រាជធានីភ្នំពេញ ៖ ជាលើកទី៦ហើយសម្រាប់មហោស្រពភាពយន្តកុមារអន្តរជាតិអាស៊ីក្រោមប្រធានបទ«ក្តីសុបិនរបស់ខ្ញុំ» ដោយមានសិស្សតាមវិទ្យាល័យជាច្រើនរូបចូលរួម ។ មហោស្រពនេះរៀបចំដោយសា្ថនទូតជប៉ុនប្រចាំនៅកម្ពុជា និងឈានចូលដល់វគ្គពាក់កណ្តាលផ្តាច់ព្រ័ត្រកាលពីថ្ងៃទី១២ កញ្ញា ឆ្នាំ២០១៤ នៅសាលអង្គរគីហ្សុ៊ណានៃ មជ្ឈមណ្ឌលសហប្រតិបត្តិការកម្ពុជា-ជប៉ុនក្នុងរាជធានីភ្នំពេញ ។
លោកកាយ៉ូស៊ិ គូរ៉ូមីយ៉ា ទីប្រឹក្សាប្រចាំ ស្ថានទូតជប៉ុន បានថ្លែងក្នុងពិធីនោះថា ដោយមានកិច្ចសហការរវាងក្រសួងអប់រំយុវជន និងកីឡា ស្ថានទូតជប៉ុន និងស្ថាប័នពាក់ព័ន្ធទាំងឡាយធ្វើឱ្យមហោស្រពប្រព្រឹត្តទៅដោយជោគជ័យ ។ ស្ថានទូតជប៉ុនបានរៀបចំមហោស្រពនេះតាំងពីឆ្នាំ២០០៩ ដោយឈរលើទស្សនៈជំរុញការអភិវឌ្ឍផ្នែកបញ្ញាស្មារតីរបស់សិស្ស ក៏ដូចជាការយល់ដឹងពីគ្នាទៅវិញទៅមកក្នុង ចំណោមសិស្សនៅតំបន់អាស៊ីតាមរយៈការផលិតខ្សែភាពយន្តខ្នាតខ្លី ។ កម្មវិធីជ្រើសរើស នេះប្រធានបទ ផ្សេងគ្នាពីការប្រឡងមុនៗដែលមានដូចជា«ការអប់រំ» «ជីវិតសម្រាប់អ្នក» និង«ការរំលោភបំពាននៅក្នុងសាលា» ជាដើម ។ ចំពោះប្រធានបទ«ក្តីសុបិនរបស់ខ្ញុំ» ជឿជាក់ថាទាំងអស់គ្នាអាចមានលទ្ឋភាពធំធេងសម្រាប់សម្រេចបំណងនៅក្នុងអនាគត ហើយអ្នកក៏មិនអាចមានមហិច្ឆតាខ្ពស់ពេកចំពោះក្តីសុបិននេះ»។
លោកទីប្រឹក្សាស្ថានទូតឱ្យដឹងថា សិស្សដែលផលិតស្នាដៃជាប់ក្នុងវគ្គពាក់កណ្ដាលផ្ដាច់ព្រ័ត្រនេះនឹងទៅកាន់ប្រទេសជប៉ុននៅអំឡុង ខែវិចិ្ឆកា ចូលរួមក្រោមប្រធានបទ«JENSYS 20» ដែលផ្តល់ដោយរដ្ឋាភិបាលជប៉ុន ។ ពួកគេនឹងចូលរួមវគ្គប្រឡងផ្តាច់ព្រ័ត្រនៅទីក្រុងមីណាមីអាវ៉ាជី ខេត្តយូហ្គោ នៅថ្ងៃទី២៩ វិច្ឆិកា ជាមួយសិស្សមកពីប្រទេសឡាវ ភូមា ថៃ វៀតណាម ចិន តៃវ៉ាន់ ម៉ាឡេស៊ី ម៉ុងហ្គោលី និងជប៉ុន។
ខ្សែភាពយន្តរយៈពេល៣នាទីចំនួន២៤រឿង របស់សិស្សមកពី១០វិទ្យាល័យនៅក្នុង និងជុំវិញរាជធានីភ្នំពេញបានចូលរួមក្នុងមហោស្រពនៅរាជធានីភ្នំពេញ ។ ក្នុងចំណោម២៤រឿងនោះ ខ្សែភាពយន្តចំនួន១៦រឿងជ្រើសរើសដើម្បីបង្ហាញជូននៅក្នុងកម្មវិធីប្រឡង ។ ឆ្លងកាត់វគ្គពាក់កណ្តាលផ្តាច់ព្រ័ត្រ សិស្សវិទ្យាល័យហ៊ុន សែន សេរីភាព៣រូប និងសិស្សវិទ្យាល័យហ៊ុនសែនតាខ្មៅ៣រូប ទទួលបានជោគជ័យ ហើយត្រៀមខ្លួនទៅប្រឡងវគ្គផ្តាច់ព្រ័ត្រនៅប្រទេសជប៉ុន ៕
ចែករំលែកព័តមាននេះ