រាជធានីភ្នំពេញ ៖ ជាតិហ្គាសផ្ទុះសាយភាយចេញពីភូមិគ្រឹះដ៏អាថ៌កំបាំងមួយកន្លែងដែលបិទទ្វារមិនដែលឃើញបើក ធ្វើឱ្យប្រជាពលរដ្ឋក្បែរខាងបាននាំគ្នាភ័យស្លន់ស្លោ ហើយនាំគ្នាទៅបិទទ្វារផ្ទះ និងចង្គ្រានគ្រប់គ្នាចៀសវាងការកើតមានអគ្គិភ័យជាយថាហេតុ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១០ និង១៥នាទីព្រឹក ថ្ងៃទី២១ មករា ២០១៥ នៅក្នុងក្រុមទី១៧ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ហើយសមត្ថកិច្ច និងអាជ្ញាធរមូលដ្ឋានក៏បានចុះទៅកន្លែងកើតហេតុភ្លាមៗ តែពុំត្រូវម្ចាស់អនុញ្ញាតឱ្យចូលឡើយ គឺគ្រាន់តែប្រាប់ថា ធ្លាយធុងហ្គាសដាំបាយតែប៉ុណ្ណោះ។
តាមប្រជាពលរដ្ឋនៅក្បែរខាងបានឱ្យដឹងថា គេឃើញជាតិហ្គាសដូចផ្សែងបានហើរឡើងទៅលើអាកាស និងធុំក្លិនស្អុយ សាយភាយពេញភូមិធ្វើឱ្យពួកគាត់មានការភិតភ័យយ៉ាងខ្លាំងពីសុវត្ថិភាព និងនាំគ្នាបិទទ្វារពន្លត់ភ្លើងបាយខ្លាចកើតមានអគ្គិភ័យជាយថាហេតុ ព្រោះផ្ទះខាងលើជាកន្លែងស្តុក និងបញ្ចូលហ្គាសដើម្បីចែកចាយនៅទីផ្សារ។
តាមប្រជាពលរដ្ឋបានឱ្យដឹងទៀតថា ភូមិគ្រឹះខាងលើមានម្ចាស់ជាអាជីវករលក់ហ្គាសយីហោរស្មីទួលសង្កែ ហើយបានដឹកហ្គាសតេលា យកទៅស្តុកទុកដើម្បីបញ្ចូលទុកចែកចាយ។ នៅមុនពេលកើតហេតុមានរថយន្តដឹកធុងហ្គាសមួយគ្រឿងបានចូលក្នុងភូមិគ្រឹះនោះស្រាប់តែហ្គាសបានធ្លាយចេញមកក្រៅបង្កឱ្យមានការភ្ញាក់ផ្អើល ហើយម្ចាស់បាននាំគ្នាយកបំពង់បាញ់ពន្លត់ផងដែរ។ ទោះបីជាយ៉ាងណាគេពុំដឹងពីមូលហេតុនៃការធ្លាយហ្គាសនោះឡើយ ដោយម្ចាស់បានបិទទ្វារជិតប្រាប់សមត្ថកិច្ចថា មិនមានបញ្ហាអ្វីនោះទេ។
ទាក់ទិនហេតុការណ៍នេះ ប្រជាពលរដ្ឋក៏បានសំណូមពរដល់អាជ្ញាធរខណ្ឌឫស្សីកែវមានវិធានការទប់ស្កាត់ ព្រោះការស្តុកទុកហ្គាស់ក្បែរផ្ទះប្រជាពលរដ្ឋអាចបង្កឱ្យកើតមានអគ្គិភ័យ៕
ចែករំលែកព័តមាននេះ