ខេត្តកំពត ៖ អ្នកចម្រៀងចាប៉ីពិការភ្នែកឈ្មោះកែ ពេជ្រ អាយុ៥១ឆ្នាំ រស់នៅភូមិស្លាបតាអោន ឃុំស្វាយទងខាងត្បូង ស្រុកកំពង់ត្រាច ខេត្តកំពត រស់នៅក្នុងជីវភាពក្រលំបាកតោកយ៉ាក ដ្បិតមហាជនមិននិយមរាប់រកជួលគាត់ទៅសម្តែង ។
លោកកែ ពេជ្រ ដឹងតាមឪពុកម្តាយរបស់គាត់ប្រាប់ថា គាត់ពិការភ្នែកតាំងពីអាយុ៣ឆ្នាំមកម្ល៉េះ ។ មូលហេតុបែបអបិយជំនឿត្រូវឪពុកម្តាយអះអាងថា គាត់ពិការភ្នែកដោយសារខុសដូនតា ។
នៅរបបខ្មែរក្រហម លោកកែ ពេជ្រ ស្ថិតក្នុងវ័យកុមារ ហើយអង្គការឱ្យអារអុសជាដៃគូជាមួយកុមារម្នាក់ទៀតដែលមានភ្នែកភ្លឺ ។
ក្រោយថ្ងៃរំដោះរួចរស់ពីរបបប្រល័យពូជសាសន៍ ឪពុកម្តាយបានឱ្យលោកកែ ពេជ្រ ទៅរៀនចាប៉ីពីលោកតាគង់ ណៃ ដែលនៅផ្ទះជិត គ្នា ។ អំឡុងពេលនោះ គាត់រៀនច្រៀងបទប្រពៃណី និងរៀនកូតទ្រផងដែរ ។
បច្ចុប្បន្នគ្រួសាររបស់លោកកែ ពេជ្រ មានជីវភាពខ្សត់ខ្សោយ ព្រោះប្រពន្ធ និងកូនមិនមានជំនាញអ្វីអាចរកប្រាក់កម្រៃបានទេ ។
លោកកែ ពេជ្រ បានរៀបការក្នុងឆ្នាំ១៩៩១ និងមានកូន៦នាក់ ក្នុងនោះប្រុសម្នាក់ ហើយបានបួសជាសង្ឃ ។
ក្នុងអាជីពជាអ្នកចម្រៀងចាប៉ី លោកកែ ពេជ្រ ធ្លាប់ចូលរួមប្រលងទទួលបានជ័យលាភីចំនួន២លើក ។
អ្នកចម្រៀងចាប៉ីពិការភ្នែករូបនេះ បាននិយាយត្អូញត្អែរកាលពីពេល ថ្មីៗនេះថា «ទោះបីជាខ្ញុំបានទទួលជ័យលាភីខាងចាប៉ីក៏ដោយ ក៏មិនមានអ្នកណា ឬអង្គភាពណា ហៅខ្ញុំទៅច្រៀងអ្វីទេ ។ ពេលខ្ញុំវិលត្រឡប់មកផ្ទះវិញស្ងៀមស្ងាត់រយៈពេល២ទៅ៣ឆ្នាំមកហើយ ។ រីឯនៅជនបទឯណោះវិញ ក៏មិនមានគេជួលឱ្យទៅច្រៀងចាប៉ីក្នុងកម្មវិធីអ្វីដែរ ។ និយាយរួមដូចជាគេមិនរាប់រកអ្នកចាប៉ី ប៉ុន្តែខ្ញុំពឹងផ្អែកភ្លេងប្រពៃណីវិញ ព្រោះខ្ញុំមានវង់ភ្លេងប្រពៃណីគ្រាន់បានប្រាក់បន្តិចបន្តួចគ្រាន់សម្រួលជីវភាព» ។
លោកកែ ពេជ្រ បានអំពាវនាវរកការឧបត្ថម្ភដល់គ្រួសារគាត់ ដ្បិតសព្វថ្ងៃគ្មានបង្គន់អនាម័យទេ ។
លោកលន់ រម្យនា ប្រធានការិយាល័យវប្បធម៌ និងវិចិត្រសិល្បៈស្រុកកំពង់ត្រាច ឱ្យដឹងថា អ្នកចាប៉ីដងវែងនៅស្រុកកំពង់ត្រាច មាន២នាក់ ក្នុងនោះលោកកែ ពេជ្រ ធ្លាប់ទទួលជ័យលាភីក្នុងការប្រលង ប៉ុន្តែជីវភាពគ្រួសារគាត់នៅតែខ្វះខាត ៕
ចែករំលែកព័តមាននេះ