ខេត្តមណ្ឌលគិរី ៖ កម្លាំងការិយាល័យព្រហ្មទណ្ឌកំរិតស្រាល បានសហការជាមួយកម្លាំងការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តមណ្ឌលគិរី ធ្វើការស្ទាក់ចាប់បានជនសង្ស័យម្នាក់រួមនឹងម៉ូតូមួយគ្រឿង បន្ទាប់ពីជនសង្ស័យរូបនោះបាន ធ្វើសកម្មភាពកាច់សោ. ក ម៉ូតូ C125 មួយគ្រឿង ក្នុងវត្តសែន មនោរម្យរួចគេចខ្លួន ។ ប្រតិបត្តិការខាងលើបានធ្វើឡើង កាលពីវេលាម៉ោង៧និង២០ព្រឹក ថ្ងៃទី១៦ កញ្ញា ២០១៤ ត្រង់ចំណុចដើមស្រល់ ស្ថិតក្នុងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ។
នៅចំពោះមុខសមត្ថកិច្ចជនសង្ស័យបានសារភាពថា នៅថ្ងៃទី១៥ កញ្ញា ២០១៤នេះ គេបានធ្វើដំណើរពីស្រុក ស្នួល ខេត្តក្រចេះ តាមរថយន្តតាក់ស៊ី មកខេត្តមណ្ឌលគិរីបំណងមកលួចម៉ូតូ និងបានសម្រាកនៅផ្ទះសំណាក់ លុះដល់វេលា ម៉ោង៤ទៀបភ្លឺ ថ្ងៃទី១៦ កញ្ញា គេបានចូលទៅក្នុងវត្តសែនមនោរម្យធ្វើសកម្មភាពកាច់សោ.ក ម៉ូតូ ហុងដាឌ្រីម C125 មួយគ្រឿងបានសម្រេចរួចធ្វើការគេចខ្លួនតែម្តង។ ប៉ុន្តែដោយសារស្ថានភាពផ្លូវពីក្រុងសែនមនោរម្យ ឆ្ពោះទៅស្រុកស្នួលនៅពេល យប់គឺស្ងាត់ពេក ជនសង្ស័យមានអារម្មណ៍ខ្លាចសត្វកាចសាហាវ ក៏បានសម្រេចចិត្តចូលទៅពួនក្នុងព្រៃធ្វើការដោះដូរស្លាក លេខម៉ូតូ លុះព្រឹកឡើងជនសង្ស័យបានជិះម៉ូតូចេញពីក្នុងព្រៃ ក៏ត្រូវសមត្ថកិច្ចក្របួចជាប់តែម្ដង ។
សមត្ថកិច្ចបានឲ្យដឹងថា ជនសង្ស័យឈ្មោះ ជាតិ ជៀន ភេទប្រុស អាយុ១៨ឆ្នាំ ទីលំនៅបច្ចុប្បន្ននៅភូមិកាំឡែក ឃុំកាំឡែក ស្រុកស្នួល ខេត្តក្រចេះ ។ បច្ចុប្បន្នជនសង្ស័យកំពុងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់វិធានការតាមច្បាប់ ។ ចំណែកម៉ូតូ សមត្ថកិច្ចបានប្រគល់ទៅឲ្យ ម្ចាស់ដើមវិញ ។
ចែករំលែកព័តមាននេះ