ខេត្តបន្ទាយមានជ័យ ៖ កម្លាំងនគរបាលស្រុកមង្គលបូរីចាប់បានជនសង្ស័យម្នាក់បានធ្វើសកម្មភាពចែកចាយគ្រឿងញៀនយ៉ាងសកម្មនៅក្នុងស្រុកមង្គលបូរី និងបានដកហូតបានវត្ថុតាងគ្រឿងញៀន ប្រភេទម្ស៉ៅក្រាមពណ៌ស ចំនួន៧ថង់តូច ព្រមទាំងវត្ថុតាងជាច្រើនទៀត ។ប្រតិបត្តិការបង្ក្រាបនេះ នៅវេលាម៉ោង១១ព្រឹក ថ្ងៃទី២៨ ខែវិច្ឆិកា ឆ្នាំ២០១៤ ស្ថិតនៅភូមិគោកស្វាយ ឃុំឬស្សីក្រោក ដឹកនាំដោយលោក ស៊ី ឌី អធិការដ្ឋាននគរបាលស្រុកមង្គលបូរី ។
លោកអធិការបានប្រាប់ឲ្យដឹងថា ក្រោយពីបានកម្លាំងរបស់លោកបានឃាត់ខ្លូនជនសង្ស័យយកមកសាកសួរនាំនៅអធិការដ្ឋាននគរបាលស្រុក គេបានសារភាពចំពោះមុខច្បាប់ថា ខ្លួនពិតជាបានធ្វើសកម្មភាពចែកចាយគ្រឿងញៀនពិតប្រាកដមែន ។
ជនសង្ស័យត្រូវបានសមត្ថកិច្ចឃាត់ខ្លួនមានឈ្មោះ សាយ ពេជ្រ ភេទប្រុស អាយុ៣២ឆ្នាំ រស់នៅភូមិកើតហេតុខាងលេី បន្ទាប់មកសមត្ថកិច្ច បានដកហូតគ្រឿងញៀនប្រភេទម្ស៉ៅក្រាម ពណ៌ស ចំនួន7ថង់តូចនិងទូរស័ព្ទចំនួន៤គ្រឿង ថវិការចំនួន១០ម៉ឺនរៀល កាបូបតូចចំនួន៣ដែកកេះ ចំនួន៤បំពង់សំរាប់ប្រើប្រាស់ចំនួន២ ។ ក្រោយពីឃាត់ខ្លួនជនសង្ស័យរួចមក សមត្ថកិច្ចបានបន្តទៅឆែកឆេរ លំនៅដ្ឋានជនសង្ស័យ តាមបទបញ្ជារបស់លោកឧត្តមសេនីយ៍ត្រី អាត់ ខែម ស្នងការខេត្ត និងតាមបញ្ជារបស់ព្រះរាជអាជ្ញារងផាន់ ភីរម្យ ផងដែរ ។ លោកបានបន្តថា លុះវេលាម៉ោង១២និង១០នាទីថ្ងៃត្រង់ ក្រោយពីបានឆែកឆេរនៅលំដ្ឋានជនសង្ស័យបានរកឃើញ និងដកហូតបន្ថែម បានវត្ថុតាងជាទូរស័ព្ទដៃចំនួន៩គ្រឿង និងជញ្ជីងអេឡិចត្រូនិកសំរាប់ថ្លឹងគ្រឿងញៀនចំនួន១ថែមទៀតផង ។
បច្ចុប្បន្នជនសង្ស័យ រួមទាំងវត្ថុតាងទាំងអស់ខាងលើសមត្ថកិច្ចនគរបាលជំនាញកំពុងកសាងសំណុំរឿងបញ្ជូនទៅកាន់ស្នងការខេត្តនារសៀលថ្ងៃទី២៨វិច្ឆិកានេះ ដើម្បីចាត់ការបន្តតាមនិតិវិធីច្បាប់តែម្តង ។
ចែករំលែកព័តមាននេះ