រាជធានីភ្នំពេញ៖ តំណាងរាស្រ្តក្រុងឡូវែល រដ្ឋម៉ាស្សាជូសេតសហរដ្ឋអាមេរិក លោក ម៉ុម រ៉ាឌី ដែលមានដើមកំណើតខ្មែរបានសម្រក់ទឹកភ្នែក ខណៈលោកនិងសមាជិកព្រឹទ្ឋសភា មកពីបក្សប្រឆាំងព្រមទំាងក្រុមអ្នកភូមិបឹងកក់សរុបជិត២០០នាក់ បានជិះរថយន្តប្រមាណ១០គ្រឿង និង រ៉ឺម៉កតុកៗ៣០គ្រឿង ទៅតវ៉ាទាមទារឲ្យមានការដោះលែងអតីតអ្នកភូមិបឹងកក់ និងលោក មាជ សុវណ្ណារ៉ា ប្រធាននាយកដ្ឋានប្រព័ន្ឋផ្សព្វផ្សាយព័ត៌មានរបស់គណបក្សសង្គ្រោះជាតិ នៅពន្ឋនាគារព្រៃ.ស ។
បើតាមអ្នកឆ្លើយឆ្លងព័ត៌មានកោះសន្តិភាពដែលបាននិងកំពុងមានវត្តមាននៅក្នុងព្រឹត្តិការណ៍នេះបានបញ្ជាក់ទៀតថា នៅក្នុងពេលដែលក្រុមអ្នកភូមិបឹងកក់បានស្រែកតវ៉ា គេឃើញលោក ម៉ុម រ៉ាឌី បានបីកូនអ្នកជាប់ពន្ឋនាគារម្នាក់ និងប្រុងថ្លែងសារមួយ ប៉ុន្តែលោកបានស្រក់ទឹកភ្នែកអួលដើម.កនិយាយមិនរួច ។
សេចក្តីរាយការណ៍បានបន្តថា ក្រុមអ្នកតវ៉ានៅព្រឹកថ្ងៃទី២៣ វិច្ឆិកា ២០១៤ បានដើរក្បួនពីម-២ ឆ្ពោះទៅម-១ (ពន្ឋនាគារព្រៃ.ស) និងមានការស្រែកតវ៉ា ប៉ុន្តែពុំមានអំពើហិង្សាណាមួយកើតមានឡើងទេ ទោះជាអនុរក្សពន្ឋនាគារ និងកម្លំាងសមត្ថកិច្ចជាច្រើន ត្រូវបានគេដាក់ពង្រាយ និងការពារគោលដៅចូលពន្ឋនាគារនោះក្តី ។
គួរបញ្ជាក់ថា អ្នកភូមិបឹងកក់០៧នាក់បានត្រូវសមត្ថកិច្ចឃាត់ខ្លួននិងត្រូវតុលាការបង្គាប់ឲ្យឃុំខ្លួនក្នុងពន្ឋនាគារព្រៃ.សបណ្តោះអាសន្ន ពាក់ព័ន្ឋនឹងបទចោទរារំាងបង្កឧបសគ្គដល់ចរាចរណ៍សាធារណៈ បន្ទាប់ពីអ្នកភូមិទំាង០៧នាក់ ក្នុងចំណោមអ្នកភូមិជាច្រើននាក់ទៀត បានទៅតវ៉ាបិទផ្លូវសុំឲ្យសាលាក្រុងដោះស្រាយទឹកជន់លិចផ្ទះកាលពីថ្ងៃទី១០ វិច្ឆិកា ២០១៤ ។ចំណែក លោក មាជ សុវណ្ណារ៉ា បានត្រូវសមត្ថកិច្ចឃាត់ខ្លួនតាមដីកាតុលាការកាលពីថ្ងៃទី១១ វិច្ឆិកា ២០១៤ គឺមួយថ្ងៃបន្ទាប់ពីការឃាត់ខ្លួនក្រុមអ្នកអតីតភូមិបឹងកក់ខាងលើ ពាក់ព័ន្ឋនឹងអំពើហិង្សានៅទីលានប្រជាធិបតេយ្យកាលពីថ្ងៃទី១៥ កក្កដា ២០១៤ ។
សេចក្តីរាយការណ៍នៅប៉ុន្មាននាទីមុននេះ ក្រុមសមត្ថកិច្ចមិនអនុញ្ញាតឲ្យក្រុមអ្នកតវ៉ាចូលក្នុងពន្ឋនាគារនោះទេ ៕
ចែករំលែកព័តមាននេះ