រាជធានីភ្នំពេញ ៖ ក្រុមការងារដែលបើកកិច្ចប្រជុំពិភាក្សាត្រីភាគី មានភាគីនិយោជក៩នាក់ និយោជិត៩នាក់(សហជីព) និងរាជរដ្ឋាភិបាល៩នាក់ពីរឿងប្រាក់ឈ្នួលអប្បបរមាកម្មករ សម្រាប់ឆ្នាំ២០១៥ ចាប់ពីថ្ងៃទី២០ តុលា រហូតមកដល់ថ្ងៃទី៣០ តុលា នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ មិនទាន់មានលទ្ធផលជាផ្លូវការនៅឡើយ ។ ប៉ុន្តែក្រុមសហជីពមានសុទិដ្ឋិនិយមថា ប្រាក់ឈ្នួលអប្បបរមាកម្មករនិយោជិតនឹងលើសពីចំនួន១២១ដុល្លារ ដែលរាជរដ្ឋាភិបាលកំណត់ ។
ការមានសុទិដ្ឋិនិយមរបស់ក្រុមសហជីពបានធ្វើក្រោយកិច្ចប្រជុំបិទទ្វារបញ្ចប់របស់ក្រុមការងារត្រីភាគី កាលពីថ្ងៃទី៣០ តុលា កន្លងមក ។ ក្នុងកិច្ចប្រជុំត្រីភាគីលើកចុងក្រោយ ភាគីនិយោជក និយោជិត និងរាជរដ្ឋាភិបាល បានលើកសំអាងរៀងៗខ្លួនចំពោះការស្នើសុំ និងលទ្ធភាពដែលអាចផ្តល់មានភាពតឹងតែង ប៉ុន្តែមិនបានអនុម័តក្នុងចំនួនណាមួយពិតប្រាកដនោះទេ ។បញ្ហាតានតឹងបានធ្វើឲ្យភាគីទាំងពីរពិភាក្សាផ្ទៃក្នុងរយៈពេលប្រមាណជា១០នាទីរួចចូលបន្ទប់ប្រជុំវិញ និងបានជជែកគ្នាបន្តរហូតឈានដល់ការបោះឆ្នោតដើម្បីកំណត់យកតួលេខណាមួយសម្រាប់ដាក់ទៅគណៈកម្មការប្រឹក្សាការងារសម្រេច ។
លោក សៀង សម្បត្តិ ប្រធានសហព័ន្ធសហជីពមិត្តភាពកម្មករឲ្យដឹងក្រោយកិច្ចប្រជុំកាលពីរសៀលថ្ងៃទី៣០ តុលា នៅទីស្តីការក្រសួងការងារថា កិច្ចប្រជុំនេះមានភាពតឹងតែងដាក់គ្នាខ្លាំងដោយមិនមានការព្រមព្រៀងណាមួយពីភាគីទាំងអស់នោះទេ និងបានសម្រេចបោះឆ្នោតដើម្បីកំណត់ចំនួនតួលេខណាមួយសម្រាប់ដាក់ទៅគណៈកម្មការប្រឹក្សាការងារជាអ្នកសម្រេចនៅខែវិច្ឆិកា ២០១៤ ខាងមុខនេះ ។ ក្នុងការបោះឆ្នោតត្រីភាគីនិយោជកបានដាក់ចំនួន១១០ដុល្លារ ទទួលបានការគាំទ្រទាំង៩សំឡេងលើ២១សំឡេង ។ ចំណែកភាគីរដ្ឋាភិបាលវិញ បានដាក់ចំនួន១២១ដុល្លារ ក្នុងសមាជិកទាំង៩សំឡេងលើ២១សំឡេង បានបោះឆ្នោតគាំទ្រទាំងអស់ ។ ដោយឡែក ភាគីសហជីពដែលបានដាក់ចំនួន១៤០ដុល្លារ ទទួលបានការគាំទ្រតែ៧សំឡេងលើ២១សំឡេង គឺមាន២សំឡេង មិនបានបោះឆ្នោតគាំទ្រចំនួន១៤០ដុល្លារនោះទេ ។
