រាជធានីភ្នំពេញ ៖ បុរសម្នាក់ជិះម៉ូតូចូលទៅក្នុងវត្តសន្សំកុសលដោយបានធ្វើសកម្មភាពដ៍ចម្លែកបង្កឱ្យមានការភ្ញាក់ផ្អើល ដល់ព្រះសង្ឃ កូនសិស្សលោក រួមទាំងសមត្ថកិច្ចចុះទៅពិនិត្យ និងសួរដេញដោលទាំងកណ្តាលអធ្រាត្រ ។ ហេតុការណ៍នេះ បង្កឱ្យមានការភ្ញាក់ផ្អើលនៅវេលាម៉ោង១២និង៣០នាទីអធ្រាត្រ ថ្ងៃទី២១ តុលា ២០១៤ នៅក្នុងវត្តសន្សំកុសល ស្ថិតក្នុងភូមិសន្សំកុសល សង្កាត់បឹងទំពុន ខណ្ឌមានជ័យ ។
តាមរយៈកាតសម្គាល់ខ្លួន បុរសខាងលើនេះ ត្រូវបានគេស្គាល់ឈ្មោះនួន វណ្ណៈ ធ្វើការនៅក្នុងរដ្ឋសភានៅអគ្គនាយកដ្ឋានរដ្ឋបាលហិរញ្ញវត្ថុ (អ.រ.ស) នាយកដ្ឋានពិធីការ ដែលមានមុខតំណែកជាមន្រ្តីទំនាក់ទំនងទូទៅ ។ បុរសខាងលើមានទីលំនៅផ្ទះលេខ 9M ផ្លូវបេតុង ភូមិតាងូវក្រោម សង្កាត់និរោធ ខណ្ឌច្បារអំពៅ។
ប្រភពព័ត៌មានពីព្រះសង្ឃគង់ក្នុងវត្តសន្សំកុសល បានមានសង្ឃដីកាឱ្យដឹងថា នៅមុនពេលកើតហតុគឺបុរសខាងលើ បានជិះម៉ូតូហុងដាឌ្រីម សេ១២៥ ពណ៌ខ្មៅ មួយគ្រឿង ពាក់ស្លាកលេខភ្នំពេញ AI-2920 បានជិះចូលមកក្នុងវត្តទាំងកណ្តាលអធ្រាត្រ ដោយសួរទៅកូនសិស្សលោក ថាចង់មកនិមន្តលោកស្រោចទឹកឱ្យ និងបាននិយាយថា ចង់ឡើងទៅលើកុដទី៨ ។ ពេលនោះកូនសិស្សលោក បានចង្អុលប្រាប់ទៅកុដទី៨ តែបែរជាបុរសម្នាក់នោះឡើងទៅលើកុដទី២ ហើយក៏បានចុះមកដីវិញ ។ បន្ទាប់មកបុរសខាងលើនេះ បានទុកម៉ូតូចោលទៅសម្ងំអង្គុយឱបដៃនៅមុខចេតិយធំនៅក្នុងវត្តទាំងស្ថានភាពងងឹតស្លុប ដែលបង្កឱ្យមានការភ្ញាក់ផ្អើលដល់សមត្ថកិច្ចចុះមកពិនិត្យ និងធ្វើសាកសួរតែបុរសខាងលើ មិនបាននិយាយអ្វីទាំងអស់ ។
មួយសន្ទុុះក្រោយមកក្រុមអ្នកសារព័ត៌មានទៅដល់បានបើកភ្លើងហ្វា ដើម្បីថតរូបបុរសខាងលើនោះ ស្រាប់តែឃើញសុទ្ធតែសត្វមូសរោម និងខាំបុរសខាងលើឡើងខ្មៅងងឹត តែបុរសនោះធ្វើជាមិនដឹងគិតតែពីអង្គុយឱបដៃគ្រវីក្បាលតែប៉ុណ្ណោះ ។ អ្វីដែលគួរឱ្យចម្លែកទៀតនោះ គឺបុរសខាងលើបានសួរទៅព្រះសង្ឈ និងកូនសិស្សលោកថា «នៅក្នុងវត្តនេះ មានកន្លែងដេកអត់ គាត់ចង់ដេកមុខព្រះអង្គធំ ព្រោះដេកមុខព្រះអង្គធំលក់ស្រួល» បុរសខាងលើក៏បាននិយាយឱ្យដឹងទៀតថា មានមនុស្សចង់ធ្វើបាបមកលើរូបគាត់។ ដោយសារសកម្មភាពបុរសខាងលើ មានភាពមិនច្បាស់លាស់នោះ ព្រះសង្ឈមិនហ៊ានអនុញ្ញាតឱ្យគេងស្នាក់អាស្រ័យក្នុងព្រះវិហារនោះទេ ។ ពេលនោះដែរ ក្រុមអ្នកសារព័ត៌មានបានសួរទៅបុរសខាងលើថា «ពូទៅផ្ទះអត់ខ្ញុំជូនទៅ?» រំពេចនោះបុរសខាងលើ ក៏បានទាញម៉ូតូឡើងជិះចេញទៅយ៉ាងលឿនមិននិយាយអ្វីទាំងអស់ ដោយបន្សល់ទុកនៅតែចម្ងល់ថា តើបុរសរូបនេះមកក្នុងវត្ត ធ្វើសកកម្មភាពយ៉ាងចម្លែកទាំងកណ្តាលអធ្រាត្រក្នុងគោលបំណងអ្វីពិតប្រាកដ ?
ចែករំលែកព័តមាននេះ