រាជធានីភ្នំពេញ ៖ ដោយចង់ចូលរួមជួយដល់អ្នកមានជីវភាពខ្វះខាត និងជួយរំលែកការលំបាកមួយចំនួន កូនប្រុសរបស់កវីគង្គ ប៊ុនឈឿន បានបង្កើតមូលនិធិសម្រាប់ជួយដល់ជនទាំងនោះ ។
រាជធានីភ្នំពេញ ៖ ដោយចង់ចូលរួមជួយដល់អ្នកមានជីវភាពខ្វះខាត និងជួយរំលែកការលំបាកមួយចំនួន កូនប្រុសរបស់កវីគង្គ ប៊ុនឈឿន បានបង្កើតមូលនិធិសម្រាប់ជួយដល់ជនទាំងនោះ ។ កូនប្រុសពៅរបស់លោកគង្គ ប៊ុនឈឿន រូបនេះបានបង្កើតក្រុមតន្ត្រីមួយឈ្មោះ «ក្រុមតន្ត្រីប្រហុក» ។
ថ្លែងប្រាប់អ្នកយកព័ត៌មានកាលពីព្រឹកថ្ងៃទី២ មីនា ឆ្នាំ២០១៥ លោកមុត ថារី អតីតតារាសម្តែង និងជាអ្នកដឹកនាំរឿងប្រចាំផលិតកម្មមុត ថារី ភាពយន្ត ឱ្យដឹងកាលពីពេល ថ្មីៗនេះថាកូនប្រុសពៅរបស់លោកគង្គ ប៊ុនឈឿន និងជាប្អូនថ្លៃរបស់លោកឈ្មោះនិលវឌ្ឍន៍ ប៊ុនឈឿន បច្ចុប្បន្នរស់នៅប្រទេសន័រវែស បានបង្កើតក្រុមភ្លេងឈ្មោះ «ក្រុមតន្ត្រីប្រហុក» ។ ក្រមនេះប្រមូលគ្នាថតចម្រៀងជាបន្តបន្ទាប់ដាក់ឌីស្ត និងបង្ហាញតាមអីុនធើរណេតមានការចាប់អារម្មណ៍ច្រើន ។ គោលដៅដែលបង្កើតវង់តន្ត្រីនេះដើម្បីរកប្រាក់ជួយដល់ជនក្រីក្រ ក្មេងកំព្រា ជនចាស់ជរា នៅក្នុងស្រុកខ្មែរ ។ ក្នុងក្រុមភ្លេងនោះមានចៅប្រុសរបស់លោកគង្គ ប៊ុនឈឿន នៅស្រុកបារាំង ដែលត្រូវជាកូនរបស់លោកមុត ថារី ម្នាក់ដែរ ឈ្មោះមុត ណារីរិទ្ធីយ៉ា ។
ក្រុមតន្ត្រីនេះប្រមូលផ្តុំគ្នាថតចម្រៀងក្នុងពេលវិស្សមកាល ឬយកពេលណាដែលមិនប៉ះពាល់ម៉ោងរៀន សម្រាប់ច្រៀង ។ គម្រោងរបស់ក្រុមនេះ១ឆ្នាំមាន២ខែ គឺសម្តែងខ្លួនឯង ដើម្បីប្រមូលប្រាក់ទុកជួយដល់ជនក្រីក្រ កុមារកំព្រានៅកម្ពុជា ។
លោកមុត ថារី ឱ្យដឹងទៀតថា បន្ទាប់ពីលក់ឌីស្តបានប្រាក់មួយចំនួនមក ក្រុមតន្ត្រីប្រហុកខ្មែរបានសហការជាមួយអ្នកស្រីប៊ុនឈឿន សូរីដា ជាបងស្រីរបស់និលវឌ្ឍន៍ ប៊ុនឈឿន ចែកជូនក្មេង៧០នាក់ និងអ្នកក្រីក្រ១០គ្រួសារកាលពីចុងខែកុម្ភៈ ២០១៥ ។ អំណោយសម្រាប់កុមារមានសៀវភៅ៤ក្បាល