លោក សៀង សម្បត្តិ បន្តថា សហជីព២ដែលមិនបានបោះឆ្នោតគាំទ្រ គឺជាសហជីពគាំទ្ររាជរដ្ឋាភិបាលនិងនិយោជក ដោយបោះឆ្នោតជាអនុបវាទ ។ សហជីព២នាក់នោះមិនបានគិតប្រយោជន៍របស់កម្មករនិយោជិតទេ គេបែរជាគិតប្រយោជន៍របស់រាជរដ្ឋាភិបាល និងនិយោជកទៅវិញ ។ យ៉ាងណាក៏ដោយ សហជីពនៅមានសុទិដ្ឋិនិយមថា ចំនួនតួលេខដែលបានបោះឆ្នោតដាក់ទៅគណៈកម្មការប្រឹក្សាការងារនោះមិនស្ថិតនៅចំនួន១១០ និង១២១ដុល្លារនោះទេ គឺសង្ឃឹមថា គណៈកម្មការប្រឹក្សាការងារពិនិត្យបន្ថែមចំនួនតួលេខលើសពីនេះ ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានលើកឡើងថា ទោះបីតួលេខដែលសហជីពដាក់ចំនួន១៤០ដុល្លារមិនបាន បញ្ជូនទៅគណៈកម្មការប្រឹក្សាជាអ្នកកំណត់ក៏ដោយ ក៏តួលេខដែលបញ្ជូនទៅគណៈកម្មការប្រឹក្សាការងារចំនួន១១០ដុល្លារ និង១២១ដុល្លារនោះ សហជីពទាំងអស់យល់ឃើញថា ជាចំនួនស្ថិតនៅបន្ទាត់ភាពក្រីក្រនៅឡើយ ។ ដូច្នេះ ក្រុមសហជីពមានសុទិដ្ឋិនិយមថា គណៈកម្មការប្រឹក្សាការងារ នឹងសម្រេចបន្ថែមតួលេខផ្សេងពីចំនួនតួលេខដែលដាក់ជូន ។
លោក ប៉ាវ ស៊ីណា បញ្ជាក់ថា «តួលេខគឺជាចំនួនមួយសម្រាប់បង្ហាញទៅកាន់ពិភពលោកថា ប្រសិនបើឲ្យចំនួនតួលេខណាមួយនោះ កម្មករនឹងជួបបញ្ហាការរស់នៅរបស់ពួកគាត់ ។ អ៊ីចឹងហើយ គណៈកម្មការប្រឹក្សាការងារដឹងហើយថា សហជីពមានជំហរក្នុងចំនួនតួលេខ១៤០ដុល្លារ ប្រសិនបើការសម្រេចណាមួយមិនស្របតាមតម្រូវការរបស់កម្មករនោះ ខ្ញុំគិតថា គណៈកម្មការប្រឹក្សាការងារនឹងទទួលខុសត្រូវ។ សហជីពបង្ហាញជំហរហើយ គឺចាប់ពី១៧៧ដុល្លាររហូតដល់១៤០ដុល្លារហ្នឹងបានបោះឆ្នោតទៀត ។ ក្រុមសហជីពយើងថា តួលេខដែលដាក់ទៅនោះជាតួលេខមួយ ហើយអ្វីដែលសម្រេចនោះ គឺគណៈកម្មការប្រឹក្សាការងារជាអ្នកសម្រេច»។
ចំណែកលោកស្រីយ៉ាង សោភណ្ឌ ប្រធានសម្ព័ន្ធសហជីពកម្ពុជា ដែលបានចូលរួមកិច្ចប្រជុំរហូតមក បានសម្តែងការមិនពេញចិត្ត ចំពោះចំនួនតួលេខដែលបោះឆ្នោតដាក់ទៅគណៈកម្មការប្រឹក្សាការងារ ។ លោកស្រីបញ្ជាក់ថា តាមពិតទៅយើងមិនពេញចិត្តទេ ព្រោះថាសហជីពរបស់យើងតាំងពីដំបូងមក ដាក់ចំនួន១៧៧ដុល្លារ ប៉ុន្តែដោយសារអ្នកទាំងអស់គ្នាសម្រេចបោះឆ្នោត ទើបយើងសម្រេចចិត្តយកតួលេខ១៤០ដុល្លារក្នុងការបោះឆ្នោត និងមួយវិញទៀតខ្លាចបាត់បង់សំឡេងឆ្នោតដើម្បីសម្រេចយកទៅដាក់គណៈកម្មការប្រឹក្សាការងារ។ ចុងក្រោយយើងត្រូវចាញ់ឆ្នោត ព្រោះសហជីពមួយចំនួនមិនបានបោះឆ្នោតគាំទ្រចំនួន១៤០ដុល្លារនោះទេ ។
