រាជធានីភ្នំពេញ ៖ មកុដជ័យលាភីកញ្ញាឯកទេសចរណ៍អន្តរជាតិកម្ពុជាឆ្នាំ២០១៤ បានទៅលើកញ្ញាថន ស្រីណៃ ។ ពិធីប្រកួតផ្តាច់ព្រ័ត្រធ្វើឡើងកាលពីរាត្រីថ្ងៃទី២៣ វិច្ឆិកា ២០១៤ នៅសណ្ឋាគារណាហ្គាវើល រាជធានីភ្នំពេញ ដោយក្រុមហ៊ុន Aplus Asia Network ជាអ្នករៀបចំបានអញ្ជើញតំណាងពី
រាជធានីភ្នំពេញ ៖ មកុដជ័យលាភីកញ្ញាឯកទេសចរណ៍អន្តរជាតិកម្ពុជាឆ្នាំ២០១៤ បានទៅលើកញ្ញាថន ស្រីណៃ ។ ពិធីប្រកួតផ្តាច់ព្រ័ត្រធ្វើឡើងកាលពីរាត្រីថ្ងៃទី២៣ វិច្ឆិកា ២០១៤ នៅសណ្ឋាគារណាហ្គាវើល រាជធានីភ្នំពេញ ដោយក្រុមហ៊ុន Aplus Asia Network ជាអ្នករៀបចំបានអញ្ជើញតំណាងពីក្រសួងវប្បធម៌ និងវិចិត្រសិល្បៈ ក្រសួងព័ត៌មាន អ្នកការទូត និងជាពិសេសកញ្ញាឯកទេសចរណ៍អន្តរជាតិ កញ្ញា Tan Sri Danny Ooi ជាភ្ញៀវកិត្តិយស ។
អ្នកគ្រប់គ្រងប្រចាំប្រទេសកម្ពុជានៃក្រុមហ៊ុន Aplus Asia Network លោក Alger Keh មានប្រសាសន៍ថា គោលបំណងនៃការជ្រើសរើសកញ្ញាឯកទេសចរណ៍អន្តរជាតិកម្ពុជានេះ ដើម្បីលើកកម្ពស់វប្បធម៌កម្ពុជា និងលើកទឹកចិត្តស្ត្រីកម្ពុជាឱ្យចូលរួមក្នុងការប្រកួតប្រជែងលើឆាកអន្តរជាតិ និងផ្តល់សិទ្ធិអំណាចដល់ពួកគេនៅក្នុងសង្គម ។ ការប្រកួតវគ្គចុងក្រោយនេះមានបេក្ខនារី២៣រូបប្រកួតប្រជែង ដោយមានការចូលរួមវិនិច្ឆ័យផ្តល់ពិន្ទុទាំង៨ចំណុចរបស់គណៈមេប្រយោគ ដែលយោងទៅលើសម្រស់ ភាពទាក់ទាញ ដំណើរ ទេពកោសល្យ របៀបស្លៀកពាក់បែបប្រពៃណី របៀបស្លៀកពាក់ផ្លូវការ របៀបឈរ ព្រមទាំងកិច្ចសម្ភាសបុគ្គលដោយផ្ទាល់ ។
លោកស្រីម៉ិញ កុសនី រដ្ឋលេខាធិការក្រសួងវប្បធម៌ និងវិចិត្រសិល្បៈ មានប្រសាសន៍ថា «ក្នុងនាមជាមន្ត្រីមកពីក្រសួងវប្បធម៌ និងវិចិត្រសិល្បៈ ពិតជាមានមោទនភាពដោយបានដឹងថា ក្រុមហ៊ុនបរទេសនៅកម្ពុជា គឺក្រុមហ៊ុន Aplus Asia Network ព្យាយាមជួយដល់ប្រទេសកម្ពុជាតាមរយៈការរៀបចំការប្រឡងជ្រើសរើសសម្រស់របស់នារីកម្ពុជា ។ ក្រសួងវប្បធម៌សូមលើកទឹកចិត្តដល់បេក្ខនារីដែលឈ្នះក្នុងការប្រកួតនេះ ដែលនឹងលើកស្ទួយដល់វិស័យសម្រស់នៅកម្ពុជា ។ ពេលនេះយើងមានតារាម៉ូដែល ជាអ្នកតំណាងឱ្យប្រទេសកម្ពុជាជាអន្តរជាតិ នៅពេលដែលគាត់ចូលរួមក្នុងការប្រកួតប្រជែងតារាម៉ូដែល ដែលជាលក្ខណៈអន្តរជាតិនៅប្រទេសម៉ាឡេស៊ី ដើម្បីលើកកម្ពស់វិស័យទេសចរណ៍ វប្បធម៌ និងមិត្តភាព ។ លើសពីនេះ មានបេក្ខនារីខ្លះជានិស្សិតមកពីសាកលវិទ្យាល័យនានា ខ្លះជាតារាម៉ូដែល ខ្លះមានជំនាញវិជ្ជាជីវៈ និងខ្លះបានបញ្ចប់ការសិក្សា និងខ្លះជាវេជ្ជបណ្ឌិតដែលបញ្ជាក់ថា នារីខ្មែរពិតជាឆ្លាត និងក្លាហានប្រកបដោយចំណេះដឹង» ។