ប៊ិក១ ខ្មៅដៃ១ និងប្រាក់៥ពាន់រៀល ចំណែកអ្នកទីទ័លក្រជួយអង្ករ១០គីឡូក្រាម ទឹកស៊ីអីុវ ទឹកត្រី៥ដប ប៊ីចេង ស្ករស និងប្រាក់២ម៉ឺនរៀល ។ នេះជាជំហានដំបូងរបស់ក្រុមតន្ត្រីប្រហុក។ គោលដៅរបស់ក្រុមតន្ត្រីប្រហុកទៅអនាគត គ្រោងជីកស្រះទឹកមួយ ដាក់ឈ្មោះ «ស្រះទឹកកវីម្ចាស់ស្ទឹងសង្កែគង្គ ប៊ុនឈឿន» ។
ចំណែកឪពុកម្តាយក្មេករបស់លោកនិលវឌ្ឍន៍ ប៊ុនឈឿន ដែលជាជនជាតិន័រវែស មានគម្រោងមកជួយសាលានៅស្រុកខ្មែរនាពេលខាងមុខ ។ ក្រុមតន្ត្រីប្រហុកខ្មែរបង្កើតឡើងរយៈពេល២ឆ្នាំមកហើយ ដោយមានសមាជិកជាកូនខ្មែរទាំងអស់ ។
ក្រុមចម្រៀងនេះមានស្ទូឌីយោខ្លួនឯង។ ចម្រៀងកាលណាអត់រូបគឺមិនល្អទេ ដូច្នេះហើយលោកមុត ថារី ចង់ឱ្យរៀបចំបញ្ចូលគ្នាធ្វើជាខារ៉ាអូខេទៀត ។
ក្រុមគ្រួសារ ឬត្រកូលគង្គ ប៊ុនឈឿន រៀបផែនការជួយដល់ជនខ្វះខាតព្រោះលោកគង្គ ប៊ុនឈឿន មានវ័យចាស់ ហើយពេលនេះមិនអាចធ្វើអ្វីជូនសង្គមបានច្រើនទេ ប៉ុន្តែអ្នកនៅមានកម្លាំងត្រូវតែធ្វើ ដោយលោកគង្គ ប៊ុនឈឿន ជាអ្នកឲ្យគំនិត ជូនយោបល់ ។
សព្វថ្ងៃនេះលោកគង្គ ប៊ុនឈឿន រស់នៅប្រទេសន័រវេស ហើយប្រទេសនោះចិញ្ចឹមគាត់ ។ ទោះជាយ៉ាងណាក្តី លោកគង្គ ប៊ុនឈឿន នៅតែសរសេររឿង សេរសេរចម្រៀងដដែល ដូចជា ថ្មីៗនេះគាត់បានសរសេរចម្រៀងមួយបទនិយាយពីកុមារខ្មែរនៅសម័យប៉ុល ពត ។ ទៅមុខទៀតលោកមុត ថារី រៀបចំថតខ្សែភាពយន្តរឿង «បេះដូងក្រៅខ្លួន»ជូនក្រសួងព័ត៌មានដែលជាស្នាដៃនិពន្ធរបស់លោកគង្គ ប៊ុនឈឿន ។ លោកគង្គ ប៊ុនឈឿន នៅតែទៅ-មកស្រុកខ្មែរជាស្រុកកំណើតតែមិនដឹងថា គាត់មករស់នៅស្រុកវិញពេលណាទេ ។
កូនប្រុសពៅលោកគង្គ ប៊ុនឈឿន ឈ្មោះនិលវឌ្ឍន៍ ប៊ុនឈឿន មានការងារផ្នែកទីផ្សារនៅប្រទេសន័រវេស និងការងារសិល្បៈផងដែរ ។ កូនប្រុសពៅរូបនោះបានភ្ជាប់ពាក្យជាមួយជនជាតិន័រវែស និងមានកូនប្រុសម្នាក់ តែមិនទាន់រៀបការនៅឡើយ ដោយសារតែភរិយារបស់គេរៀនមិនទាន់ចប់មានអាយុទើបតែជាង២០ឆ្នាំប៉ុណ្ណោះ ៕
ចែករំលែកព័តមាននេះ