រាជធានីភ្នំពេញ ៖ តារាសម្តែងកញ្ញាហេង ស្រីពេជ្រ បានធ្វើឱ្យមហាជនចាប់អារម្មណ៍ដោយសារតែនាងជួបវិបត្តិេស្នហាជាមួយបុរសអាណិកជននៅអាមេរិក ធ្វើឱ្យនាងខូចចិត្តរហូតចង់ផ្តាច់ជីវិតខ្លួនឯងទៀតផង ។ បន្ទាប់ពីយល់ពីតម្លៃនៃជីវិត ហេង ស្រីពេជ្រ ព្យាយាមរស់នៅតទៅទៀត ។ ស្រីពេជ្រកាត់ចិត្តរឿងសង្សារចាស់រៀបការគូថ្មី ដោយចូលប្រឡូកក្នុងពិភពសិល្បៈដើម្បីបន្លប់ទុក្ខ ។
ដោយសារតែមនុស្សគ្រប់រូបចៀសមិនផុតពីរឿងមានគូគាប់ ស្រីពេជ្របានប្រកាសថា បើសិនជានាងរើសគូគាប់ នាងដាច់ខាតមិនយកខ្លួនឱ្យជាប់ពាក់ព័ន្ធជាមួយប្តីគេជាដាច់ខាត ទោះជាមានទ្រព្យទាញទឹកចិត្តនាងក៏ដោយ ។
តារាសម្តែងហេង ស្រីពេជ្រ បានចូលរួមសម្តែងក្នុងខ្សែភាពយន្តច្រើនគួរសម ជាតួអង្គបងស្រី ; លោកជំទាវ; លោកស្រី និងតួអង្គជាអ្នកមានហឺុហា ។ ទោះបីជាការងារសិល្បៈលូតលាស់ ប៉ុន្តែបើនិយាយពីស្នេហាវិញ ស្រីពេជ្រ ធ្លាប់ជូរចត់ រហូតចង់ផ្តាច់ជីវិតទៀតផង បើកុំតែបងប្អូនជួយទាន់ ម្ល៉េះសមគ្មានមុខនាងក្នុងវិស័យសិល្បៈពេលនេះឡើយ ។
ក្នុងឱកាសថតខារា៉អូខេឱ្យផលិតកម្មសាន់ដេ កាលពីថ្ងៃទី២១ តុលា ២០១៤ កញ្ញាស្រីពេជ្ររំឭកថា នាងធ្លាប់ខូចចិត្តប៊ិះអស់ជីវិតពេលលង់ស្នេហ៍ជាមួយអាណិកជនរស់នៅសហរដ្ឋអាមេរិក ជាអ្នកជំនួញ តែគេបែកចិត្តរៀបការគូថ្មី ។ ទោះជាយ៉ាងណាក៏ដោយ ស្នេហាចាស់នោះនាងលែងគិតគូរខ្វល់ខ្វាយទៀតហើយ ។ ដោយសារខូចចិត្តរឿងស្នេហានោះ ស្រីពេជ្រ ដើរផឹកស៊ីមិនគិតពីរឿងរក្សាសុខភាព និងរូបរាងខ្លួនឯងទេ ។ អីុចឹងហើយធ្វើឱ្យនារីវ័យក្មេងដែលមានរូបរាងតូចច្រឡឹងម្នាក់នេះ ប្រែប្រួលជាធាត់ឡើងទម្ងន់ច្រើន ។ នាងប្រឡូកសិល្បៈឡើងវិញជិត២ឆ្នាំនេះ ព្យាយាមសម្រករាង តែនៅតែមានសាច់ទ្រលុក ។
មេរៀនបរាជ័យលើកទី១ ធ្វើឱ្យស្រីពេជ្រចេះថ្លឹងថ្លែង ពិចារណា ដែលអាចជាទុនបំភ្លឺជីវិតបានប្រសើរឡើង ។ ដូច្នេះហើយចំពោះគូអនាគតដែលនាងត្រូវរើសនោះ ស្រីពេជ្រ ថាសំខាន់ត្រូវមានចំណេះជាគោល មិនមានអាយុលើសនាងច្រើនពេក មានកម្រិតជីវភាពមធ្យម។ លើសពីនេះនាងនិយាយថា «បើជាពោះម៉ាយត្រូវតែមានលិខិតស្នាមចេញពីអាជ្ញាធរដឹងឮ បើសិនជាប៉ះចំប្តីគេមិនទាន់ស្រាយចំណងដាច់ស្រេចមិនយកខ្លួនក្បែរឡើយ ទោះជាបុរសនោះមានលុយដូរចិត្តនាងខ្ញុំក៏ដោយក៏នាងខ្ញុំមិនស្រមៃចង់បានឡើយ» ។
អ្វីដែលស្រីពេជ្ររីករាយ គឺពេលនេះអាជីពសិល្បៈ ទោះជាមិនបានតំណែងជាតួអង្គសំខាន់ តែជាតួអង្គថ្លៃថ្នូរក្នុងសង្គម ។ ស្រីពេជ្រ ឧស្សាហ៍ឆក់ឱកាសបានថតចម្រៀងកាយវិការឱ្យផលិតកម្មនៅក្នុងស្រុក មិនសូវរំលងឡើយ ដូចជាផលិតកម្មហង្សមាស ថោន និងផលិតកម្មសាន់ដេជាដើម ។ ប្រការដែលគេចូលចិត្តហៅស្រីពេជ្រចូលរួមសម្តែង មកពីនាងព្យាយាម គោរពពេលវេលា មិនដែលទៅធ្វើការយឺតយ៉ាវ មិនសូវតវា៉ពីតម្លៃសម្តែង និងមិនចូលចិត្តកាច់ឫកកាច់រាងទេ ។ កញ្ញាហេង ស្រីពេជ្រ ចូលប្រឡូកក្នុងពិភពសិល្បៈនៅឆ្នាំ២០០៤ តែផ្អាកវិញព្រោះតែមានចំណងស្នេហាជាមួយអ្នកអាមេរិក ។ ស្រីពេជ្រ ជាអ្នកខេត្តកំពង់ឆ្នាំង បានចាប់អាជីពជាអ្នកចម្រៀងតាមរោងការមុនពេលចាប់អាជីពជាអ្នកសម្តែង ៕
ចែករំលែកព័តមាននេះ