បន្ទាយមានជ័យ៖តាមប្រភពពីអាជីវករខ្មែរលក់ដូរនៅផ្សាររុងក្លឿស្រុកអារញ្ញ ខេត្តស្រះកែវបានប្រាប់កោះសន្តិភាពកាលពីវេលាម៉ោងជិត៤រសៀលថ្ងៃទី៥ ខែមិនា ឆ្នាំ២០១៥ថាតម្រួតនិងទាហានឈុតខ្មៅថៃបានហាមឃាត់ប៉ូលិសខេត្តស្រះកែវថៃដូចគ្នាជាលើកដំបូងមិនឲ្យដើរប្រមូលប្រាក់ពីតូបអាជីវករខ្មែរ
បន្ទាយមានជ័យ៖តាមប្រភពពីអាជីវករខ្មែរលក់ដូរនៅផ្សាររុងក្លឿស្រុកអារញ្ញ ខេត្តស្រះកែវបានប្រាប់កោះសន្តិភាពកាលពីវេលាម៉ោងជិត៤រសៀលថ្ងៃទី៥ ខែមិនា ឆ្នាំ២០១៥ថាតម្រួតនិងទាហានឈុតខ្មៅថៃបានហាមឃាត់ប៉ូលិសខេត្តស្រះកែវថៃដូចគ្នាជាលើកដំបូងមិនឲ្យដើរប្រមូលប្រាក់ពីតូបអាជីវករខ្មែរនៅផ្សាររុងក្លឿនោះទេ ។
ប្រភពបន្តថាមុនហេតុការណ៍កើតឡើងនៅចំណុចផ្សារថ្មីផ្សាររុងក្លឿមានជនស្លៀកពាក់ស៊ីវិលមួយក្រុមប្រហែល១០នាក់អះអាងថាពួកគេជាប៉ូលិសខេត្តស្រះកែវបានដើរប្រមូលប្រាក់ពីតូបអាជីវករដោយតូបខ្លះអស់១០០បាតនិងតូបខ្លះអស់២០០បាតនិងតូបខ្លះថាអស់៣០០បាតព្រោះតែគ្រប់គ្នាខ្លាចរឿងឆែកឆេរចាប់ទំនិញតាមតូបពាក់ព័ន្ធការចោទប្រកាន់លើទំនិញរំលោភកម្មសិទ្ធបញ្ញា ។ ប្រភពដដែលបន្តថាលុះក្រុមស៊ីវិលនោះកំពុងដើរប្រមូលប្រាក់ពីតូបអាជីវករខ្មែរបានមួយចំនួនស្រាប់តែដឹងដំណឹងដល់តម្រួតនិងទាហានឈុតខ្មៅថៃដែលប្រចាំការនៅក្បែរច្រកទ្វារអន្តរជាតិខ្លងលឹកឈមទឹកដីកម្ពុជាច្រកទ្វារអន្តរជាតិប៉ោយប៉ែត ។ ភ្លាមនោះតម្រួតនិងទាហានឈុតខ្មៅ ក៏បានចុះទៅដល់កន្លែងកើតហេតុធ្វើឲ្យក្រុមស្លៀកពាក់ស៊ីវិលដែលអះអាងថាជាប៉ូលិសខេត្តស្រះកែវនោះមួយចំនួនគេចខ្លួននិង៣ទៅ៤នាក់ត្រូវហៅឡើងរថយន្តយកទៅបន្ទាយទាហានឈុតខ្មៅក្បែរផ្សាររុងក្លឿផងដែរ ។ ប្រភពបានបញ្ចាក់បន្ថែមថាទាហានឈុតខ្មៅបានធ្វើការណែនាំហាមដល់មនុស្សមួយក្រុមដែលហៅឡើងរថយន្តនោះឲ្យបញ្ឈប់ការដើរប្រមូលប្រាក់ពីតូបអាជីវករខ្មែរតទៅទៀត ។
ទោះជាយ៉ាងណាជុំវិញប្រភពព័ត៌មានខាងលើលោកនេត សារីអគ្គកុងស៊ុលខ្មែរប្រចាំខេត្តស្រះកែវប្រទេសថៃមិនអាចទាក់ទងសុំការបំភ្លឺបានទេព្រោះទូរស័ព្ទរបស់លោកចុចមិនចូល ៕
ចែករំលែកព័តមាននេះ