រាជធានីភ្នំពេញ ៖ បើទោះជាគ្មានច្បាប់អនុញ្ញាតពីសាលារាជធានីភ្នំពេញក៏ដោយនៅព្រឹកថ្ងៃទី១៨ កញ្ញា ប្រជាពលរដ្ឋប្រមាណជា៧០នាក់ មកពីសហគមន៍បឹងកក់ សហគមន៍ថ្មគោល សហគមន៍បុរីកីឡា និងអតីតអ្នកបឹងកក់បាននាំគ្នាប្រមូលផ្តុំនៅមុខធនាគារពិភពលោក សហគមន៍អឺរ៉ុប ដើម្បីដាក់គំនាបឲ្យផ្តាច់ជំនួយពីរាជរដ្ឋាភិបាលកម្ពុជា ។
មន្ត្រីសាលាខណ្ឌដូនពេញបាននិយាយថា នៅវេលាម៉ោង០៨និង១០នាទីព្រឹកថ្ងៃទី១៨ កញ្ញា ប្រជាពលរដ្ឋប្រមាណជា៧០នាក់មកពីសហគមន៍បឹងកក់ អតីតអ្នកបឹងកក់ សហគមន៍ថ្មគោល និងសហគមន៍បុរីកីឡា បាននាំគ្នាឈរមុខធនាគារពិភពលោកនិងសហគមន៍អឺរ៉ុបដែលមានទីតាំងលើកំណាត់មហាវិថីព្រះនរោត្តម ស្ថិតក្នុងសង្កាត់ចតុមុខ ខណ្ឌដូនពេញ ដោយមានកាន់បដាពាក្យស្លោកជាច្រើន ។ នៅក្នុងការដង្ហែក្បួនបាតុកម្មដែលគ្មានការអនុញ្ញាតពីសាលារាជធានីភ្នំពេញរបស់សហគមន៍ដីធ្លីដឹកនាំដោយសកម្មជនមុខដដែលៗអ្នកស្រីទេព វន្នី អ្នកស្រីយ៉ោម បុប្ផា និងសកម្មជនផ្សេងៗទៀត បានឈរស្រែកតាមក្បាលមេក្រូនៅមុខធនាគារពិភពលោកនិងសហគមន៍អឺរ៉ុបដោយទាមទារសុំឲ្យផ្តាច់ជំនួយរាជរដ្ឋាភិបាលកម្ពុជាដោយសារសហគមន៍អឺរ៉ុបមិនបានគោរពតាមកិច្ចសន្យាជាមួយប្រជាពលរដ្ឋ និងជម្រុញឲ្យរាជរដ្ឋាភិបាលដោះស្រាយបញ្ចប់ដីធ្លីនៅកម្ពុជា ។
ប្រជាពលរដ្ឋសហគមន៍ដីធ្លីបានឲ្យដឹងថា នៅព្រឹកថ្ងៃដដែលតំណាងធនាគារពិភពលោក និងសហគមន៍អឺរ៉ុប បានចេញមកទទួលញត្តិរបស់ប្រជាពលរដ្ឋជម្លោះដីធ្លី ហើយបានប្រាប់ថាពួកគាត់នឹងយកញត្តិនោះប្រគល់ទៅឲ្យថ្នាក់ដឹកនាំ តែមានដំណោះស្រាយយ៉ាងណានោះគាត់មិនអាចដឹងឡើយ ។
ចែករំលែកព័តមាននេះ