូវបង្វឹកខ្លួនឱ្យមានបទពិសោធន៍ក្នុងវិស័យសិល្បៈ ។
ចំពោះការច្រៀង ឬបង្ហាញម៉ូដក៏លោកឆឹម សក្កដា ចាប់យកដែរ ។ ជាពិសេសលោកសក្កដា មានបំណងចង់ក្លាយជាអ្នកចម្រៀង និងអ្នកនិពន្ធមួយរូបដោយសារតែលោកមានទឹកដមសំឡេងពីរោះពីធម្មជាតិ ។ ទោះជាយ៉ាងណាក្តី លោកសក្កដា មិនទាន់ទុកចិត្តលើសមត្ថភាពច្រៀងរបស់ខ្លួនឯងបាន ដូច្នេះខិតខំហាត់រៀនសិន ។ បើក្លាយជាអ្នកចម្រៀងលោកសក្កដាតាំងចិត្តមិនយកបទចម្លងពីបរទេសមកច្រៀងទេ ព្រោះលោកអាចមានសមត្ថភាពនិពន្ធបទចម្រៀងខ្លួនឯងបាន ។
ចំពោះការថតស្ប៉តពាណិជ្ជកម្មវិញ មានក្រុមហ៊ុនធំពី៥ទៅ៦ក្រុមហ៊ុន ទាក់ទងលោកឆឹម សក្កដាឱ្យថត ក្នុងនោះមានក្រុមហ៊ុនវីងផងដែរ ។ លោកសក្កដាមិនដឹងថាការចាប់អារម្មណ៍ពីក្រុមហ៊ុនល្បីមកលើរូបលោកមកពីហេតុអ្វីឡើយ ព្រោះលោកមិនស្គាល់គ្នានៅខាងក្រៅទេ តែអាចគេពេញចិត្តរូបរាង ទម្រង់មុខ កម្ពស់ និងទេពកោសល្យសម្តែងរបស់លោក ។
លោកឆឹម សក្កដា យល់ថា អ្នកសិល្បៈមានរូបសម្បត្តិស្អាតសង្ហា តែសម្តែងអត់ល្អ មិនអាចលូតលាស់ទៅមុខបានទេ ។ ម្យ៉ាងទៀត ត្រូវមានអត្តចរិតល្អ ស្គាល់ចាស់ទុំ រួសរាយ និងគោរពការងារ គោរពពេលវេលា ទើបរុញឱ្យលូតឡើង តែបើមិនដូច្នោះទេគឺពិតជាមិនអាចលូតទៅមុខបានឡើយ ។ លោកសក្កដា ពេលទៅថត ម្តងៗ បើសិនគេណាត់ម៉ោងណាត្រូវទៅដល់មុនម៉ោង ឬស្មើម៉ោងណាត់ ។
លោកឆឹម សក្កដា ទើបតែបង្ហាញស្នាដៃក្នុងខ្សែភាពយន្តរឿង «ហ្វេសប៊ុកផ្តាច់វិញ្ញាណ» របស់ផលិតកម្មអភិមង្គល កាលពីពេល ថ្មីៗកន្លង មក ។ ពេលនេះលោកកំពុងតែថតរឿងថ្មីបន្តទៀត ។ លោកសក្កដាអាចសម្តែងបានច្រើនទម្រង់ធ្វើឱ្យអ្នកដឹកនាំរឿងយល់ថា នៅពេលខាងមុខ លោកអាចល្បីឈ្មោះដូចជាតារារៀមច្បង ។
តារាមានប្រភពពីស្រុកជើងព្រៃ ខេត្តកំពង់ចាមរូបនេះ យល់ថា ដោយត្រូវឆ្លងកាត់ការហាត់ពត់ និងរៀនតាមរៀមច្បងជាច្រើនឆ្នាំទៀត ទើបអាជីពលូតលាស់បានល្អ ៕
ចែករំលែកព័តមាននេះ