រាជធានីភ្នំពេញ ៖ បុរសម្នាក់ឈ្មោះ វ៉ន ដាវិន អាយុ៣៥ឆ្នាំ ដែលអះអាងថា ខ្លួនជាកូនរបស់លោក វ៉ន សាវឿន ប្រធានសាខាពន្ធដារខេត្តកណ្តាល មានទីលំនៅក្នុងសង្កាត់កំពង់សំណាញ់ ក្រុងតាខ្មៅ ខេត្តកណ្តាល ដែលកន្លងមកធ្លាប់បានបោកយករថយន្ត ម៉ូតូ និងប្រាក់របស់គេជាច្រើនលើកច្រើនសា ពេលនេះត្រូវកម្លាំងនគរបាលចាប់ខ្លួននៅគ្រាដែលបុរសរូបនេះទៅសួរសុខទុក្ខមិត្តភក្តិរបស់គេដែលជាប់គុកនៅពន្ធនាគារព្រៃស ។
ជនឆបោកម្នាក់នេះត្រូវនគរបាលប៉ុស្តិ៍រដ្ឋបាលព្រៃវែង ខណ្ឌដង្កោ ចាប់ខ្លួនកាលពីវេលាម៉ោងជាង១រសៀលថ្ងៃទី២៨ កក្កដា នៅក្នុងមណ្ឌលកែប្រែម១ ក្នុងពន្ធនាគារព្រៃស និងបានបញ្ជូនបន្តមកកាន់ប៉ុស្តិ៍រដ្ឋបាលនគរបាលទន្លេបាសាក់ ខណ្ឌចំការមន កាលពីវេលាម៉ោង៦និង១៥នាទីល្ងាចថ្ងៃដដែល ក្រោយពីមានជនរងគ្រោះជាច្រើននាក់បានដាក់ពាក្យប្តឹងចោទបុរសនេះពីបទឆបោក ។
នគរបាលប៉ុស្តិ៍ទន្លេបាសាក់ឱ្យដឹងថា ជនឆបោកម្នាក់នេះត្រូវបានជនរងគ្រោះចំនួន២នាក់ដាក់ពាក្យបណ្តឹង គឺលោកប៉ាល់ ឆន អាយុ៤៣ឆ្នាំ មានទីលំនៅក្នុងសង្កាត់វាលវង់ ខណ្ឌ៧មករា បានមកដាក់បណ្តឹងកាលពីថ្ងៃទី១១ មិថុនា ឆ្នាំ២០១៤ ដោយចោទថា ជននេះបានបោកយករថយន្តរបស់គាត់មួយគ្រឿងម៉ាកឡិចស៊ីស៤៧០ ពណ៌ស្ករ ពាក់ស្លាកលេខភ្នំពេញ ២N-៥៧៧៥ យកទៅបញ្ចាំនៅកាស៊ីណូណាហ្គា ហើយគាត់បានយកលុយទៅលស់មកវិញអស់ចំនួន១២.០០០ដុល្លារ ។
ចំណែកជនរងគ្រោះម្នាក់ទៀតឈ្មោះ ស៊ូ ប៊ុនថន ភេទប្រុស អាយុ២២ឆ្នាំ បានចាញ់បោកបុរសរូបនេះអស់ម៉ូតូទំនើបធុនធំមួយគ្រឿងម៉ាកហុងដាស៊ីប៊ីអ (CBR) និងបានមកដាក់ពាក្យបណ្តឹងនៅប៉ុស្តិ៍ទន្លេបាសាក់ដែរ ។ ជនរងគ្រោះទាំង២នាក់ខាងលើត្រូវបានជនឆបោករូបនេះបោកយកចេញពីទីលានបាល់ទាត់ស្រុីជី (3G) ក្នុងសង្កាត់ទន្លេបាសាក់តែមួយ ។ នគរបាលបុ៉ស្តិ៍រូបនេះបន្តថា ពាក់ព័ន្ធនឹងជននេះ នៅមានជនរងគ្រោះ២នាក់ផ្សេងទៀត ដែលម្នាក់ឈ្មោះ កប ចន្ត្រា ភេទប្រុស អាយុ៣២ឆ្នាំ បានចាញ់បោកអស់ម៉ូតូម៉ាកហុងដាឌ្រីមសេ១២៥ មួយគ្រឿង និងស្ត្រីវ័យចំណាស់ម្នាក់ទៀតឈ្មោះ សៀក នី អាយុ៦០ឆ្នាំ ក៏បានអះអាងថា ចាញ់បោកបុរសរូបនេះអស់ប្រាក់ចំនួន១.៥០០ដុល្លារផងដែរ ដោយពួកគេបានទៅដាក់ពាក្យបណ្តឹងទៅតាមប៉ុស្តិ៍ផ្សេងៗគ្នា ។
តាមប្រភពដដែលប្រាប់ឱ្យដឹងទៀតថា ជនឆបោកម្នាក់នេះមិនមែនបោកតែជនរងគ្រោះទាំង៤នាក់នេះទេ គឺនៅមានជនរងគ្រោះជាច្រើននាក់ទៀតកំពុងតែនាំគ្នាដាក់ពាក្យបណ្តឹងបន្ថែមក្រោយពីទទួលដំណឹងថា សមត្ថកិច្ចបានឃាត់ខ្លួននោះ ។ បន្ទាប់ពីនាំខ្លួនជនឆបោកដ៏ជំនាញម្នាក់នេះមកកាន់ប៉ុស្តិ៍ទន្លេបាសាក់ដើម្បីសាកសួរ និងកំណត់ហេតុរួចហើយ ក៏បញ្ជូនទៅកាន់អធិការដ្ឋានខណ្ឌចំការមនចាត់ការតាមនីតិវិធី ៕
ចែករំលែកព័តមាននេះ