រាជធានីភ្នំពេញ ៖ ក្រោយពីចាកចេញពីមណ្ឌលកែប្រែគ្រឿងញៀ.នមក អតីតតារាចម្រៀងយេយេ នាងអ៊ុំ គន្ធា បានអំពាវនាវដល់បណ្តាស្ថានីយទូរទស្សន៍នានាផ្តល់ឱកាសឱ្យនាងបានច្រៀងឡើងវិញ ខណៈពេលដែលសុខភាពរបស់នាងបានប្រសើរជាងមុន ។
រាជធានីភ្នំពេញ ៖ ក្រោយពីចាកចេញពីមណ្ឌលកែប្រែគ្រឿងញៀនមក អតីតតារាចម្រៀងយេយេ នាងអ៊ុំ គន្ធា បានអំពាវនាវដល់បណ្តាស្ថានីយទូរទស្សន៍នានាផ្តល់ឱកាសឱ្យនាងបានច្រៀងឡើងវិញ ខណៈពេលដែលសុខភាពរបស់នាងបានប្រសើរជាងមុន ។
នាងអ៊ុំ គន្ធា ធ្លាក់ខ្លួនញៀនថ្នាំដល់កម្រិត និងផ្ទុកមេរោគកាចសាហាវនៅក្នុងខ្លួន បន្ទាប់ពីនាងបាក់បែកចំណងអាពាហ៍ពិពាហ៍ជាមួយលោកផាន សុផាត ។ ភាពរុងរឿងនៃជីវិតជាតារាចម្រៀងរបស់នាងបានធ្លាក់ក្រខ្សត់រហូតដល់ថ្នាក់បេះត្រកួន និងរាវខ្យង ខ្ចៅ លក់ដើម្បីចិញ្ចឹមម្តាយ និងកូនពីរនាក់ក្នុងបន្ទុក ។
អតីតតារាចម្រៀងអ៊ុំ គន្ធា ត្រូវក្រុមគ្រួសាររួមសហការជាមួយសមាគមសិល្បករខ្មែរដែលមានលោកសុះ ម៉ាច ជាប្រធាននាំយកទៅមណ្ឌលកែប្រែ ដើម្បីធ្វើយ៉ាងណាឲ្យនាងទទួលបានសភាពដូចធម្មតាវិញ ។ ក្រោយពីបានចូលមណ្ឌលក្រែប្រែគ្រឿងញៀនមួយរយៈមក នាងអ៊ុំ គន្ធា បានវិលមករកសភាពដើមវិញ ហើយនាងបានអង្វរករដល់ក្រុមគ្រួសារត្រឡប់ទៅផ្ទះវិញ ដើម្បីរកការងារធ្វើសម្រាប់ផ្គត់ផ្គង់គ្រួសារ ។
ការថែរក្សាសុខភាព និងព្យាយាមផ្តាច់ចេញឲ្យឆ្ងាយពីសារជាតិញៀន ធ្វើឱ្យនាងអ៊ុំ គន្ធា វិលមកសភាពដើមវិញ ។ ទន្ទឹមនេះនាងបានអំពាវនាវដល់ស្ថានីយទូរទស្សន៍នានា ផ្តល់ឱកាសដល់នាងបានចូលរួមច្រៀងផង ដើម្បីបានកម្រៃចិញ្ចឹមជីវិត ។
ប្រធានសមាគមសិល្បករខ្មែរ លោកសុះ ម៉ាច អះអាងប្រាប់កោះសន្តិភាពតាមទូរស័ព្ទកាលពីថ្ងៃទី១៨ ខែធ្នូ ឆ្នាំ២០១៤ ថា បច្ចុប្បន្នអ្នកនាងអ៊ុំ គន្ធា បានវិលមករកសភាពដើមច្រើនហើយ បន្ទាប់ពីនាងចេញពីមណ្ឌលក្រែប្រែមួយរយៈមកនេះ ។ ឆ្លងកាត់ការលំបាក ទីបំផុតនាង អ៊ុំ គន្ធា ត្រូវអង្គការមួយដែលតែងតែផ្តល់ថ្នាំឲ្យនាងលេបជារៀងរាល់ខែទទួលយកឲ្យទៅធ្វើការនៅទីនោះ ដោយក្នុងមួយខែបានប្រាក់៣០០ដុល្លារ ។ ទន្ទឹមនឹងទទួលបានប្រាក់ខែពីអង្គការនោះ នាងអ៊ុំ គន្ធា ទទួលបានប្រាក់ឧបត្ថម្ភចំនួន១០០ដុល្លារបន្ថែមទៀតសម្រាប់ការសិក្សារបស់កូននាង ពីមិត្តភក្តិម្នាក់របស់លោក ។
បើតាមការបញ្ជាក់ពីលោកសុះ ម៉ាច បើទោះបីជានាងអ៊ុំ គន្ធា ទទួលបានប្រាក់ខែក្នុងកម្រិតនោះក៏ដោយ ក៏វានៅមិនទាន់អាចឆ្លើយតបបាន សម្រាប់ការផ្គត់ផ្គង់ជីវភាពគ្រួសារនាងទេ ។ ដូច្នេះហើយនាងគន្ធាបានពឹងពាក់លោកសុះ ម៉ាច ជួយសុំបណ្តាស្ថានីយទូរទស្សន៍នានាឲ្យផ្តល់ឱកាសដល់នាងចូលរួមច្រៀង ដើម្បីបានប្រាក់កម្រៃសម្រាប់ទប់ទល់ជីវភាពគ្រួសាររបស់នាង ។
ក្នុងនាមប្រធានសមាគមសិល្បករខ្មែរលោកសុះ ម៉ាច អំពាវនាវដល់បណ្តាស្ថានីយទូរទស្សន៍នានាឱ្យផ្តល់ឱកាសដល់នាងអ៊ុំ គន្ធា បានចូលរួមច្រៀងផង បន្ទាប់ពីនាងខកខានអស់ជាច្រើនឆ្នាំមកហើយ ។
លោកសុះ ម៉ាច បញ្ជាក់ថា តាមតែលោកសង្កេតសុខភាពរបស់នាងអ៊ុំ គន្ធា ទំនងជាមិនមានបញ្ហាសម្រាប់ការឡើងច្រៀងឡើយ ខណៈដែលសាច់ឈាម និងពណ៌សម្បុររបស់នាងស្រស់ថ្លាជាងមុន ៕
ចែករំលែកព័តមាននេះ