ខេត្តក្រចេះ ៖ ឈើប្រណីតប្រភេទធ្នង់ចំនួនជាង១រយកំណាត់ បរិមាណជិត១០មែត្រគូប មានតម្លៃជាច្រើនម៉ឺនដុល្លារ ដែលដឹកជញ្ជូនខុសច្បាប់តាមរថយន្តធុនបាឡែន និងតាមទូកគឺត្រូវប៉ូលិសការិយាល័យសេដ្ឋកិច្ចចុះបង្ក្រាបបានជាបន្តបន្ទាប់ និងប្រគល់ទៅឲ្យមេព្រៃចាត់ការបន្ត។
សកម្មភាពនៃការចាប់បង្ក្រាបឈើខុសច្បាប់ពីសំណាក់នគរបាលខេត្ត រួចប្រគល់ទៅឲ្យមេព្រៃដើម្បីចាត់ការបន្តតាមច្បាប់នេះ គឺត្រូវគេនិយាយថា វាមិនមែនជារឿងថ្មីនោះ ទេដែលវាស្ទើរទៅជាទម្លាប់មួយទៅហើយ។ ទន្ទឹមនឹងស្ថានភាពការដឹកជញ្ជូនឈើក្នុងដែនសមត្ថកិច្ចផ្នែករដ្ឋបាលព្រៃឈើក្រចេះ គឺកំពុងតែកើតមានយ៉ាងពេញបន្ទុកក្នុងអំឡុងពេលប៉ុន្មានថ្ងៃចុងក្រោយនេះ រួចមកនោះគឺសកម្មភាពនៃការចុះចាប់បង្ក្រាបរបស់នគរបាលទៅលើការដឹកជញ្ជូនឈើខុសច្បាប់ ក៏បានធ្វើឡើងជាបន្តបន្ទាប់ និងបាននាំវត្ថុតាងមកប្រគល់បន្តឲ្យមេព្រៃជំនាញ។ ចំណែកឯមេព្រៃខេត្តក្រចេះ បានត្រឹមតែនិយាយថា គេគ្មានកម្លាំងគ្រប់គ្រាន់ដើម្បីឃ្លាំមើលបង្ក្រាបនិងទប់ស្កាត់។
យ៉ាងហោចណាស់មានឈើប្រណីតធ្នង់មានចំនួន១៥០កំណាត់ បរិមាណជិត១០មែត្រគូប ដែលដឹកជញ្ជូនតាមរថយន្ត និងទូក គឺត្រូវប៉ូលិសចាប់បង្ក្រាបនៅកន្លែងផ្សេងគ្នាជាបន្តបន្ទាប់ ក្នុងរយៈពេល២ថ្ងៃជាប់ៗគ្នាពីថ្ងៃទី២៧-២៨ សីហា ។ ឈើខុសច្បាប់មួយចំនួន គឺបានបង្ក្រាបនៅលើផ្លូវកៅស៊ូក្នុងក្រុងក្រចេះ ខណៈឈ្មួញកំពុងលួចដឹកតាមរថយន្តធុន បាឡែនមួយគ្រឿង។ រីឯឈើប្រណីតជាង១៤០កំណាត់ផ្សេងទៀត គឺត្រូវចាប់បង្ក្រាបបាននៅមាត់ច្រាំងទន្លេរនៅចំនុចភូមិធំ ឃុំសណ្តាន់ ស្រុកសំបូរ ដែលឈ្មួញបានជញ្ជូនតាមទូកបំរុងលើកដាក់រថយន្តដឹកចេញបន្ត។
ឈើប្រណីតទាំងចំនួននេះ គឺត្រូវគេប៉ាន់ប្រមាណថា មានតម្លៃជាច្រើនម៉ឺនដុល្លារ សម្រាប់ឈ្មួញយកទៅលក់ត្រឹមតាមដេប៉ូធំៗ នៅស្រុកតំបែរ និងស្រុកមេមត់ខេត្តត្បូងឃ្មុំ ប៉ុណ្ណោះ ៕
ចែករំលែកព័តមាននេះ