ខេត្តកំពង់ចាម ៖ ជនសង្ស័យ២នាក់ ដែលជាប់ពាក់ព័ន្ធអារ.កសម្លាប់ថៅកែស្រី រួចយកសពទម្លាក់ចូលក្នុងអណ្តូងទឹក ប្លន់យកលុយនិងម៉ូតូ១គ្រឿង ត្រូវបានកម្លាំងកងរាជអាវុធហត្ថខេត្ត ចាប់ខ្លួនបានហើយ កាលពីថ្ងៃទី១៥ កញ្ញា នៅស្រុកពញាក្រែក ខេត្តត្បូងឃ្មុំ ខណៈជនទាំង២នាក់ រត់ទៅសម្ងំលាក់ខ្លួននៅទីនោះ ។
ឃាតករទាំង២នាក់ ម្នាក់ឈ្មោះ ឃន ឆាយ ភេទប្រុស អាយុ២០ឆ្នាំ រស់នៅភូមិសង្កែ ឃុំស្តើងជ័យ ស្រុកជើងព្រៃ និងម្នាក់ទៀតឈ្មោះ ម៉ាន រ៉ ភេទប្រុស អាយុ១៩ឆ្នាំ រស់នៅភូមិត្របឹង ឃុំស្តើងជ័យ ស្រុកជើងព្រៃ បច្ចុប្បន្នជនទាំង២ ត្រូវអាវុធហត្ថឃុំខ្លួននៅទីបញ្ជាការកងរាជអាវុធហត្ថខេត្ត ។
ក្រោយពីឃាត់ខ្លួន កម្លាំងសមត្ថកិច្ចដកហូតបានម៉ូតូម៉ាកគុប និងចិញ្ចៀនពេជ្រមួយវង់របស់ជនរងគ្រោះ ប្រគល់ឱ្យសាច់ញាតិជនរងគ្រោះវិញ ចំណែកលុយដែលប្លន់បាននោះ ជនសង្ស័យយកទៅទិញម៉ូតូម៉ាកឃ្លីកមួយគ្រឿង ។
គួររំលឹកថា ថៅកែស្រីម្នាក់ ឈ្មោះថៃ ហួយ អាយុ៥២ឆ្នាំ មានទីលំនៅសង្កាត់ចតុមុខ ខណ្ឌដូនពេញ រាជធានីភ្នំពេញ ត្រូវបានកម្មកររបស់ខ្លួនចំនួន២នាក់ព្រួតវាយ និងអារ.កសម្លាប់យ៉ាងសាហាវព្រៃផ្សៃ រួចសែងទៅទម្លាក់ចូលក្នុងអណ្តូងទឹកជម្រៅ៨ម៉ែត្រ និងយកស័ង្កសីគ្របបំបិទភស្តុតាងមិនឲ្យអ្នកណាដឹងនោះទេ ដើម្បីប្លន់យកលុយចំនួន១.៥០០ដុល្លារ និងម៉ូតូគុប១គ្រឿង ។
សពត្រូវបានគេ ប្រទះឃើញនៅវេលាម៉ោង១២និង៣០នាទីរំលងអធ្រាត្រឈានចូលព្រឹកថ្ងៃ ទី១៤ កញ្ញា ២០១៤ ក្នុងចំការស្វាយចន្ទីមួយកន្លែងស្ថិតនៅភូមិស្រម៉ ឃុំស្រម៉ ស្រុកជើងព្រៃ មានចម្ងាយពីផ្លូវជាតិលេខ៦ ប្រហែលជាង៤គីឡូម៉ែត្រ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