ទោះបីជាមានចំនួនតួលេខសម្រាប់ដាក់ទៅគណៈកម្មការប្រឹក្សាការងារយ៉ាងណាក្តី តំណាងសហជីពទាំងអស់មិនអស់ចិត្ត និងអះអាងថា ពួកគេនៅមានសិទ្ធិតវ៉ា និងលើសពីនេះនឹងធ្វើប្រជាមតិចំពោះសមាជិករបស់ខ្លួនថា តើព្រមទទួលយកចំនួនតួលេខដែលដាក់ទៅក្រុមប្រឹក្សាការងារ ឬយ៉ាងណា ។ ដោយឡែក លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមការងារចរចាបានលើកឡើងថា ការកំណត់ចំនួនតួលេខរបស់រាជរដ្ឋាភិបាល បានផ្តល់អត្ថប្រយោជន៍ជូនកម្មកររហូតដល់១០%លើបញ្ហាសុខភាព និងអនុគ្រោះពន្ធមួយទៀត ។ លោកថា ប្រសិនរាជរដ្ឋាភិបាលមិនដាក់ចេញនូវបេឡាជាតិរបបសន្តិសុខសង្គមទេ កម្មករនិយោជិតនឹងត្រូវចំណាយ១០% ស្មើនឹង១២ដុល្លារនៃប្រាក់ឈ្នួលគោលលើការងាររ៉ាប់រងសុខភាព ចំណែកពន្ធវិញ កម្មករអាចរួចផុតពីការបង់ពន្ធចំនួន៧ដុល្លារស្មើនឹងប្រមាណ៦%នៃប្រាក់ឈ្នួលគោល ។
តាមការអះអាងរបស់លោក ហេង សួរ ថា រាជរដ្ឋាភិបាលមិនបានបដិសេធចំពោះតម្រូវការរបស់កម្មករនិយោជិតនោះទេ ។ ប៉ុន្តែជាយុទ្ធសាស្ត្រនៃការផ្តល់ប្រាក់ឈ្នួលនេះដើម្បីឲ្យអ្នកវិនិយោគមើលឃើញថា ប្រាក់ឈ្នួលកម្មករនិយោជិតកម្ពុជាទាប ទើបគេមកធ្វើវិនិយោគនៅកម្ពុជា ។លោកបញ្ជាក់ថា «ធាតុពិតប្រសិនបើយើងផ្តល់ចំនួន១៤០ដុល្លារ ហើយដកការបង់លើបញ្ហាសុខភាព ដកលើការបង់ពន្ធនោះ ចុងក្រោយកម្មករនិយោជិតទាំងអស់នៅសល់ប្រាក់ឈ្នួលប្រហែលជា១២០ដុល្លារដដែល ។ ប៉ុន្តែបើយើងផ្តល់១៤០ដុល្លារនោះ អ្នកបញ្ជាទិញនឹងមើលឃើញថា តួលេខខ្ពស់ តែបើយើងដាក់១២១ដុល្លារនោះ កម្មករមិនមានកាតព្វកិច្ចបង់ពន្ធ និងបង់លើបញ្ហាសុខភាពនោះ គាត់ សល់១២១ដុល្លារ» ។
ទោះជាលើកហេតុផលយ៉ាងណាក្តី លោក ហេង សួរ ថា ចំនួនតួលេខដែលកំណត់ដោយការបោះឆ្នោតនឹងស្ថិតនៅលើការសម្រេចរបស់គណៈកម្មការប្រឹក្សាការងារ (LAC) ដែលគណៈកម្មការនេះនឹងពិភាក្សាសម្រេចក្នុងខែវិច្ឆិកា គឺអាចដឹងលទ្ធផលនៅក្រោយថ្ងៃបុណ្យអុំទូក ។
លោក គង់ អាទិត្យ តំណាងសហជីពស៊ីខៅឌូ ក៏បានលើកឡើងថា ចំនួនតួលេខកំណត់ដាក់ជូនទៅ LAC នោះ មិនមែនជាតួលេខមួយផ្លូវការនោះទេ គ្រាន់តែជាចំនួនរបស់ក្រុមបច្ចេកទេស ដាក់ប៉ុណ្ណោះ ហើយចំនួន១១០ដុល្លារ គឺស្ថិតនៅក្រោមបន្ទាត់ភាពក្រីក្រ ហើយចំនួន១២១ដុល្លារ ស្មើឬលើសបន្តិចបន្តួចពីភាពក្រីក្រ។ រាជរដ្ឋាភិបាលត្រូវគិតពីប្រយោជន៍កម្មករហើយចំនួនតួលេខដែល LAC នឹងសម្រេចនោះ ខ្ញុំសង្ឃឹមថា លើសពីចំនួនដែលដាក់ទៅ គឺចំនួនតួលេខដែលអាចឲ្យសហជីពទទួលយកបាន ៕
ចែករំលែកព័តមាននេះ