ព្រឹត្តិការណ៍ជ្រើសរើសកញ្ញាឯកទេសចរណ៍អន្តរជាតិ មានប្រទេសចូលរួមប្រមាណពី៦០ ទៅ៨០ប្រទេសក្នុងពិភពលោក ដោយបញ្ជូនតំណាងរបស់ខ្លួនដើម្បីចូលរួម ។ ការប្រកួតប្រជែងកញ្ញាឯកទេសចរណ៍អន្តរជាតិ លើកទី១៨ នឹងចាប់ផ្តើមនៅថ្ងៃទី៣១ ធ្នូ ២០១៤ នៅប្រទេសម៉ាឡេស៊ី ។ ដោយផ្អែកលើការរៀបចំ ពីមុននៃការជ្រើសរើសបេក្ខនារីក្នុងវគ្គផ្តាច់ព្រ័ត្រ គណៈកម្មការបានជ្រើសរើសបេក្ខនារីដែលផ្អែកទៅលើមូលដ្ឋានមនោគម ភាពទាក់ទាញ និងភាពឆ្លាតវៃរបស់ពួកនាង មិនមែនគ្រាន់តែផ្អែកទៅលើភាពស្រស់ស្អាតមួយទេ ។ អ្នកដែលឈ្នះនឹងត្រូវធ្វើដំណើរជាអ្នកតំណាងឱ្យកម្ពុជា ទៅប្រកួតជាលក្ខណៈពិភពលោកវគ្គផ្តាច់ព្រ័ត្រសម្រាប់៣សប្តាហ៍ក្នុងការលើកកម្ពស់វិស័យទេសចរណ៍ វប្បធម៌ និងមិត្តភាព ។
បេក្ខនារីជ័យលាភី៨រូបដែលចូលដល់វគ្គចុងក្រោយបានទទួលរង្វាន់ប្រាក់សុទ្ធ និងអាហារូបករណ៍ ។ ចំណែកជ័យលាភីលេខ១ នឹងបានធ្វើដំណើរទៅប្រទេសម៉ាឡេស៊ី រយៈពេល២២ថ្ងៃ នាខែធ្នូ ក្រោមការឧបត្ថម្ភគ្រប់យ៉ាងដើម្បីចូលរួមប្រកួតកញ្ញាឯកទេសចរណ៍អន្តរជាតិពិភពលោកលើកទី១៨ ដ៏អស្ចារ្យ ។ លើសពីនេះទទួលបានសំបុត្រយន្តហោះសម្រាប់ធ្វើដំណើរត្រឡប់មកវិញ អាហារគ្រប់ពេលធ្វើដំណើរទៅណាមកណា និងការស្នាក់នៅក្នុងសណ្ឋាគារលំដាប់ផ្កាយ៥ ដែលមានតម្លៃសរុបជាង១៥.០០០ដុល្លារអាមេរិក ។
ជ័យលាភីគ្រងមកុដកញ្ញាឯកទេសចរណ៍ អន្តរជាតិកម្ពុជាឆ្នាំ២០១៤នេះ គឺកញ្ញាថន ស្រីណៃ ពាក់ស្លាកលេខ១៩ ។ ចំណាត់ថ្នាក់លេខលេខ២ កញ្ញាពិសិដ្ឋ រ៉ូស្សា ជាអ្នកបម្រើការនៅលើយន្តហោះ ។ ចំណាត់ថ្នាក់លេខ៣ កញ្ញាអៀម ច័ន្ទពិសី មានកម្ពស់១,៦៤ម៉ែត្រ ជាគ្រូបង្រៀន ។
ម្ចាស់ជ័យលាភីកញ្ញាឯកទេសចរណ៍អន្តរជាតិកម្ពុជាឆ្នាំ២០១៤ ដែលគ្រងមកុដក្នុងទឹកមុខស្រស់សោភា បានថ្លែងថា «មនុស្សយើងត្រូវតែមានក្តីស្រមៃ បើមានក្តីស្រមៃនោះពិតជាមានទឹកចិត្តតស៊ូ ហើយទទួលបានជ័យលាភី និងអាចយកជ័យជម្នះរាល់ការលំបាកបាន ។ នេះជាគោលគំនិតដែលនាងខ្ញុំតែងតែនឹកគិត ហើយពិតជាផ្តល់តម្លៃដល់រូបនាងខ្ញុំស្ទើរតែនឹកនិយាយមិនចេញ ។
នាងខ្ញុំសូមអរគុណដល់អ្នករៀបចំកម្មវិធីដែលបង្កើតកម្មវិធីនេះឡើងឱ្យស្ត្រីខ្មែរមានឱកាសបង្ហាញភាពក្លាហានលើឆាកជាតិ និងអន្តរជាតិ ។ នាងខ្ញុំនឹងខិតខំបង្ហាញទេពកោសល្យជាបន្តទៀតនៅពេលប្រកួតលំដាប់ពិភពលោក ដើម្បីផ្សព្វផ្សាយពីវិស័យទេសចរណ៍ នៅក្នុងប្រទេសកម្ពុជា និងតំបន់ទាក់ទាញដូចជាអង្គរវត្ត និងឆ្នេរសមុទ្រកម្ពុជាជាដើម» ៕
ចែករំលែកព័តមាននេះ